Bakıda "SÜS mobil” MMC maxinasiyaları
28-06-2016, 09:45
"SÜS mobil” MMC-nin qanunsuz fəaliyyətində seçdiyi əsas hədəf orduda xidmət göstərən əsgər və hərbiçilərimizdir. "SÜS mobil” MMC-nin hədəfinə tuş gələn zərərçəkənlərdən biri də mənim oğlum müddətdən artıq hərbi xidmət edən əsgər Bağırov Elvin Saleh oğludur. Belə ki, müxtəlif yerlərdə hərbi hissələrin əsgərlərini şirinikdirərək cəlb edir və aldadaraq məzmunundan xəbərsiz olduqları nisyə alqı-satqı müqaviləsi ilə dəyərindən dörd-beş dəfə yüksək qiymətə bir ədəd əşya (noutbuq və ya mobil telefon) satır. Bir neçə ay keçdikdən sonra isə ödənişləri geçikdirməsi bəhanəsi ilə həmin əsgərlərə qarşı məhkəmədə borc tələbinə dair iddia qaldırır". Bu sözlər zərərçəkmiş Bağırov Elvin Saleh oğlunun atası Bağırov Salehin Xeber.İnfo-a göndərdiyi məktubda əks olunub. Həmin məktubu olduğu kimi təqdim edirik:
"Azərbaycan Respublikasının Prezidenti cənab İlham Əliyevə
Surəti: Azərbaycan Respublikasının Məhkəmə-Hüquq Şurasının sədri Cənab Fikrət Məmmədova
Surəti: Azərbaycan Respublikasının Vergilər Naziri cənab Fazil Məmmədova
Surəti: Azərbaycan Respublikasının Baş Prokuroru Yanında Koorupsiyaya qarşı Mübarizə Baş İdarəsinin rəisi cənab Kamran Əliyev
Surəti: Bakı şəhəri Xətai Rayon Məhkəməsinə
Gəncə şəhəri, İ.Məmmədov küç. I dön. ev 95 ünvanında yaşayan əsgər atası Bağırov Saleh Ağa oğlu tərəfindən tel: (055) 820 44 92
Ə R İ Z Ə
Hörmətli cənab prezident! Mən, bir əsgər atası olaraq Sizə müraciət edirəm. Bildirirəm ki, mən, övladımın Azərbaycan ordusunda xidmət etməsindən qürur duyuram və övladımın əsgər olmasından asılı olmayaraq düşünürəm ki, ordumuza və əsgərlərimizə dəstək olmaq hər bir azərbaycanlının vətəndaşlıq borcu olmalıdır. Təəssüf ki, bəzi üzdəniraq şəxslər var ki, nəinki əsgərlərimizə dəstək olmur, əksinə məqsədyönlü olaraq, mütəşəkkil qaydada, kütləvi şəkildə əsgərlərimizi və hərbiçilərimizi aldadaraq saxta sənədlərlə borca salır və sonradan pul tələbi ilə iddia qaldıraraq məhkəmələrdə süründürür, əsgərin canı, qanı bahasına qazandığı pulu şər, böhtanla əlindən alırlar. Belə şəxslərdən biri də mobil telefonların və elektronika avadanlıqlarının satışı ilə məşğul olan "SÜS mobil” MMC adı ilə qeydə alınmış hüquqi şəxsdir. Qeyd etmək istəyirəm ki, "SÜS mobil” MMC 2012-ci ildə təsis edilmiş və 2013-cü ildə VÖEN-ni bağlatdıraraq fəaliyyətini rəsmi qaydada dayandırmışdır. VÖEN-nin bağlı olmasına baxmayaraq "SÜS mobil” MMC fəaliyyətini qanunsuz olaraq davam etdirmiş və guya "STAR GSM” mağazalar şəbəkəsinin tərkibində fəaliyyət göstərdiyini bildirmişdir. Vergilər Nazirliyi yanında Bakı Vergilər Departamentinin Kommersiya Hüquqi Şəxslərin Dövlət Qeydiyyatı İdarəsindən verilən rəsmi məlumata əsasən "Star GSM” mağazalar şəbəkəsi ilə "SÜS mobil” MMC arasında hüquqi bağlılığı təsdiq edən heç bir sənəd aşkar edilməmişdir. Göründüyü kimi "SÜS mobil” MMC uzun müddət açıq-aşkar fəaliyyət göstərərək külli miqdar gəlir əldə etməsinə baxmayaraq qanunsuz olaraq vergi ödəməkdən yayınmaqla təkcə vətəndaşları deyil, dövləti də aldatmışdır. "SÜS mobil” MMC-nin qanunsuz fəaliyyətində seçdiyi əsas hədəf orduda xidmət göstərən əsgər və hərbiçilərimizdir. "SÜS mobil” MMC-nin hədəfinə tuş gələn zərərçəkənlərdən biri də mənim oğlum müddətdən artıq hərbi xidmət edən əsgər Bağırov Elvin Saleh oğludur. Belə ki, müxtəlif