““Gilan Orchard” şirkəti məzuniyyət pulumuzu ödəmir”
22-05-2021, 10:00
İki Göyçay sakini “Gilan Holding”in “Gilan Orchard” şirkətindən məzuniyyət pulunu ala bilmədiklərindən şikayətçidir.
Rayonun Qarabaqqal kənd sakini Namiq Eyvazov deyir ki, onu həm işdən çıxarıblar, həm də son aylarının əmək haqqını və təzminatını ödəməyiblər. Üstəlik, şirkətlə bağladıqları sonuncu müqavilənin sürətini də ala bilməyib:
“Mən tək atayam, yoldaşım rəhmətə gedib, körpə, 5 yaşlı övladım mənim öhdəmdədir. İndi bir tərəfdən də işsiz qalmışam və təzminatımı ala bilmirəm. Mənim ildə 42 gün məzuniyyətim var idi. Toplanmış məzuniyyətlərimin pulunu ödəsəydilər, azı 2500 manat olacaqdı. Bununla xeyli problemimi həll edə bilərdim, ancaq vermirlər”.
Namiq Eyvazov 2012-ci ildən şirkətdə aqronom olaraq çalışıb. Deyir, daha çox meyvəçiliklə məşğul olub, nar yetişdirib:
“Az idi, çox idi, bir əmək haqqı alır, dolanırdıq. 2017-ci ildə yığdılar bizi ofisə və boş kağıza qol çəkdirdilər. Bununla bir şirkətdən işdən çıxdıq, ancaq işimizi görməyə, əmək haqqı almağa davam etdik. Bir neçə ildən sonra başqa bir şirkətə işə qəbul etdilər. Bundan da 3 il sonra ixtisara düşdük. Yenə eyni üsulla. Boş kağıza qol çəkdik, amma bu dəfə birdəfəlik işimizə son verildi. Ancaq bu zaman da yığılıb qalan əmək haqqımızı, məzuniyyət pulumuzu vermədilər. Keçmiş illərin hesabatını 2-3 nəfər tələb etdi, qalanları susdu”.
Namiq Eyvazov deyir ki, pandemiya dövrü işdən çıxarılmağı da qanunsuzdur:
“Halbuki prezidentin bu dövrdə kimsəni işdən çıxarmamaqla bağlı tapşırığı var idi, heç nəyə baxmadılar. Sonradan da hara müraciət etdik, cavab ala bilmədik”.
Fuad Seyidov isə “Gilan Holding”də təchizatçı işləyib. O da işdən çıxarılıb və toplanan məzuniyyətlərinin haqqını ala bilməyib. Deyir, şirkətin ona 3200 manata yaxın verəcəyi var. Fuad Seyidov lap başdan, şirkətin necə yaranmasından və işlədikləri müddətdə qarşılaşdıqları çətinliklərdən danışıb:
“2007-ci ildə Şirvan Meyvəçilik Mərkəzi yarandı. Mayın 1-dən orda işə qəbul oldum. O vaxt heç kimlə müqavilə bağlanmırdı. 2012-ci ilə qədər qeyri-rəsmi işlədik. Ondan sonra şirkətin adını dəyişib MNK etdilər. 23-24 nəfərlə müqavilə bağladılar. Bizimlə yenə müqavilə bağlamadılar. Buna da heç nə deyə bilmədik. Çünki işsiz qalmaq təhlükəsi var idi və indiki dövrdə bilirsiz, iş tapmaq asan deyil”.
