Müdafiə naziri Zakir Həsənov Pakistana səfər əsnasında bu ölkənin ali hərbi-siyasi rəhbərliyi ilə görüşlər keçirib, mövcud münasibətlərin hazırkı durumu və gələcək perspektivini müzakirə edib.
Pakistanın Azərbaycana dəstəyi ölkəmiz üçün nə dərəcədə əhəmiyyətlidir? Azərbaycan üçün kritik məqamlarda Pakistanın dəstəyi ölkəmiz üçün həlledici əhəmiyyət kəsb edə bilərmi?
Moderator.az-a açıqlama verən politoloq Fikrət Sadıqov Pakistanın dost münasibətinin ölkəmiz üçün mühüm əhəmiyyətə malik olduğunu qeyd edib:
“Son illər baş verən proseslər göstərdi ki, bizim Pakistan kimi yaxın müttəfiqlərimiz azdır. Mən Türkiyəni nəzərdə tutmuram. Türkiyə Azərbaycana qardaş ölkədir. Pakistan Azərbaycanı beynəlxalq təşkilatlarda dəstəkləməkdədir. Islam Əməkdaşlıq Təşkilatında Azərbaycanın xeyrinə çıxarılan qərarların təşəbbüskarıdır. Habelə, Pakistan Ermənistanla diplomatik münasibətlər qurmayıb. Pakistan Azərbaycanı bütün məsələlərdə dəstəkləyir. Şübhə etmirəm ki, ən fors-major vəziyyətlərdə belə Pakistan bizim yanımızda olacaq. Bu günə qədər də Pakistan hər zaman bizim yanımızda olub. Pakistan həm siyasi, həm də hərbi əməkdaşlıq baxımından ölkəmizin yanındadır. Ölkələrimiz arasında iqtisadi münasibətlər də inkişaf etməkdədir. Pakistan rəhbərliyində kimin olmasından asılı olmayaraq, bu ölkə hər zaman Azərbaycanı dəstəkləyəcək”.
