İşdən xəbəri olmayanlar İŞ BAŞINDA...
7-12-2023, 10:05
Hələ iki il öncə saytımızda hamının “Moskva Univermağı” kimi tanıdığı “Moskva” Ticarət Mərkəzi Qapalı Tipli Səhmdar Cəmiyyətinin (QTSC) fəaliyyətində bir sıra qanunsuzluqlar, o cümlədən külli miqdarda vergidən yayınma halları barədə redaksiyamıza daxil olmuş məlumatlar əsasında “Moskva” univermağının gəlirlərinin heç beşdən biri vergiyə cəlb olunmur” başlıqlı məqalə dərc olunmuşdu.
O vaxt Univermaqda adlarının hallanmasını istəməyən ticarətlə məşğul olan şəxslərin sözlərinə görə, zirzəmi ilə birlikdə 6 mərtəbədən ibarət binanın həyətyanı mağaza və ofislərlə birgə icarəyə verilən 11000 m2 (o cümlədən təmiz qızıl satışı altına icarəyə verilən 3600 kv2) sahəsində piştaxtalar heç bir normativlə uzlaşdırılmadan sahəsinə görə kvadrat-metrlə deyil, uzunluğuna görə metrlə icarəyə verilir ki, bu da ticarətçiləri asan aldatmaq üçündür. Piştaxtanın hər metrinə görə icarəçidən 1000 manat nağd pul alınır, hərçənd, həmin pulun icarə haqqı kimi 200-250 manatı mədaxil edilərək mühasibatlıqda rəsmiləşdirilirdi. Məlumatda qeyd olunurdu ki, 2000-2500 nəfərin işlədiyi Moskva univermağında cəmi 200 nəfərə yaxın vergi ödəyicisi var və onların da ödədikləri vergi haqqları ödəməli olduqları pulun heç beşdə birini də eləmir.
Qeyd olunurdu ki, qızıl sektorunda istehlakçılar aldadılır, məmulatların tərkibi yoxlamadan keçmədən satışa çıxarılır, bütün problar hamısı saxta yolla elə univermağın içində sexlərdə plomblanır.
Redaksiya olaraq öz növbəmizdə xatırlatmışdıq ki, “Moskva” univermağında əvvəllər qarətlər və yanğınlar baş verib və həmişə də malları oğurlanan və yanan ticarətçilər köməksiz duruma düşüb, sığorta pulunu ala bilməyiblər. Zərərçəkən mal yiyələrinin haqlı tələbləri KİV-ə çıxıb, lakin etirazlarına məhəl qoyan olmayıb.
Ticarətçilərin yanğın təhlükəsizliyinin etibarlı təmin olunmaması ilə bağlı narahatlıqlarını 14.07.2023-cü il tarixli 118 saylı məktubumuzla Azərbaycan Respublikası Fövqəladə Hallar Nazirliyinə çatdırmışdıq. Nazirliyin Tikintidə Təhlükəsizliyə Nəzarət Dövlət Agentliyi məktubumuza yalnız 4 ay sonra - 8.11.2023-cü il tarixdə cavab vermişdir: “Qaldırılan məsələ ilə əlaqədar Bakı şəhəri, Nəsimi rayonu, Cavadxan küçəsi – 5 ünvanda “Moskva Ticarət Mərkəzi” QSC-ya məxsus ticarət mərkəzinin fasad hissəsində quraşdırılmış üzlük materiallarının odadavamlılığının müəyyən ediulməsi üçün Fövqəladə Hallar Nazirliyinin Dövlət Yanğın Nəzarəti Xidmətinin əməkdaşları tərəfindən araşdırma aparılır. Agentliyin rəis müavini Zenfira Rzayeva imza atdığı cavab məktubunda izah etməmişdir ki, nəyə görə araşdırmaya 4 ay qabaq deyil, məhz indi başlanılıb.
