Səhiyyə nazirinin müavini Abbas Vəlibəyov cəmiyyətdə populyar adam olmasa da, ara-sıra ölkə mətbuatında onun adına da rast gəlmək olar. Sabiq nazir, hazırkı məhbus Əli İnsanovun köhnə kadrlarından olan bu şəxs barəsində Qafqaznews.az-a bir sıra məlumatlar daxil olub. Maraqlıdır ki, bu şəxs barəsində vaxtaşırı “kurator” ifadəsi də işlədilir. Çünki bir sıra estetik mərkəzlərdən, apteklərdən, stomatoloji klinikalardan “haqq” yığılmasında, tenderlərdə müəyyən paya sahib olmasında Abbas Vəlibəyovun adı hallandırılır.
Məsələn, virtualaz.org saytının ötən il dərc etdiyi yazılardan birində bu hissə diqqəti çəkir: “İddia olunur ki, gözəllik salonları və diş kabinetləri səhiyyə nazirinin müavini Abbas Vəlibəyovun himayəsindədir. Başqa sözlə, RGEM-lər, xəstəxanaların mətbəxinin ərzaqla təminatı kimi gəlirli sahələri himayəsinə alan A.Vəlibəyov həkimlər arasında “Milyarder” ləqəbini alıb. İddialara görə, keçmiş nazir Əli İnsanovun “sağ əli” hesab olunan Abbas Vəlibəyov sonradan da nazirlikdəki mövqeyini qoruyub saxlaya bilib”.
Rublika.az-da isə belə bir iddia yer alıb: “İddialara əsasən, sabiq nazir tutduğu vəzifədən azad olunarkən Abbas Vəlibəyov böyük həyəcan yaşayıb, hətta onun səhhətində bir müddət problem belə yaranıb. Lakin sonradan kimlərinsə sayəsində nazir müavininin postuna olan təhlükə sovuşub. Əldə etdiyimiz məlumatlarda bildirilir ki, sakit bir insan təsiri bağışlayan Vəlibəyov əslində nazirliyin əsas fiqurlarından biri hesab edilir. Belə ki, nazirliklə bağlı olan kadr məsələlərin əksəriyyəti onun razılığı əsasında həyata keçirilir. Bundan başqa, səhiyyə müəssisələrinin təmir-tikinti işləri ilə bağlı elan edilən tenderlərdə də onun payının olduğu bildirilir. Məhz bu tip işlərə imza atan nazir müavini nəhəng biznes imperiyasına sahib çıxmağı bacarıb. Deyilənə görə, adıçəkilən məmurun Bakıda bir neçə klinikası, stomatoloji kabineti, aptekləri və digər ticarət obyektləri fəaliyyət göstərir. Maraqlıdır görəsən, o bütün bunları hansı vəsaitlə əldə edib? Bu arada, onu da bildirək ki, nazir müavini keçmiş rəhbəri Əli İnsanovla əlaqələrini kəsməyib. Əksinə onun tez-tez sabiq nazirə «peredaça» göndərdiyi, telefon əlaqəsi saxladığı iddia olunur”. Bu və digər iddiaları araşdırarkən, bir sıra məlumatlara da rast gəldik.
Həmçinin, Abbas Vəlibəyovun adı “Ebola” virusu ilə bağlı tədbirlərə ayrılan pulların “yeyilməsində” də hallanır: “Deyilənə görə, nazir müavini “Ebola” virusu ilə mübarizə məqsədilə dövlət tərəfindən ayrılan vəsaitlərin istifadəsi zamanı nöqsanlara yol verib və bununla da maliyyə durumunu xeyli yaxşılaşdırıb (arqument.az)”. Abbas Vəlibəyovun Əli İnsanovdan sonra vəzifədə qalması, hətta daha da güclənməsi nə qədər “sirli” və təzadlı görünsə də, onun qohumluq əlaqələrinə diqqət yetirdikdə, bir çox suallara aydınlıq gəlir. Məsələ ondadır ki, Abbas Vəlibəyovla Dövlət Gömrük Komitəsinin sədri Aydın Əliyev arasında “qohumluq körpüsü” və isti münasibətlər var. Belə ki, Aydın Əliyevin əmisi oğlu Faiq Əliyevin oğlu Abbas Vəlibəyovun qızı ilə ailə qurub. Bu izdivacda da Aydın Əliyevin şəxsən “qarant” durduğu söylənilir.