yerlərdə hərbi hissələrin əsgərlərini şirinikdirərək cəlb edir və aldadaraq məzmunundan xəbərsiz olduqları nisyə alqı-satqı müqaviləsi ilə dəyərindən dörd-beş dəfə yüksək qiymətə bir ədəd əşya (noutbuq və ya mobil telefon) satır. Bir neçə ay keçdikdən sonra isə ödənişləri geçikdirməsi bəhanəsi ilə həmin əsgərlərə qarşı məhkəmədə borc tələbinə dair iddia qaldırır. "SÜS mobil” MMC öz qanunsuz hərəkətlərini daha əlverişli və rahat yolla həyata keçirmək üçün nisyə alqı-satqı müqaviləsinə imperativ normalara zidd olaraq qondarma bir bənd əlavə etmiş və həmin maddəyə əsasən tərəflər arasında mübahisəyə "SÜS mobil” MMC-nin hüquqi ünvanının yerləşdiyi ərazinin məhkəməsində baxıla bilər. Müqavilənin qeyd olunan bəndi Mülki Prosessual Məcəllənin 40.3-cü maddəsinə ziddir, həmin maddənin tələbinə əsasən tərəflər arasında saziş yalnız o zaman ola bilər ki, o, müəyyən məhkəmə işinə və ya mübahisəsinə əsaslanmış olsun. Yəni hələ nisyə alqı-satqı müqaviləsi bağlanan zaman tərəflər arasında hər hansı mübahisə olmadığı üçün həmin vaxt müqavilədə həmin bəndin göstərilməsi tamamilə qanuna ziddir. Mülki Prosessual Məcəllənin 35.1-ci maddəsinə əsasən "SÜS mobil” MMC iddianı cavabdehin rəsmi qeydə alındığı yerin məhkəməsində qaldırmalı idi. Hazırda Xətai Rayon Məhkəməsində "SÜS mobil” MMC tərəfindən hərbiçilərə və əsgərlərimizə qarşı borc tələbinə dair çoxsaylı məhkəmə iddiaları qaldırılıb. Təəssüf ki, "SÜS mobil” MMC-nin qaldırdığı çoxsaylı iddiaların ərazi aidiyyatı qaydalarına zidd olmasına baxmayaraq Xətai Rayon Məhkəməsində icraata qəbul edilərək baxılır. Biz, məhkəmədə vəsatət verərək məhkəmə işinin ərazi aidiyyatına uyğun olaraq cavabdehin qeydiyyat yerinə uyğun Gəncə şəhərinə göndərilməsini xahiş etsək də məhkəmə vəsatəti təmin etməmişdir. Ümumiyyətlə, Xətai Rayon Məhkəməsi "SÜS mobil” MMC-nin qaldırdığı iddialarda birtərəfli mövqe tutur və açıq-aşkar "SÜS mobil” MMC-nin mövqeyini dəstəkləyir. Belə ki, "SÜS mobil” MMC əvvəl məhkəməyə ərizə ilə müraciət edərək oğlum Bağrov Elvin Saleh oğluna qarşı borcun ödənilməsinə dair məhkəmə əmrinin verilməsini xahiş etmişdir. Ərizədə kifayət qədər mübahisəli, ziddiyyətli və araşdırılmalı məqamların olmasına baxmayaraq Xətai Rayon Məhkəməsinin hakimi Raziyya Ataşova heç bir araşdırma aparmadan borcun ödənilməsinə dair əmr vermişdir (əmrin surəti əlavə edilir). Biz, məhkəmə əmrinə etiraz yazdıqdan sonra əmr ləğv edilmiş və iş araşdırılmaq üçün iddia icraatına keçirilmişdir. Belə çıxır ki, əgər biz, məhkəmənin mövcud prosessual qaydalarını bilməsək, vaxtında etiraz verməsəydik heç bir araşdırma aparılmadan qüvvəyə minmiş məhkəmə əmri icra edilməli və əsassız olaraq pul borcludan məcburi qaydada tutulmalı idi. Biz, qanunun tələbinə uyğun olaraq, işin daha obyektiv və ədalətli araşdırılması, həqiqətin üzə çıxarılması naminə məhkəmədə yaşayış ünvanları və xidmət göstərədiyi yerlər tamamilə fərqli olan, bir-birlərini tanımayan əsgərlərimizə qarşı eyni zamanda qaldırılan oxşar iddiaların birləşdirilərək birgə baxılması barədə vəsatət vermişik (bir neçə müqavilələrin və müqaviləyə əlavə edilən sənədlərin surəti nümunə üçün əlavə edilir). Təəssüf ki, hakim R.Ataşova mübahisədə həqiqətin üzə çıxarılması üçün tamamilə əverişli fürsət sayıla biləcək zəruri vəsatəti heç bir əsas olmadan təmin etməyib. Bundan əlavə alqı-satqı