Cəbhədə yeni oyunçular: Çin Ukraynaya qoşun yeridir?
Bu gün, 16:09
Çin Rusiyaya yalnız iqtisadi yardım göstərir, Ukraynaya qarşı müharibədə birbaşa kömək etmir. Şimali Koreyanın Rusiyaya qoşun göndərməsindən sonra belə, bu yanaşmanın yaxın gələcəkdə dəyişməsi ehtimalı azdır.
Teleqraf.com xəbər verir ki, bunu ukraynalı hərbi analitik Pavlo Narojnı deyib.
Ekspert qeyd edib ki, Çin böyük ehtimalla öz ordusunu Ukraynaya müharibəyə göndərməyəcək, bunu mümkünsüz edən bir sıra amillər var.
"Çin dünya iqtisadiyyatının lokomotivlərindən biridir, Şimali Koreyada isə aclıq standart bir vəziyyətdir. Bəlkə də koreyalıların müharibəyə getməsi üçün ən böyük motivasiya Putinin bunun əvəzini hansısa yolla - ya pul, ya da malla ödəyəcəyi fikridir. Çin isə maddi motivasiya ilə maraqlanmır", - Narojnı vurğulayıb.
Onun sözlərinə görə, belə bir addım hələ də neytral mövqe və geosiyasi təsirini saxlamağa çalışan Çin üçün kifayət qədər riskli olacaq.
Analitik həmçinin izah edib ki, Çin qoşunları Ukraynaya müharibəyə göndərilərsə, Pekin ən böyük ticarət tərəfdaşları olan Avropa və ABŞ-ın sanksiyalarına məruz qalacaq:
"Çinin öz nizami ordusunu Rusiyaya köməyə göndərməsi üçün heç bir səbəb görmürəm. Çindən bəzi muzdluların cəlb edilməsi mümkündür. Amma nizami Çin ordusunun Rusiyaya göndərilməsi ehtimalı azdır".
Narojnının fikrincə, Şimali Koreya təkcə maddi qazanc yox, həm də döyüş təcrübəsi ilə maraqlanır, Çin üçün bunlar o qədər də vacib deyil: "Çinlilər orduyla yox, kreditlər hesabına genişlənirlər. Məsələn, kreditlər sayəsində Venesuelada strateji liman əldə ediblər. Çin üçün müharibə çox bahalı işdir".
Geri qayıt