Noyabrın 23-də “Dərnəgül” bazarında baş vermiş yanğın və onu müşayiət edən mənfi assosiasiyalar “Moskva” Univermağında ticarətlə məşğul olan şəxslərin də əndişəsini artırmışdır. Bu günlərdə onlar redaksiyamıza məktubla müraciət etmişlər. Məktubu təqdim edirik:
“Kollektiv arasında səngimək bilməyən söhbətlər onu bizə yazmağa əsas verir ki, hal-hazırki icraçı direktor Əhməd “müəllim” hətta orta məktəbi belə qurtarmayıb, onun əhatə dairəsində olan buyruq qullarından elektrik montyoru Mübariz isə orta və ya natamam orta təhsillidir, univermağın elektrik avadanlıqlarının gücünü və güc vahidini yalnız pulla ölçə bilən bir kadrdır. Təsərrüfat müdiri Mübariz Məmmədovun isə ali təhsilli qazçıxarma mühəndisi diplomu olsa da, deyilənlərə görə adı və soyadını düzgün yaza bilmir. Yanğından mühafizə müfəttişi Şaiq Niftalıyev isə FHN-i sistemindən xəstəliyi ilə əlaqədar tez-tələsik işdən pensiyaya çıxarılmış və buraya hansısa başqa “yüksək keyfiyyətinə” görə işə düzəldilmiş, hal-hazırda ticarət mərkəzində özünə dəllallıqla biznes qurmuşdur. Belə ki, hətta istismar müddətinin vaxtı keçməmiş yanğın söndürmə balonlarını biz icarəçilərə hər bir balonu ürəyi istəyən qiymətə (65-68 manata) satır. Biz onun qiymətinin şişirdildiyini irad tutduqda, “damarınıza baxıb qanınızı alıram” deyir. Faktiki olaraq, yanğından mühafizə qurğuları və avadanlıqları baxımsız vəziyyətə düşərək istismara yararsız və bərbaddır. Hər-hansı yanğın və fövqəlvəziyyət hadisələri baş verərsə, “Moskva” TM QSC-nin taleyini “Diqlas” TM-nin, “Euro HOME” TM-nin və “Dərnəgül” ticarət bazarının aqibəti gözləyir. Hətta indi onların hərəkətlərindən görürük ki, həmin bu üçlükdə polis sistemindən yaşına və boyuna görə tərxis olunmuş Mais Piriyev də var ki, biz bütün olan-olmazımızı gecə-gündüz bu dəllallara etibar edirik. Bu yaxınlarda “Dərnəgül” bazarında baş vermiş yanğına bənzər bir şey olarsa, onların hamısı Bakıdan belə yoxa çıxacaqlar.
İndi siz özünüz deyin, bizim hörmətli nazirlər, cənab Mikayıl Cabbarov, cənab Vilayət Eyvazov, cənab Kəmaləddin Heydərov, cənab Samir Şərifov, olan-olmaz sərvətimizi qızıl-zinət əşyalarına çevirib, satışdan gələn gəlirdən gəlir vergisi ödəyərək ailə-uşaqlarımızı saxlayırıq, bəs bu kimi adamlara 2000-3000 nəfərlik kollektivi hüquqi şəxs qismində təmsil edən Əhməd “müəllimə” və yanındakı qullara necə etibar etmək olar? Hətta bir həftə olar deyirlər ki, ticarət mərkəzinin axşamlar bağlanıb “mühafizə polisinə” təhvil verilməsini də Əhməd “müəllim” üçlüyü canla-başla yerinə yetirir - hansı əsasnamə, nizamnamə, əmrlərlə və görəsən nə vaxta qədər? Hətta icarəçilər arasında bunların hərəkətləri məzhəkəyə çevrilib ki, bunlara ata-anaları heç 3 baş qoyun da etibar etməzlər ki, onlar otarsın!
Bax beləcə! Hörmətli nazirlər və aidiyyəti olan yoldaşlar, bütün ümidimiz sizlərədir. Sizlərdən imdad diləyirik.
Vaxtilə ulu öndərin 1973-1978-ci illərdə inşa etdirib 1978-ci ildə özü açılışını etdiyi Bakı şəhərinin arxitektura tikintisi “Moskva” Univermağı sizlərdən imdad diləyir”.
Müəllif: İbrahim Hümbətov - Mənbə: azerinfo.info
Təqdim etdi: DİA-AZ.COM (Ərsoyun Bloqu)
Səhifəmiz bütün maraqlı tərəflərin rəyləri üçün açıqdır...
Geri qayıt