İsa Qəmbər Müsavata başqan qayıdarsa...
20-04-2019, 10:14
Müsavat Partiyasının qurultayının vaxtı çatması bu partiyanın növbəti başqanının kim olacağı məsələsi ətrafında müzakirələrə yol açıb. Sosial şəbəkədə İsa Qəmbərin Müsavat Partiyası başqanlığına qayıtmasının vacibliyi məsələsi müzakirə edilməyə başlanıb. Bir sıra müsavatçılar və aktiv sosial şəbəkə iştirakçıları yazırlar ki, İsa Qəmbər başqan olsa onun gedişindən sonra Müsavat Partiyasından çıxanların və çıxarılanların bir çoxu geri qayıda bilər.
Həmin sabiq müsavatçıların bir neçəsi ilə əlaqə saxlayıb İsa Qəmbər başqanlığa qayıtmasını gözləyin-gözləmədiklərini, İsa Qəmbər başqan olarsa Müsavata qayıdıb-qayıtmayacaqlarını xəbər aldıq. Müsavat Partiyasının sabiq divan üzvü, Azərbaycan Demokratiya və Rifah Hərəkatının sədri Qubad İbadoğlu bildirdi ki, partiyaya geri dönməyi düşünmür: “2014-cü ilin seçkilərindən sonra da Müsavat Partiyasının önəmli qərarları, o sıradan bizim partiyadan uzaqlaşdırılmağa dair qanunsuz qərarlar nəinki İsa Qəmbərlə razılaşdırılaraq verilib, birmənalı şəkildə onun təşəbbüsü ilə hazırlanıb və icra olunub. Həmin dövrdən indiyə qədər partiya İsa Qəmbərin idarəçiliyində və nəzarətində olub. Odur ki, yenidən onun sədr seçilməsi nəyisə dəyişməyəcək. Müsavata ilk növbədə partiyadaxili demokratiya, şəffaf idarəetmə və səmimi mühit lazımdır. İsa Qəmbər onu orda bərpa edəcək şəxslər arasında yoxdur”.
Müsavat Gənclər Təşkilatının sabiq sədri, AĞ Partiyanın sədri Tural Abbaslı bildirdi ki, İsa Qəmbər partiya başqanlığına qayıdarsa partiyada vəziyyətin nisbətən düzələcəyi, ancaq, əvvəlki gücünə qovuşa bilməyəcəyini düşünür: “Müsavat Partiyasının hazırkı durumu 1992-ci il bərpasından bu yana ən ağır və acınacaqlı vəziyyətdədir. Mən ümumiyyətlə, digər partiyaların təftişinin prinsip olaraq əleyhinəyəm. Ancaq sizə də məlum olduğu kimi siyasi fəaliyyətimin böyük qismini bu partiyada keçirdiyim üçün və bu partiya ilə hələ də mənəvi bağlarım qaldığı üçün fikir bildirirəm. Hesab edirəm ki, Müsavatın hazırkı rəhbərliyinin gözləniləndən də bərbad vəziyyətdə idarəçiliyi sayəsində tarixi bir partiya ən acınacaqlı günlərini yaşayır. Ancaq bu onların seçimi və özlərinin biləcəyi işdir.
İsa Qəmbər partiya başqanlığına qayıdarsa vəziyyətin nisbətən düzələcəyini, ancaq əvvəlki gücünə qovuşa bilməyəcəyini düşünürəm. Müsavatda kəskin şəkildə yeni nəfəs və yeni qan çatışmazlığı var. Odur ki, vəziyyət bir seçkiylə düzələ bilməz. İsa Qəmbər başqan olarsa mən geri qayıdarammı sualınıza isə birmənalı şəkildə “xeyr” demək məcburiyyətindəyəm. Çünki bu mərhələ bizim üçün artıq keçilmiş bir mərhələdir və bizim belə bir addımımız geriyə addım olar. İstənilən halda mən zamanında illərimi və gəncliyimi verdiyim Müsavat Partiyasına uğurlar arzulayır, əsl sadiq müsavatçılara da əzmli olmağı diləyirəm".
Müsavat Qadınlar Təşkilatının sabiq sədri, Azərbaycan Demokratiya və Rifah Hərəkatının sədr müavini Ellada Məmmədlinin isə cavabı belə oldu: “Əslində bu suala cavab vermək istəməzdim. Amma Müsavata qayıdış məsələsinə toxunduğunuz üçün cavab verirəm. Mən və yaxın dostlarım müsavatçılıq ideologiyası ilə yaşayan və onu təbliğ edənlərik. Həyatımı müsavatçılıq ideologiyasına söykənərək-xalqın azadlığı, mənafeyi, rifahı yolunda mübarizəyə həsr etmişəm. Odur ki, indi ADR Hərəkatındakı fəaliyyətimdən çox məmnunam və Müsavat Partiyasına qayıtmaq haqqında heç düşünmürəm”.
Müsavat Divanının sabiq üzvü, Azərbaycan Demokratiya və Rifah Hərəkatının sədr müavini Adil Qeybulla isə bildirdi ki, İsa Qəmbərin başqan postuna qayıdacağını düşünmür: “İsa Qəmbər yenidən başqan vəzifəsinə qayıtsa bu, siyasi riyakarlıq olar. Bir dəfə bu məsələ Müsavat Divanında müzakirəyə qoyulmuşdu. Həmin müzakirədə İsa Qəmbər şəxsən özü dedi ki, onun başqan vəzifəsinə geri dönməsi tərəfindən yol verilən siyasi riyakarlıq olar. Bu baxımdan inanmıram ki, İsa bəy başqan vəzifəsinə qayıtmağa razı olsun. İkincisi, Müsavatın qurultayı və İsa Qəmbərin başqan vəzifəsindən gedişi demokratiya nümunəsi olaraq bəyan edilmişdi. İndi İsa Qəmbər geri dönsə bu deyilənləri də şübhə altına alar. Məncə, hətta İsa Qəmbər başqan qayıtsa da Müsavat Partiyası bundan sonra əvvəlki gücünü tam bərpa edə bilməz. Burada səbəb təkcə partiyada və partiyaya rəhbərlikdə deyil, səbəb cəmiyyətdədir, cəmiyyətin mövqeyindədir. Düşünürəm ki, Müsavatın növbəti qurultayı olacaq və kimsə başqan seçiləcək. Seçiləcək şəxsə isə uğur diləyirik. Biz Demokratiya və Rifah Hərəkatını dirçəltmək, gücləndirmək, böyütməklə məşğuluq və başqa yerə getmək fikrimiz də yoxdur”.
Müsavat Məclisinin keçmiş üzvü, AĞ Partiyanın sədr müavini Əhəd Məmmədli də keçmişdə üzvü olduğu partiyaya qayıtmaq niyyətində olmadığını dedi: “Mən o dəftəri çoxdan qapatmışam. Keçmişim və keçmişimdə nə baş verir məni maraqlandırmır. Bu günümü və sabahımı AĞ Partiya ilə bağlamışam”.
“Yeni Müsavat”
Geri qayıt