müqaviləsinin bağlandığı dövrdə "SÜS mobil” MMC-nin fəaliyyətinin aktiv olub-olmaması haqqında Vergilər Departamentinə sorğunun göndərilməsi barədə vəsatətimiz məhkəmədə rəsmi qaydada təmin edilsə də sonradan icra edilməmişdir. Ümumiyyətlə iş üçün əhəmiyyətli çoxsaylı vəsatətlərimizdən bəziləri təmin edilməmiş, bəziləri baxılmamış saxlanılmış (vəsatət əsaslıdırsa təmin edilməli, əsassızdırsa rədd edilməlidir, hakimin vəsatəti baxılmamış saxlamasının nə anlam daşıdığı bəlli deyil), bəziləri isə təmin edilsə də icra edilməmişdir. Nisyə alqı-satqı müqaviləsində, "SÜS mobil” MMC-nin məhkəməyə təqdim etdiyi ərizədə və məhkəmə əmrində borcluya yalnız bir əşyanın (mobil telefonun) satıldığı bildirilsə də, sonradan satılan əşyaların sayını artıraraq beş əşya göstəriblər və bu barədə işə ayrıca qaimə əlavə ediblər. Əgər beş əşya satılmışdısa nə üçün müqavilədə, məhkəməyə verilən ərizədə və məhkəmə əmrində borcluya cəmi bir əşyanın satıldığı göstərilib. Müqavilədəki əşyanın qiymətinin real bazar qiymətindən beşqat artıq göstərilməsi, satıcının malın üzərinə əlavə faiz qoymaqla qanunsuz və icazəsiz kredit fəaliyyəti göstərdiyini təsdiq etmiş olur. Buna görə sonradan əlavə edilən qaimə ilə həmin pul bir neçə əşya arasında bölüşdürüıüb. "SÜS mobil” MMC adi bir satış mağazası olmaqla malların satışını qanunun tələbinə uyğun olaraq manatla aparmalıdır. Azərbaycan Respublikası Konstitusiyasının 19-cu maddəsinin üçüncü hissəsinə əsasən Azərbaycan Respublikasının ərazisində manatdan başqa pul vahidlərinin ödəniş vasitəsi kimi işlədilməsi qadağandır. Valyuta Tənzimi haqqında AR qanunun 3-cü maddəsinin 2-ci bəndinə əsasən Azərbaycan Respublikasında xarici valyutanın alınması və satılması Azərbaycan Respublikası Mərkəzi Bankının müəyyən etdiyi qaydada müvəkkil banklar vasitəsi ilə həyata keçirilir. Müvəkkil bankların iştirakı olmadan xarici valyutanın alınması və satılmasına icazə verilmir. Həmin qanunun 3-cü maddəsinin 3-cü bəndinə əsasən bu maddənin 1-ci və 2-ci bəndlərinin müddəalarını pozmaqla bağlanan xarici valyutanın alğı-satqısı əqdləri etibarsız sayılır. Nisyə alqı-satqı müqaviləsində qiymət dollarla göstərilib və ilkin ödəniş də dollarla qəbul edilib, yəni malın satışı dollarla aparılıb. Təkcə bu fakt alqı-satqı müqaviləsinin ləğv edilməsi üçün yetərlidir. Biz, məhkəmədə qarşılıqlı iddia qaldıraraq nisyə alqı-satqı müqaviləsinin ləğv edilməsi barədə iddia qaldırmışıq. Mənim oğlum həmin mağazadan yalnız bir əşya – noutbuq alıb və həmin əşyanın dəyərini də ödəməyə hazırdır. Xətai Rayon Məhkəməsində əsgər və hərbiçilərimizi arxadan zərbə vurmaqla təhdid edən "SÜS mobil” MMC mifinə nəhayət son qoyulmalıdır. Əks halda "SÜS mobil” MMC bundan sonra da qanunsuz əməllərini davam etdirəcəkdir. Hörmətli cənab prezident! Yuxarıda göstərilənləri nəzərə alaraq Sizdən "SÜS mobil” MMC adlı mağazanın dələduzluq və qanunsuz vergidən yayınma hərəkətlərinin qarşısının alınması və Xətai Rayon Məhkəməsində əsgərlərimizə qarşı qaldırdığı qərəzli məhkəmə işlərinin nəzarətə götürülməsi barədə göstəriş verməyinizi xahiş edirəm. Qoşma: 1. Bakı VD Kommersiya Hüquqi Şəxslərin Dövlət Qeydiyyatı İdarəsindən verilən məktub; 2. Məhkəmə əmrinin surəti; 3. Alqı-satqı müqavilələri və ona əlavə edilmiş sənədlərin surətləri.
İmza: Bağırov Saleh Ağa oğlu 14 iyun 2016-cı il"
Geri qayıt