"Çalışır ki, növbəti dəfə ölkəmizə qarşı şər-böhtan atsın"
14-12-2019, 10:00
Növbədənkənar parlament seçkilərinə start verildiyi gündən ölkədə çoxlu sayda siyasi partiyalar, ictimai xadimlər, ayrı-ayrı tanınmış insanlar, gənclər seçkilərdə iştirak etmək arzularını bəyan edirlər. Təbii ki, bütün bunlar onu göstərir ki, ölkədə ötən seçkilərdə olduğu kimi, növbədənkənar parlament seçkiləri də şəffaf, demokratik keçiriləcək.
Bunu Trend-ə deputat Cavid Osmanov deyib.
C.Osmanov bildirib ki, istənilən siyasi partiyanın, istənilən vətəndaşın bu seçkilərdə iştirak etmək hüququ var: “Ölkədə fəaliyyət göstərən 50 siyasi partiyadan 40-dan çoxu, eyni zamanda çoxlu sayda insan seçkilərdə işriak etmək istəklərini bəyan edirlər. Ancaq bütün bunlarla yanaşı, heç bir elektoratı olmayan, ətrafında heç bir insan birləşməyən, küçə fəaliyyəti ilə məşğul olan “Milli Şura” adlı bir qurum çalışır ki, növbəti dəfə ölkəmizə qarşı şər-böhtan atsın. Guya ki, bunlar seçkilərə qatılmasalar, seçkilər qeyri-demokratik keçəcək. Təbii ki, bu, əvvəla onu göstərir ki, bu admaların absurd fikirlər səsləndirməkdən başqa işləri yoxdur. Bu radikalların sosial bazaları, namizəd kimi irəli sürə biləcəyi adamlar olmadığından, xalq tərəfindən dəstəklənmədikləri üçün çalışırlar ki, belə absurd bəyanatlar səsləndirməklə ölkədə gedən müsbət proseslərə, o cümlədən növbədənkənar seçkilərə kölgə salsınlar.
Onlar yığışdığı mitinqlərdə hər zaman uca səslə qışqırırdılar ki, parlament buraxılsın, növbədənkənar seçkilər keçirilsin, amma iş məqama çatanda gördülər ki, Azərbaycan xalqı onlara dəstək verməyəcək və ona görə də çalışırlar ki, özlərinin uğursuzluqlarını bu yolla ört-basdır etsinlər".
Deputat əlavə edib ki, xalq tərəfindən heç bir dəstəyi olmayan qurama bir təşkilatın seçkilərə hansı təsiri ola bilər? Onlar heç bir namizəd tapıb irəli sürə bilmirlər, amma öz ağıllarınca seçkiləri boykot edirlər, iki-üç nəfərdən “qəhrəman” obrazı yaratmağa çalışırlar. Amma Azərbaycan xalqı bunların iç üzünü, hansı məqsədlərə xidmət etdiyini yaxşı bilir və ona görə də bu adamlara heç bir dəstək göstərmir”.
Qeyd edək ki, gələn il fevral ayının 9-da Azərbaycanda növbədənkənar parlament seçkiləri keçiriləcək. Özünü demokratik qüvvələrin "Milli Şura"sı adlandıran kiçik bir müxalif kəsim isə seçkilərdə iştirak etməməklə bağlı "boykot" çağırışı edir.
Geri qayıt