"Biz elə şəxsləri müdafiə etmişik ki, ömrü boyu müxalifətə düşmən kəsiliblər"
27-08-2016, 09:25
Azadlığa çıxmasına az müddət qalan sabiq səhiyyə naziri Əli İnsanov barəsində yeni cinayət işi başlaması ətrafında söz-söhbətlər səngimək bilmir. Məhbus həyatı ilə vidalaşacağı son 57 günü sayan sabiq nazirin qəflətən belə halla üzləşməsi ilə bağlı çoxsaylı müəmmalar var...
Əsas suallardan biri də 11 illik cəzadan sonra keçmiş nazirin indi neçə il cəza alacağı ilə bağlıdır. Hüquqşünas Müzəffər Baxış İnsanovun üç maddə üzrə ən yuxarı həddə 10 il 6 ay cəza ala biləcəyini bildirdi: “Ona qarşı irəli sürülən maddələr (234.1-ci maddə - satış məqsədi olmadan qanunsuz olaraq narkotik vasitələri şəxsi istehlak miqdarından artıq miqdarda əldə etmə, saxlama; 315.2-ci maddə hakimiyyət nümayəndəsinə qarşı müqavimət göstərmə və zor tətbiqetmə 317-2.1-ci - cəzaçəkmə müəssisələrində qadağan olunmuş əşyaların hazırlanması, saxlanılması, gəzdirilməsi və istifadəsi) üzrə ən yuxarı həddə cəza verilsə, toplanma yolu ilə İnsanov 10 il 6 ay müddətində azadlıqdan məhrum edilə bilər. Bundan artıq cəza ola bilməz.
Hesab edirəm ki, İnsanov o cinayətlərin heç birini törətməyib. Ona qarşı irəli sürülən ittihamlar əsassızdır. Bunun mahiyyəti ondan ibarətdir ki, Əli İnsanovdan qisas alırlar. Avropa Məhkəməsinin qərarı var ki, əgər cəzaçəkmə müəssisələrinə narkotik maddələr keçirilirsə, burada rəhbərlik məsuliyyət daşıyır. Çünki ora qapalı yer sayılır”.
Bir maraqlı məqam da müxalifət partiyalarının Əli İnsanovu ciddi-cəhdlə müdafiə etməsidir. Nazir olduğu dönəmlərdə İnsanov ən sərt şəkildə tənqid, təhqir etdiyi müxalifət bu gün onun müdafiəsindədir...
Doğrudur, məhkəməsi zamanı İnsanov bu fikirlərinə görə müxalifətdən üzr istəyib. Amma müxalifətin onu müdafiə etməsi ilə bağlı fikirlər birmənalı deyil. Çoxları düşünür ki, demokratik düşərgə daxilində İnsanovun gücünə, maddi imkanlarına sahib olmaq üçün qızğın mübarizə gedir. Buna görə siyasi partiyalar ona yaxın olmaq üçün dəridən-qabıqdan çıxırlar. Müxalifətin onu müdafiə etməsi ilə bağlı digər bir versiya isə İnsanovun məhbus olması və hakimiyyətə qarşı barışmaz sərt münasibəti ilə bağlıdır...
Ümid Partiyasının sədri İqbal Ağazadə müxalifətin İnsanovla bağlı qətiyyətli mövqeyinə bu cür aydınlıq gətirdi: “Burada prinsiplərdən söhbət gedir, şəxslərdən yox. Şəxslərin məsələsi şəxsən mənim üçün sonuncu bir məsələdir. Amma prinsiplər məsələsi var ki, burada haqqı tapdalanan, yaxud qanunsuzluqla üzləşən kim olursa-olsun, mövqeyimizdən asılı olmayaraq, onu müdafiə etməliyik. Biz elə şəxsləri müdafiə etmişik ki, ömrü boyu müxalifətə düşmən kəsiliblər. Bu məsələni şəxsiləşdirmək lazım deyil”.
Böyük Quruluş Partiyasının sədri, deputat Fazil Mustafa fərqli düşünür: “Burada daha çox onun elektorat bazasından müəyyən dərəcədə istifadə etmək, Qərbi azərbaycanlıların rəğbətini qazanmaq üçün belə taktika seçilir. Mahiyyətcə hakimiyyətdə təmsil olduğu dönəmlərdə müxalifətə qarşı sərt, barışmaz məmurlardan biri İnsanov idi. Onun fikirləri, addımları müəyyən vaxtlarda hakimiyyətlə müxalifət arasında normal münasibətlərin qurulmasına mane olurdu. İndiki şəraitdə bu dəstək onun elektoratını qazanmaq, yaxud dəstəyini almaq üçün nəzərdə tutula bilər”.
Yeni AXCP-nin sədri Razi Nurullayev bəzi müxalif qurumların İnsanovu müdafiə etmələrinin arxasında müəyyən niyyətlərin dayandığını söylədi: “Öncə İnsanova azadlıq arzulayıram. Düşünürəm ki, o, həm yaşına, həm əməyinə, həm də xidmətlərinə görə azadlığına qovuşmalıdır. İnsanov hakimiyyətdə təmsil olunan vaxt müxalifətə qarşı ən sərt mövqedə dayanan məmurlardan biri olub. Bu gün onun müxalifət tərəfindən daha çox müdafiə edilməsinin başlıca səbəbi müxalifətdən də qabağa gedərək, hakimiyyət barəsində sərt fikirlər səsləndirməsidir. Onunla müxalifətin mövqeyi üst-üstə düşdüyünə görə biz onu müdafiə edirik. Özümlə bağlı deyə bilərəm ki, onu müdafiə etməkdə səmimiyəm. Heç bir gözləntim, təmənnam yoxdur. Vaxtı ilə İnsanov və digər məmurlara qarşı sərt təpki göstərən müxalifət hakimiyyətdə olub, sonradan hakimiyyətdən gedəndən sonra müxalifətə müraciət edən şəxsləri qəbul etməyiblər. Əli Kərimli və Müsavatı buraya aid etmək olar. İndi həmin şəxslər İnsanovla bağlı fərqli mövqe sərgiləyirlər. Bunun üçün onların səmimiyyətinə tam inanmıram. Burada kifayət qədər siyasi maraqlar var. Əli İnsanov azadlığına qovuşarsa, özü bir siyasi partiya yaradarsa, müxalifətdə liderlik iddiasına düşərsə, o zaman həmin insanların düşməninə çevriləcək, onu söyəcəklər, xəyanətdə suçlayacaqlar. Məhz bunlara görə İnsanova göstərilən münasibətin arxasında səmimiyyətin olduğuna inanmıram. Azərbaycan müxalifətini əlimin içi kimi tanıyıram. Onların iddialarını, maraqlarını, potensiallarını bilərək, deyirəm ki, ölərlər, amma İnsanovun liderliyini qəbul etməzlər. Əksinə, İnsanovun onlara kömək etməsini arzulayarlar. O, bunu istəməsə, satqın olacaq, hakimiyyətə satılmış elan olunacaq. Çünki bu, onların xislətidir, dəfələrlə sınaqdan keçirilmiş metodları sayılır”.
Musavat.com
Geri qayıt