Dərbənddə Azərbaycan türklərinə qarşı daha bir vəhşilik törədildi
7-01-2015, 12:49
Dərbənd şəhərinin Şıxsalah qəbiristanlığında ziyarətgah olan Seyid Mirqafar ağanın qəbrinin bu gecə dağıdılması azərbaycanlılar arasında kəskin etiraza səbəb olub. Bu haqda Turan-a məlumatlı mənbələr xəbər veriblər.
Ziyarətgahın dağıdılmasını Dağıstandakı heç bir qruplaşma öz üzərinə götürməyib. Dərbənd əhalisi bu vandalizmdə vəhabiləri günahkar kimi görürlər. Amma bəziləri məsələnin arxasında siyasi çaların da olduğunu deyirlər. Onların fikrincə, bəziləri ziyarətgahı dağıtmaqla Dərbənddə milli qarşıdurma yaratmağa can atırlar.
Belə ki, azərbaycanlıların kompakt yaşadığı Dərbənd şəhərinin milliyyətcə ləzgi olan meri İmam Yarəliyev Moskvada yaşayan dərbəndli oliqarxları onu devirməyə alışmaqda ittiham edib. Bundan sonra Dərbənddə azərbaycanlılara qarşı aqressiya daha da güclənib. Faktiki olaraq Dərbənd meri ziyarətgahın dağıdılmasında azərbaycanlıların özlərini ittihama məruz qoyub.
Mənbənin dediklərinə görə, azərbaycanlıların inanc yerlərindən olan ziyarətgahı dağıdan qüvvələr xalqın etiraz edəcəyini bilirdilər. Elə bu dağıntı ilə bağlı baş verə biləcək etiraz azərbaycanlıların sıxışdırılmasına hesablanıb. Amma Dərbənddə söz sahibi olan azərbaycanlı liderlər son anda ola biləcək kütləvi aksiyaların qarşısını alıblar.
İ.Yarəliyev 2010-cu ildən Dərbənd şəhərinin meridir. Dərbənd rayonunun meri isə seçki yolu ilə seçilmiş əslən azərbaycanlı Qurban Qurbanov idi. Rəhbərlik müddəti 2015-ci ilin ortalarında başa çatmasına baxmayaraq, Dağıstan prezidenti Abdullatib Ramazanov 2014-cü ildə Q.Qurbanovu əsassız olaraq vəzifədən kənarlaşdırıb.
Q.Qurbanovun vəzifədən kənarlaşdırılmasına səbəb kimi azərbaycanlıların Azərbaycanla güclü əlaqələrinin olması, Bakıdan hərtərəfli dəstək alması göstərilir. Mənbə qeyd edir ki, R.Abdullatipov bu addımı ilə azərbaycanlıarın mövqeyini zəiflətmək, Dərbənd rayonunun təbii resurslarını qeyri-azərbaycanlılara paylamaq kimi qara niyyətini həyata keçirmək istəyir.
Geri qayıt