Məlumat verən mənbə onu da bildirir ki, Aydın Əliyevlə Abbas Vəlibəyov ölkəyə dərman idxalatı ilə bağlı da “ortaq dil” tapıblar və nazir müavini bu istiqamətdə xeyli qazanc əldə edib. Bəs Faiq Həsən oğlu Əliyev kimdir? Bu şəxs barədə redaksiyamıza maraqlı məlumatlar daxil olub. Məlumatda bildirilir ki, hazırda Kooperasiya Universitetində fəlsəfədən dərs deyən Faiq Əliyev 20 il bundan əvvəl əmisi oğlu Aydın Əliyevin vasitəsi ilə Azərbaycana Rusiya universitetlərindən birinin filialını gətizdirib. Ölkədə imkanlı ailələrin övladlarının hərbi xidmətdən yayınması üçün, bu cür təhsil ocaqları xüsusi “əhəmiyyət” daşıyır. Ancaq o illər təhsil naziri olan Misir Mərdanov Faiq Əliyevin təhsil ocağına lisenziya verməyib. Nəticədə isə həmin filialın fəaliyyətini davam etdirmək mümkün olmayıb. Faiq Əliyev qapılara düşərək nazirə çıxışı olan adamlar axtarıb.
Oxucuda sual yarana bilər: o illər Aydın Əliyev DGK sədrinin 1-ci müavini vəzifəsində çalışıb və çox güman ki, özü də lisenziya məsələsi üçün Misir Mərdanova müraciət edə bilərdi. Ancaq əldə etdiyimiz məlumata görə, Aydın Əliyev heç vaxt istəməyib ki, onun adı hansısa təşkilatla bağlı olsun. Və məlumata görə, o, sadəcə əmisi oğluna məsləhət verib ki, şəxsən özü nazirə yaxın olan adamlar tapsın. Faiq Əliyev elə də edib. Nazirə yaxın olan bəzi şəxslər Faiq Əliyevdən 90 min dollar pulu alaraq lisenziya vəd etsələr də, sonda onu aldadırlar. Yəni, Faiq Əliyev bir qrup şəxs tərəfindən fırıldağa məruz qalır. Bununla bağlı Faiq Əliyev DİN rəhbərliyinə müraciət edir. Hətta bu məsələ o illər DİN-nin Baş İstintaq İdarəsinin baş müstəntiqi mərhum Rövşən Musayev tərəfindən araşdırılıb. Bununla sakitləşməyən Faiq Əliyev Aydın Əliyevlə məsləhətləşərək, üz tutur “Azadlıq” qəzetinə və qəzetin redaksiyasında Qənimət Zahidlə şəxsən bir neçə dəfə görüşür.
Faiq Əliyevə pul atılması ilə bağlı “Azadlıq” qəzetində silsilə yazılar dərc olunur. Bu məsələyə hüquq mühafizə orqanları qarışır və məlum olur ki, Faiq Əliyev Aydın Əliyevin əmisi oğludur. Aydın Əliyevə təziqlər başlayır və o, tutduğu vəzifəsini itirmək təhlükəsi ilə üzləşir. Sonda Aydın Əliyev əmisioğluna əmr edir ki, “Azadlıq” qəzetində gedən yazıları dayandırsın və tutduğu bu yoldan əl çəksin. Çox güman ki, atılan 90 min dollar pul Aydın Əliyevin olduğu üçün Faiq Əliyev tutduğu bu yoldan əl çəkmə əmrini də elə ondan gözləyirdi. Mənbənin sözlərinə görə, Faiq Əliyevin özü o vaxt böyük imkanlara sahib deyildi və çox güman ki, həmin pulu da əmisioğlundan almışdı və bu məsələ sadəcə Aydın Əliyevin “pulu unutması” ilə bağlanıb. Bu gün Faiq Əliyevlə bağlı “Azadlıq” qəzetinin veb saytında 1999-2000-ci illərin yazılarını axtarsaq da, tapa bilmədik. Amma güman ki, Qənimət Zahiddə Faiq Əliyevin qəzetə verdiyi materialların arxivi qalar. Bundan başqa, qeyd edək ki, biz hələ 2013-cü ildə Qafqazregion.az saytı olaraq “ DGK-nin şefi Aydın Əliyevin adından istifadə edən kim olub?” başlıqlı yazı dərc etmişdik.
