“Avroviziya” Beynəlxalq Mahnı Müsabiqəsinin təşkilatçısı olan Avropa Yayım Birliyi 6 ölkəni münsiflər heyətindən çıxarıb. Bu barədə yarışmanın saytında məlumat yerləşdirilib.
Sözügedən ölkələr Azərbaycan, Gürcüstan, Monteneqro, Polşa, Rumıniya və San Marinodur. Həmin ölkələr qaydaları pozmaqda ittiham edilir. Qeyd edək ki, “Avroviziya” mahnı müsabiqəsinin canlı yayımında münsif səsverməsi zamanı texniki problemlərin yaşandığı bildirilib. Bu səbəbdən Azərbaycandan səsləri İTV-nin aparıcısı Nərmin Salmanova yox, Martin açıqlayıb. O, ölkəmizin 12 xalı Böyük Britaniyaya verdiyini deyib. N.Salmanova isə Azərbaycanın həmin xalı əslində Ukraynaya göndərdiyini qeyd edib.
“Biz Ukraynaya 12 bal vermək istədiyimiz halda, israrla həmin səsi Britaniyaya vermək tələb olundu”. Bunu isə jurnalistlərə açıqlamasında “Avroviziya”da Azərbaycan nümayəndə heyətinin rəhbəri İsa Məlikov deyib. Onun sözlərinə görə, bu barədə final gecəsi dərhal təşkilati quruma məktub ünvanlanıb. Məktubda Azərbaycan münsiflər heyətinin verdiyi səsin nəzərə alınmaması barədə açıqlama tələb olunub: “Biz final gecəsi artıq səsimizin nəzərə alınmadığını gördük və təşkilatçılara müraciət məktubu ünvanladıq. Həmçinin hadisə ilə bağlı növbəti etiraz məktubunu Avropa Yayım Birliyinə ünvanladıq. Yəqin ki, rəsmi cavab gələr”.
İsa Məlikov Azərbaycanın bundan sonrakı addımlarına da toxunub: “Düşünürəm ki, Azərbaycanın bundan sonra verəcəyi qərar gələn cavabdan asılır. Həm növbəti illərdə iştirak baxımından, həm də ki, ümumiyyətlə, bu hadisəyə qiymət baxımından”.
Belə məlum olur ki, əslində ölkəmizdə səslərin canlı yayımda elan olunması ilə bağlı heç bir texniki problem olmayıb. Üstəlik, təşkilatçıların İctimai Televiziyanın adından səsləri elan etməsinə heç bir hüququ da yoxdur. Bu da onu göstərir ki, təşkilatçılar məqsədli şəkildə istədikləri vaxt iştirakçı ölkənin səsvermə hüququnu əlindən alır, səsləri saxtalaşdırırlar.
Bununla bağlı Azərbaycan şikayətlərinin bildirdikdə isə “Avroviziya” müsabiqəsinin təşkilatçısı Avropa Yayım Birliyi (AYB) 6 ölkənin - Azərbaycan, Gürcüstan, Monteneqro, Polşa, Rumıniya və San Marinonun münsiflər heyəti tərəfindən müsabiqədən çıxarıldığını bəyan edib. Bu ölkələr qaydaları pozmaqda ittiham edildi. Lakin bu hansı qayda pozuntularıdır, bu haqda təşkilatçılar heç bir açıqlama verməyib.
Azərbaycanın münsiflər heyətindən uzaqlaşdırılmasını qərəz sayan ekspertlərə görə, burada söhbət qanun pozuntusundan yox, məhz siyasi yanaşmadan gedir. Azərbaycanın 44 günlük Vətən müharibəsində qazandığı qələbənin artıq mədəniyyət sferasında da qısqanclıqla qarşılandığını deyən ekspertlərin fikrincə, Azərbaycan beynəlxalq hüquq müstəvisində öz pozulan hüquqlarının bərpası üçün işlər görməlidir.
