Oqtay Şirəliyevin səhiyyə bazarının daha bir "laryok"u...
2-12-2019, 15:34
Bərdə Rayon Mərkəzi Xəstəxanasının həkimi Vəli Nəzərov sürücülük vəsiqəsi “bazarı” açıb. Çoxları elə bilirdi ki, bu cür alver MERO-larda olur, demə, RMX-da da imiş. Gundemxever.Az bildirir ki, bu haqda “facebook”da Vüqar Ələkbərov adlı vətəndaş yazıb.
Onun sözlərinə görə, həkim Vəli Nəzərov sürücülük vəsiqəsi üçün tibbi arayışı 30 manatdan satır. Daha doğrusu, sağlam adamlardan 20 manat, hərbi xidmətə yararsız olmuş vətəndaşlardan 30 manat tələb edir.
Yayılmış xəbərlərə görə, V.Nəzərova bu bazarlıqda digər həkim Mehdi Mehdizadə də dəstəyini əsirgəmir. Onlar əlbir olaraq Bərdədə “prava” almaq istəyənlərə tibbi arayışı marketdən alınan məhsul kimi verirlər.
Halbuki, sürücülük vəsiqəsi almaq üçün tibbi arayış əldə edəndə heç bir ödəniş etmirsən, sadəcə, həkim yoxlanışlarından keçirsən. Lakin elə bir zəncirvari sistem qurulub ki, yoxlanışların birində ilişirsən.
Səni ya göz həkimi, ya başqa biri problemli kimi göstərir, arayış verməkdən imtina edilir, bu zaman da sürücülük vəsiqəsi almaq üçün imtahanda iştirak etmək mümkün olmur.
Məlumatda deyilir ki, Bərdə RMX-da adi sağlamlıq arayışını isə 5 manata verirlər. Rəna Mustafayevadan sonra yeni baş həkim təyin olunsa da, görünür ki, heç nə dəyişməyib.
Əslində, Bərdə səhiyyəsindəki acınacaqlı vəziyyət çoxlarına məlumdur və kifayət qədər yazılıb. Məsələn, Aygün həkim UZİ üçün 15 manat tələb edir.
Bu ilin yayında da Bərdə rayon Mərkəzi Xəstəxanasında həkimin rüşvət alması görüntüləri yayılmışdı. Amma nə baş həkim, nə nazirlik araşdırma apardı.
Bərdə Rayon Mərkəzi Xəstəxanasının zülmət içində olan dəhlizlərindən və palatalarından yayılmış kadrlar hələ də aktualdır. Xüsusən də doğum şöbəsi zil qaranlıqdır və burada dünyaya göz açan körpələr ilk olaraq dünya işığını görmürlər.
Həmin kadrlar internetdə hələ də yayımlanmaqdadır və dəyişən heç bir yenilik yoxdur. Bərdə RMX bərbad vəziyyətdədir.
Baxmayaraq ki, xəstəxana əsaslı təmir olunub. Amma palatalar qaranlığa bürünüb. Doğum şöbəsindən danışmağa dəyməz.
Ümumiyyətlə, Bərdə Rayon Mərkəzi Xəstəxanası (RMX) gestapo və Quantanamoya çevrilib. Ölkə səhiyyəsi adına rəzalət olan bu tibb müəssisəsində xəstələr girov saxlanır, başlarına olmazın müsibətlər gətirilir, tibbi işgəncələr verilir, yaxınları soğan qabığı kimi soyulur.
Nazir Oqtay Şirəliyev Bərdə RMX-da baş verənlərə şahid olsa və yoxlama aparılsa tibb ocağının qəssabxanaya, sallaqxanaya, morqa çevrildiyini görəcək.
Doğum evində xəstələrin başına müsibət gətirilir, rüşvətxorluq, özbaşınalıq, dərəbəylik, yiyəsizlik hökm sürür.
Faktları təqdim edirik: rayonun Şatırlı kənd sakini İlahə Ağarza qızı Qasımovanın Bərdə Mərkəzi Rayon Xəstəxanasının Doğum Evində dünyaya gətirdiyi oğlan övladı ölüb.
Ailə üzvləri körpənin həkim səhlənkarlığına görə öldüyünü iddia edirlər. Ağdam rayon Paşabəyli kənd sakini, 30 yaşlı Sevinc Əli qızı Quliyeva Bərdə Rayon Mərkəzi Xəstəxanasına daxil olub.
Doğuş çətin olduğundan ananın həyatını xilas etmək üçün cərrahiyyə üsulu həyata keçirilib. Lakin uşağın həyatını xilas etmək mümkün olmayıb.
Sevinc Quliyevanın qayınanası Pəri Quliyeva qeyd edib ki, onun nəvəsi həkim məsuliyyətsizliyindən tələf olub. Yevlax rayon sakini 25 yaşlı Aynur Məhərrəm qızı Manafova Bərdə Mərkəzi Rayon Xəstəxanasının doğum şöbəsinə yerləşdirilib.
O, doğuş zamanı həyatını itirsə də, övladı sağ qalıb. Bu, mərhum ananın ikinci doğuşu olub. Hadisə qeysəriyyə əməliyyatı zamanı baş verib.
Geri qayıt