Redaksiyamıza daxil olan məlumata görə, 03.05.2013-cü ildə aeroportda Dubay-Bakı reysindən düşən, əslən Gəncədən olan Əliyev Faiq Hüseyn oğlu sərhəd və gömrük xidmətinin işçiləri tərəfindən saxlanılmışdı. Həmin şəxs sərhəd və gömrük xidmətinin əməkdaşlarına DGK-nin şefi Aydın Əliyevin doğmaca əmisioğlu olduğunu deyib və onu saxladıqlarına görə başlarına oyun açacağını bildirib. Aeroport əməkdaşları tez bu barədə öz rəhbərliyinə, onlar da öz növbəsində DGK-nın şefi Aydın Əliyeva məruzə ediblər. Məruzədən sonra Aydın Əliyev məsələni aydınlaşdırmaq üçün dərhal həm öz doğma əmisioğlu Əliyev Faiqi, həm də aeroportun adıçəkilən xidmətlərinin əməkdaşlarını idarəyə çağırtdırıb və orada məlum olub ki, hava limanında onlar tərəfindən saxlanılan şəxs əslən Gəncədən olan Əliyev Faiq Hüseyn oğludur və bu şəxsin Aydın Əliyevlə heç bir qohumluğu yoxdur.
Ancaq idarədəkilərin suallarına cavab verən Aydın Əliyevin doğma əmisi oğlu Əliyev Faiq Həsən oğlu qeyd edib ki, təxminən 13 il bundan əvvəl onun Gəncə sakinləri ilə mübahisəli bir işi olub. Yəni, 2000-ci ildə təhsil ocağının lisenziyası ilə əlaqədar ona atılan 90 min dollar pulu nəzərdə tutub. Onun bildirdiyinə görə, həmin mübahisəli iş o illər mətbuatda çox işıqlanıb və ola bilsin ki, elə həmin gəncəllilərin sifarişi ilə Bakı-Dubay təyyarəsindən düşən Əliyev Faiq Hüseyn oğlu qəsdən DGK şefiylə qohum olduğunu bildirib. … O ki qaldı Abbas Vəlibəyova, onun qudası Faiq Əliyev bu günlərdə yenə də ölkəmizə Rusiyadakı təhsil ocaqlarından birinin filialını gətizdirmək istəyir. Hətta öyrəndiyimizə görə, bu işdə ona məhz Abbas Vəlibəyov arxa çıxmağı vəd edib. Belə ki, hazırda Azərbaycanda Tibb Universitetinə daxil olmaq çətindir, buna görə də, bir sıra imkanlı şəxslər övladlarını özəl təhsil müəssisələrində açılan tibb fakültələrində oxutdurur.
Mənbənin məlumatına görə, Abbas Vəlibəyov hətta qudasını arxayın edib ki, “pullu müştərilər” tapacağı halda, onların sonradan Tibb Universitetinə köçürülməsinə də yardımçı olacaq. Həmçinin, bu təhsil ocağının bina almaq və digər maliyyə xərclərini Aydın Əliyevin boynuna götürməsi barədə də məlumatlar var. Görünür, Aydın Əliyev və Abbas Vəlibəyovun tutduqları vəzifələr onları qane etmədiyi üçün, bu şəxslər Faiq Əliyevin vasitəsi ilə “təhsil biznesi”nə qoşulmaq niyyətindədirlər.
Xatırladaq ki, bir zamanlar türk liseylərində vəzifəli və imkanlı şəxslərin övladları oxuyurdu və liseylərin bağlanması məsələsi gündəmə gələrkən, bəzi məmurların da bu liseylərə arxa durması barədə iddialar mətbuatda yer almışdı. Olmaya, əmioğlu-quda üçlüyünün planı da məhz təhsil ocağı vasitəsi ilə yeni əlaqələr qurmaq, müxtəlif qurumlarda rıçaqlar qazanmaq və beləcə daha da möhkəmlənməkdir?
A.Vəlibəyovla bağlı araşdırmamız davam edir. Gələn yazımızda Abbas Vəlibəyovun sabiq MTN başçısı Eldar Mahmudova məxsus “Caspian Crystal”adlı qastronomdan bahalı ərzaqlar almasından söz açacağıq. Belə ki, Nəriman Nərimanov prospekti, 57/24 ünvanında yerləşən həmin market Bakıda vəzifəli və imkanlı adamların alış-veriş etdiyi, ən seçilən və bahalı məhsulların satış yeri hesab olunur. Və hətta Abbas Vəlibəyovu gəzdirən 10 AA 885 nömrəli avtomobilin “Caspian Crystal”ın qabağında dayandığı zaman baş verən hadisələrdən də söz açacağıq. Araşdırmamız davam edir…