Şikayətçi deyir ki, düz 2017-ci ilədək qeyri-rəsmi şəkildə işləyiblər. Sonra bütün işçilərlə müqavilə bağlanıb:
“Sonrakı 3 ili müqavilə ilə işlədim. Ancaq pandemiya yeni yayılanda, 2020-ci il aprelin 30-da bizi işdən azad etdilər. Bizə 2017-ci ildən bu yana olan 3 ilin konpensasiyasını verdilər, qalanını hesablamadılar. Bir sözlə, 10 ilimiz batdı. 13 il mən müqaviləsiz də olsa, işləmişəm və heç vaxt məzuniyyətə çıxmamışam. Məzuniyyətə çıxmamaq da öz seçimim olmayıb, işdən izin verməyiblər. Kənd təsərrüfatı sahəsində daim işdə olmaq lazım olur və “məzuniyyətə çıxma, pulunu alarsan”, - deyirlər. Sənin də başqa çarən qalmır”.
Şikayətçilər məzuniyyətə çıxmadıqları müddətin haqq-hesabını istəyirlər, şirkət rəhbərliyinin isə onların bu istəyinə əməl etmədiyini söyləyirlər. Zənglərini açmır, onlarla görüşmürlər:
“Nə zaman müqavilə tələb etdik “işdən çıxararıq” – hədəsi ilə üzləşdik. Məcbur qalıb səsimizi çıxarmadıq. Elə buna görə də 10 ilimizin məzuniyyət haqqımızı kəsdilər. Azmış kimi ən pis zamanda bizi işsiz qoydular, haqqımızı yedilər, pulumuzu tam vermədilər. Mən orda işləyəndə günün altında qalmaqdan 2 dəfə insult keçirmişəm, bir də gözümün görməsinin 60 faizini itirmişəm. Bunları da nəzərə almırlar. Adamı sonda boş kağız kimi çölə atmazlar ki...”, - Fuad Seyidov əlavə edir.
Şikayətçilər Ombudsman Aparatına, Prezident Administrasiyasına, Vitse Prezident Mehriban Əliyevaya məktublar göndəriblər. Hələlik, bir cavab almayıblar.
Bir neçə ildir ki, Göyçayda “Gilan Holding”in “Gilan Orchard” şirkətindən işdən çıxarılanlar narazılıq edir. Onlar işdən çıxarılarkən məzuniyyət pullarının verilmədiyini söyləyirlər.
Daha öncə də Meydan TV-yə bu şirkətdə çalışmış, işdən çıxarılmış, maaşını ala bilməyən şəxslər müraciət etmişdi. Onlardan kimi pandemiya dövrü işdən çıxarılmadan (https://www.meydan.tv/az/article/goycay-sakini-gilan-orchards-pandemiya-dovrunde-meni-isden-cixardi/?ref=search), kimi də yığılıb qalmış maaşını ala bilməməkdən gileylənib (https://www.meydan.tv/az/article/9-aydir-gilan-orchard-sirketinden-maasimi-ala-bilmirem/?ref=search).
“Gilan Orchards” MMC-dən Meydan TV-yə daha öncə də kimsəni işdən azad etmədiklərini, işçilərin öz ərizələri ilə işdən ayrıldıqlarını bildirmişdilər. Maaşların gecikməsinə gəlincə, belə bir problemin olmadığını, hamının vaxtlı-vaxtında pulunu aldığını bildirmişdilər. Bu dəfə də şirkətin hüquq şöbəsindən oxşar açıqlama verilib:
“Kimsəni işdən çıxarmamışıq, ancaq öz ərizəsi ilə işdən ayrılanlar olub. Hamısının da son maaşları ödənib, problem yoxdur”.
Şikayətçilər isə bildirir ki, onlar öz xoşları ilə ərizə yazmayıblar. İşçilərin hamısının işdən ayrılma ilə bağlı ərizəsinin eyni cümlələrlə başlayıb-bitməsindən də görünür ki, bütün ərizələr bir nəfər tərəfindən hazırlanıb və işçilərdən qol çəkmələri istənilib:
“Biz hardan bilək? Düşündük ki, yəqin həmişəki kimi yenidən işə bərpa edilərik. Nə dedilər etdik. Amma bu dəfə belə olmadı. İşimizi birdəfəlik itirdik və haqqımızı ala bilmədik”.
Geri qayıt