Bütün bunlardan sonra cəmiyyətimizdə daha çox bu fikir səslənir ki, “Azərbaycan artıq ”Avroviziya" müsabiqəsində iştirak etməkdən imtina etsin" və sairə. dia-az.site xəbər verir ki, mövzu ilə bağlı deputat Aqil Abbas “Yeni Müsavat”a danışıb: “Onsuz da bu müsabiqə çoxdan hörmətdən düşüb, mənasız konsertə çevrilib. İkincisi də, mən həmişə bu müsabiqəni izləyirdim, lakin bu il heç izləmədim, maraqlanmadım da. Bizim müsabiqəmiz Şuşada ”Xarıbülbül" festivalımızdır və bütün dünya ona baxır. Azərbaycanın bundan sonra da “Avroviziya” müsabiqəsində iştirak etməsinin əleyhinə deyiləm. O ki qaldı Azərbaycana qarşı qərəzə, Avropa nə zaman ölkəmizə qarşı dürüst mövqe tutub ki? Avropa ölkələri həmişə Azərbaycanı əzmək, sındırmaq istəyiblər, bu cür vasitələrə əl atıblar. Doğrudur, müharibədən sonra ölkəmizə qarşı fikirləri bir qədər dəyişib, çünki avropalılar gücü sevir. İndi müharibədə uduzduqlarının bu cür müsabiqələrdə “qisas”ını alırlar. Bütün bunlar boş şeylərdir. Baxıram ki, İTV açıqlama verməkdən yorulub, xeyli müzakirələr aparılır. Amma belə şeylərə fikir vermək lazım deyil, buna görə dilxor olmağa dəyməz. Avropalının çoxüzlü olmasından hamımız xəbərdarıq. Doğrudur, müsabiqədə Ukrayna o qədər də güclü performans göstərmədi, amma Rusiyanın acığına onu qalib etdilər. Biz də istəyirdik ki, Ukrayna qalib gəlsin, dünya ona dəstək olsun.
Deyim ki, təkcə “Avroviziya” deyil, bütün müsabiqələr siyasiləşdirilir, o cümlədən “Nobel” mükafatı da. Məsələn, Saxarov, o, böyük alimdir, amma məhz siyasi amillərə görə ona “Nobel” mükafatı verilib. Orxan Pamuk da böyük yazıçıdır, amma ermənilərlə bağlı axmaq bir söz deyəndən sonra ona “Nobel” mükafatı verdilər. Təsəvvür edin, “Nobel” hələ dünyada ən yüksək mükafat sayılır, amma o da siyasi məqsədlər daşıyır. Bu mənada, “Avroviziya” və digər müsabiqələr siyasi məqsədlər daşıyıb. Amma bu dəfə siyasi amillər özünü daha qabarıq şəkildə göstərdi".
AĞ Partiya sədri Tural Abbaslı isə qeyd etdi ki, “Avroviziya” təkcə incəsənət, mədəniyyət, musiqi yarışı deyil: “Heç kəsə sirr deyil ki, burada siyasi rənglər, tonlar var. Yəni müsabiqədə səsvermə, yarışın keçirilməsi kimi amillər var ki, burada siyasi amillər önə çıxır, nəinki musiqi. Bu baxımdan hesab edirəm ki, Azərbaycan bu cür yarışlarda iştirak edərkən daha diqqətli olmalı, mövqeyini daha qəti şəkildə bildirməyi bacarmalıdır. Vətən müharibəsində bir çox Avropa ölkələrinin Azərbaycana qarşı tutduğu qərəzli mövqeyə şahid olmuşduq. Ona görə də bilməliydik ki, bir çox sahələrdə təxribatlar olacaq və buna hazır olmalıydıq. Nəticədə bu cür davranışlar baş verdi. Araşdırmalıyıq ki, Azərbaycana niyə təzyiq olunurmuş ki, Ukraynaya deyil, Britaniyaya səs verilsin? Və yaxud onlar bu cəsarəti haradan tapıblar? Əvvəllər də bu cür hadisələr olubmu? Digər ölkələrlə bağlı da bu cür faktlar varmı? Düşünürəm ki, bu məsələlər dəqiqləşdirilməlidir”.
