DİA.AZ: - Şəki şəhəri R. Axundov küçəsi ev 16 ünvanında yaşayan Bəkirova Səadət Laçın qızı prezident İlham Əliyevə şikayət məktubu ünvanlayıb. Bir nüsxəsi də DİA.AZ-a daxil olan müraciətdə deyilir:
"Azərbaycan Respublikasında özəlləşdirmə proqramı həyata kecirilən dövrə qədər Şəki şəhərində İctimai İaşə Biriliyinin nəzdində fəaliyyət göstərən Şəki şəhəri M. Müşfiq küçəsində yerləşən “Səbuhi” kafesi mərhum ərim Bəkirov Əflatun Həsən oğluna məxsus olmuşdur. Mən də bu kafedə 2013 – cü ilə, yəni ərim rəhmətə gedənə qədər aşpaz işləmişəm. Bizdən əlavə bu kafedə 11 nəfər insan müxtəlif vəzifələrdə çalışmış və orada payçı kimi özəlləşdirmə çeklərinə malikdirlər. Sonradan həmin kafe özəlləşdirilərkən bizə heç bir məlumat verilməyib. Bizim hər hansı bir razılığımız olmadan qeyd edilən kafe, əvvəllər üzünü görmədiyimiz və həmin kafedə bir gün də belə işləməyən bir nəfər şəxsin Samir Knyaz oğlu Məmmədovun adına qeyri - qanuni özəlləşdirilib. Bununla bağlı Şəki rayon Daşınmaz Əmlakın Reyestr xidmətinə dəfələrlə müraciət etsək də bizə heç bir cavab verilməyib. Hətta qeyd edilən idarənin işçiləri Bəkirova Səadət Laçın qızının sinəsindən itələyərək zorla çölə çıxardıb və “get kimə istəyirsən şikayət elə” deyərək onu idarədən kobud surətdə qovmuşlar.
Nəzərinizə çatdırmaq istəyirik ki, həmin obyekti guya ki, 2001 – ci ildə saxta və qanunsuz sənədlərlə özəlləşdirən Samir Knyaz oğlu Məmmədov, bu obyektə 06.11.2004 – cü ildə çayçı kimi işə düzəlib və həmin gündən də ona vergi ödəyicisi kimi VÖEN açılmışdır. Bu şəxs kafenin əvvəlki sahibi Bəkirov Əflatunu həmin dövrdə onun xroniki alkoqolizm xəstəliyindən müalicə olunduğu haqqında məlumatı olmasına baxmayaraq, mütəmadi olaraq qəsdən spirtli içki içirmiş və bilavasitə onun ölümünə səbəb olmuşdur. Onun bu hərəkəti mütəmadi etməsinə səbəb isə obyekti ələ keçirmək olmuşdur.
Ərimin müəmmalı şəkildə ölümü bizdə və onun ailə üzvlərində kifayət qədər suallar oyatsa da, bununla əlaqədar müvafiq orqanlara müraciət olunmasına baxmayaraq heç bir ölçü götürən olmamışdır. Yuxarıda adını çəkdiyimiz Samir Knyaz oğlu Məmmədov dövlət orqanlarını və səlahiyyətli şəxsləri aldadaraq kafenin arxasında və yanında olan bələdiyyə torpaqlarını da hərracdan kənar, vəzifədə olan bəzi məmurların himayədarlığı ilə saxta sənədlərlə özəlləşdirmişdir. Adını çəkdiyimiz şəxsin əməllərində kifayət qədər cinayət tərkibinin olması bu günə qədər də heç kimdə şübhə oyatmır.
Cənab Prezident başıma gətirilən bu müsibətlərlə əlaqədar sizə və Birinci Vitse Prezident Mehriban xanım Əliyevaya 3.10.2013 – cu il tarixdə müraciət etdikdən sonra mənə qarşı olan təzyiqlər daha da şiddətləndi. Şəki Rayon Prokurorluğunda bu müraciətlə əlaqədar araşdırma başlandı. Araşdırma gedə-gedə özlərini sudan quru çıxarmaq üçün və cinayət məsuliyyətindən yayınmaq üçün S. Məmmədova Azərbaycan Respublikası Dövlət Əmlak Komitəsinin Şəki Ərazi Reyestr İdarəsinin sabiq müdiri Ş. Şirinzadə və torpaq şöbəsinin müdiri B. Məsimov tərəfindən tələm-tələsik saxta texniki pasport verildi. Prokurorluqda aparılan araşdırmadan sonra mənə cavab verildi ki, bu iş məhkəməlikdir.
