Fazil Məmmədov ölkənin məşhur brend şirkətlərini Şəmkir yoluna niyə və nə cür səpələyib?
8-01-2015, 11:08
DİA.AZ: - Burası heç də Bakının populyar mərkəzi küçəsi olan keçmiş «Torqovı» deyil. Təbii ki, bu şəkilləri görən hər kəs yanıla bilər. Kifayət qədər ciddi və məşhur brendlərin bir arada və bir səfdə dükanlarını yan-yana düzməsi mühüm bir bazarlıq ünvanının mövcudluğundan xəbər verir. Yəni müştəri bolluğu, biznes marağı olan yerlərə tanınmış şirkətlər bu cür maraq göstərə bilərlər. Normalda olanı da budur.
Amma məsələ heç də hər zaman normalda olanla ayaqlaşmır.
Təqdim etdiyimiz şəkilləri DİA.AZ olaraq Bakı-Qazax magistral yolunun Şəmkir rayonuna aid hissəsindən çəkmişik. Bəli, burası heç Şəmkir rayonunun mərkəzi də deyil.
Nə isə… Sizləri çox intizarda saxlamayaq…
Hətta bu gün bəzi iri şəhərlərimizdə belə məhz biznes maraqları baxımından filiallarını açmayan tanınmış brendlərin bu gün Bakı-Qazax yolunun Şəmkir rayonuna aid hissəsinə - yol qırağına səpələnməsi səbəbsiz deyilmiş.
Bu barədə DİA.AZ-ı bilgiləndirən məlumatlı mənbənin iddialarından belə aydın olur ki, sən demə, Şəmkir rayonuna kuratorluq edən Vergilər Naziri Fazil Məmmədovun iri vergi ödəyicisi olan tanınmış firma və şirkətlər qarşısında tələbi - filiallarının qeyd etdiyimiz ünvanda açılması olub ki, bu da hazırki mənzərənin yaranmasına gətirib çıxarıb.
Yəni faktiki olaraq ciddi müştəri qıtlığının yaşandığı bu ünvanda məşhur brendlərin filial açması yalnız və yalnız Fazil Məmmədovun zəhminin təzahürüdür. Çünki həmin dükanlarda DİA.AZ əməkdaşlarının iki günlük müşahidələri də təsdiqlədi ki, müştəri ziyarəti çox aşağı həddədir. Hətta elə şirkətlərin dükanları var idi ki, gün ərzində yalnız simvolik olaraq 1-2 saat qapılarını açıq saxlayırdı.
Bu isə o deməkdir ki, Fazil Məmmədov «Şəmkirin abadlaşdırılması» siyasətinə qeyd etdiyimiz şəkildə dəstək verdiyindən nazirin zəhmindən qorxan şirkətlər biznes maraqlarına uyğun olmasa da, artıq xərcə girmək zorunda qalıblar.
Yazıda iddia olunan məqamlarla bağlı bütün maraqlı tərəflərin mövqelərini işıqlandırmağa hazırıq…
Geri qayıt