Müstəqim Məmmədovun növbəti səyyar-qəbul görüşü Seydimli kəndində keçirilib
24-10-2024, 17:17
Azərbaycan Respublikasının Prezidenti cənab İlham Əliyevin tapşırıq və
tövsiyyələrinə uyğun olaraq mütəmadi surətdə bölgələrdə icra başçılarının
səyyar qəbul görüşləri keçirilir. Keçirilən səyyar qəbul-görüşlərin məqsədi
vətəndaşları narahat edən məsələləri bilavasitə yerində öyrənmək və onların
rastlaşdıqları problemləri vaxtında aradan qaldırmaqdır.
Tərtər Rayon İcra Hakimiyyətinin başçısı Müstəqim Məmmədovun təsdiq
olunmuş qrafikə uyğun olaraq növbəti səyyar qəbul-görüşü Seydimli kənd İƏD
üzrə nümayəndəliyin Seydimli kəndində keçirilib.
Qəbulda Səfərbərlik və Hərbi Xidmətə Çağırış üzrə Dövlət Xidmətinin rayon
şöbəsinin rəisi Pərviz Hüseynov, YAP Tərtər Rayon Təşkilatının sədri Eldar
Əsədov səhiyyə, təhsil, mədəniyyət, digər xidmət təşkilatlarının rəhbərləri,
ərazi icra nümayəndəsi, bələdiyyə sədri və kənd sakinləri iştirak ediblər.
Əvvəlcə icra başçısı şəhidlərin xatirəsinə ucaldılmış abidənin önünə gül-çiçək
dəstələri düzüb, şəhidlərin xatirəsi bir dəqiqəlik sükutla yad edilib.
Rayon rəhbəri respublikamızda gedən sosial-iqtisadi inkişafın xalqımızın rifah
halının yaxşılaşmasına təsirindən, həmçinin Seydimli kəndində görülən
işlərdən, sakinlərinin məşğuliyyətindən, kənddə mövcud olan sosial
obyektlərin vəziyyətindən, rayonun sosial-iqtisadi inkişafı, əhalini narahat edən
problemlərin həlli istiqamətində həyata keçirilən tədbirlərdən də danışıb,
bildirib ki, əhali fasiləsiz olaraq işıq, qaz və su ilə təmin olunur.
Qeyd olunub ki, Seydimli kəndinin 1032 hektar ərazisi, 695 təsərrüfatı, 2750
nəfər əhalisi var. Ərazidə 1 məktəb, 1 körpələr evi uşaq bağçası, 1 tibb
məntəqəsi, 1 kitabxana, 13 ticarət obyekti, 7 iaşə obyekti, 2 məişət obyekti
faəliyyət göstərir. Kənd sakinləri əkinçilik və maldarlıqla məşğul olurlar.
Sakinlər 1061 baş iribuynuzlu, 2032 baş xırdabuynuzlu heyvan, 13340 baş
quş, 261 arı ailəsi saxlayırlar.
Son üç ildə Seydimli kəndində su arxları 2800 m məsafədə lildən təmizlənib,
kənd arası yollar 4000 metr çınqıl daşı ilə təmir edilib, kənd ərazisində 130
ədəd eldar şamı əkilib, yol kənarları alaq otlarından təmizlənərək səliqə-
səhmana salınıb.
Rayon rəhbəri sakinlərə Elektron Hökumət Portalı tərəfindən yaradılmış
Rəqəmsal İcra Hakimiyyəti platforması barədə məlumat verərək, xidmətin
əlçatanlıq və üstünlüklərini qeyd edib və https://rih.gov.az/ platformasından
istifadə etmələrini tövsiyə edib. Erkən nikah və onun fəsadlarından söhbət
açıb, əlaqədar qurumları, hər kəsi erkən nikaha, narkotok və psixotrop
maddələrdən istifadəyə qarşı mübarizəyə çağırıb, bu sahədə güclü
maarifləndirmə işlərinin aparılmasına ehtiyac olduğunu bildirib.
Sonra söz sakinlərə verilib. Kənd sakinlərindən Səriyyə Məmmədova Vətən
müharibəsi zamanı ziyan dəymiş evində tikinti şirkəti tərəfindən təmir işlərinin
düzgün aparılmadığı, Alim Əliyev qəbristanlığa gedən yolun təmir olunması,
Tamaşa Calalova gecə işıqlandırılması üçün quraşdırılmış işıq dirəklərində
olan işıq lampalarının dəyişdirilməsi, Rəna Abbasova kəndin içməli su
problemi, Sədaqət Orucova ev növbəsinin tezləşdirilməsi, Şamxal Mədətli
Tərtər Rayon Mərkəzi Xəstəxanasında işlə təmin olunma və digər məsələlər
barədə müraciət ediblər.
Qaldırılan məsələlər ilə əlaqədar rayon rəhbəri tərəfindən əlaqədar şəxslərə
aidiyyəti tapşırıqlar verilib.
Qəbulda iştirak edən sakinlər onların problemlərinin həllinə həssaslıqla
yanaşıldığına, şəhid ailələri və qazilərə göstərilən diqqət va qayğıya görə
Azərbaycan Respublikasının Prezidenti cənab İlham Əliyevə və Birinci vitse-
prezident Mehriban xanım Əliyevaya öz minnətdarlıqlarını bildiriblər
Geri qayıt