O gün, bu gün cənab Prezident. Mən məhkəmələr qapısındayam. Bu günə qədər Bakı İnzibati-İqtisadi (İş № 2-1(82)-3446/2016), Şəki İnzibati-İqtisadi, Şəki Rayon, Şəki Appelyasiya (İş№ 2(107)-2862/2017), Azərbaycan Respublikasının Ali Məhkəmələrində (İş №2(102)-5400/2017) ümumilikdə 20-ə yaxın məhkəmə baxışı keçirilmişdir. Mən bu günə qədər möhtərəm hakimlərə başa sala bilmirəm ki, mənim mübahisə etdiyim İctimai İaşə Müəssisəsinin nəzdində olan yüngül konstruksiyalı dəmir pavilyondur. Ancaq məhkəmələrin ciddi israrla araşdırdıqları isə S. Məmmədovun başqa ünvanda yerləşən obyektə məxsus sənədlə saxta yolla özəlləşdirdiyi daş konstruksiyalı kafedir.
Qeyri-qanuni aparılan özəlləşdirmə, saxta, tərtib olunan sənədlər, ailəmə, mənə və payçılara qarşı törədilən haqsız əməllər, inanın bizi həyatdan bezdirib.
Çox dəhşətli haldır ki, Samir Knyaz oğlu Məmmədov, bu obyektə 06.11.2004 – cü ildə çayçı kimi işə düzəlməsinə baxmayaraq, ərimin müəmmalı ölümündən sonra vəzifədə olan himayədarının köməkliyi ilə 25 dekabr 2001 – ci il tarixdə başqa obyektə məxsus olan sənədi göstərərək qeyri-qanuni yolla saxta özəlləşdirmə aparmışdır. Biz sizə müraciət edəndə böyük ümidlə etmişdik, amma müraciətdən sonra bizə qarşı olan bu haqsızlıqlar, bizi belə düşünməyə vadar etdi ki, Samir Məmmədovun özü və ona himayədarlıq edən məmurlar da heç sizdən də qorxmurlar.
Cənab Prezident sizin qanunsuz özəılləşdirmənin nəticələrinin ləğv edilməsi haqqında göstərişinizdən xəbərimiz var və bu təşəbbüsünüzü dəstəkləyir və əvvəlcədən sizə öz minnətdarlığımızı bildiririk.
Siz həmişə öz çıxışlarınızda məmurlara vətəndaşların hüququ və azadlıqlarına hörmətlə yanaşmağı tövsüyyə etsəniz də bəzi məmurlar sizin apardığınız məqsədyönlü siyəsətin əleyhinə gedərək insanların hüquq və azdlıqlarını kobud surətdə pozur və onlara hörmətsizlik edirlər.
Bizim qeyd edilən kafedə olan paylarımızı qanunsuz olaraq özəlləşdirib və həmin obyektə olan mülkiyyət hüquqularımız məqsədyönlü şəkildə pozublar.
Yuxarıda göstərilənləri əsas gətirərək, sizdən hədsiz dərəcədə xahiş edirəm ki, mənim hal –hazırda Azərbaycan Respublikasının Ali Məhkəməsində 12 iyun 2018 – ci il tarixinə məhkəmə baxışı nəzərdə tutulmuş 3893 nömrəli, hakim Ə. Əliyevin sədrliyi ilə keçiriləcək məhkəməni nəzarətə götürəsiniz və ədalətli qərar çıxarılmasına köməklik göstərəsiniz. Ümidvaram ki, beş ildən artıqdır öz qanuni həllini tapmayan bu müəmmalı məsələ axır ki, öz həllini tapacaq. Əvvəlcədən sizə təşəkkür edirəm".
dia-az.site olaraq qarşı tərəfi də dinləməyə hazırıq...