Tural Abbaslı “Azərbaycan da artıq ”Avroviziya" müsabiqəsindən imtina etməlidir" fikirlərinə də mövqe bildirib: “Azərbaycan bu müsabiqədə bir dəfə qalib olub. Amma mən əminəm ki, Azərbaycan müsabiqədə qalib gəlməyəndə camaatımız sevinir. Çünki düşünürlər ki, ölkəmiz yenə də böyük xərclər etməyəcək. Ümumi götürəndə isə ölkəmizin beynəlxalq müsabiqələrdə, yarışmalarda iştirak etməsinin tərəfdarıyam. Lakin o şərtlə ki, orada özümüzü, öz mədəniyyətimizi, musiqimizi, geyim tərzimizi, bir sözlə, Azərbaycanı təmsil edək. Amma diqqət edək, müsabiqədə iştirak edənlərin orta statistik azərbaycanlı ilə nə aidiyyəti, birgəliyi var? Sanki Azərbaycan bayrağı altında hansısa amerikalı və yaxud fransız, ingilis çıxış edirmiş kimi bir görüntü yaranır. Bu baxımdan düşünürəm ki, əgər orada milli musiqimizi, mədəniyyətimiz, rəqsimizi, yaşam tərzimizi, geyimimizi təbliğ etməyəcəyiksə, həmin müsabiqədə təmsil olunmağımıza ehtiyac yoxdur. Təsəvvür edin, məsələn, bizim təmsil olunan musiqimizin sözlərini holland, musiqisini fransız, xoreoqrafiyasını italyan yaradırsa, bunun bizə nə aidiyyəti var? Ona görə də bir daha qeyd edirəm ki, əgər müsabiqədə biz özümüz olaraq təmsil olunmayacağıqsa, bu qədər pul xərcləyib, o müsabiqəyə qoşulmaq gərəkli deyil”.
“Avroviziya-2022" mahnı müsabiqəsinin Azərbaycan üzrə şərhçisi bəstəkar, ifaçı, prodüser və aparıcı Murad Arif isə baş verənlərə münasibət bildirmək istəmədiyini dedi: ”Bütün bu suallara İTV cavab verməlidir. O ki qaldı budəfəki müsabiqədəki performansımıza, Nadir Rüstəmli mənim üçün Azərbaycanın möhtəşəm səslərindən biridir. Onun timsalında bu cür gəncləri qazandığımıza görə İTV-yə minnətdaram. Bundan sonra Azərbaycanın “Avroviziya” müsabiqəsində iştirak etməsinə gəlincə, deyə bilərəm ki, ölkəmizin dünyanın bütün festival və müsabiqələrində, eləcə də idman yarışlarında iştirak etməsi çox vacibdir. Azərbaycan bundan sonra özünü, simasını, mədəniyyətini, idmanını daha da tanıtmalıdır. Biz yeni, gənc ölkəyik və dünyaya göstərəcəyimiz, deyəcəyimiz çox şeylər var. Ona görə də “bundan sonra daha bu cür müsabiqədə iştirak etməməliyik” kimi populist fikirlərdən uzaq olmalıyıq. Harada beynəlxalq yarış, müsabiqə varsa, bu, Azərbaycana lazımdır".
Xatırladaq ki, 66-cı “Avroviziya” bu il İtaliyanın Turin şəhərində keçirilib. 25 ölkənin iştirak etdiyi müsabiqənin finalında Azərbaycanı təmsil edən Nadir Rüstəmli “Fade To Black” mahnısını ifa edib. Azərbaycan 106 səs toplamaqla müsabiqədə 16-cı yerdə qərarlaşıb. Müsabiqənin builki qalibi 631 xalla Ukrayna olub.
