Gömrükçü Aqil İbadov YAXASINI QURTARA BİLƏCƏKMİ?
20-04-2024, 08:36
"İrandan gətirilən 6 kiloqram narkotik maddə Bakı gömrüyündən necə keçirilib?" dia-az.site bildirir ki, bu ritorik sualla çıxış edən tanınmış araşdırmaçı jurnalist Samir Feyruzov ilginc bir məqama da toxunub. Belə ki, bu vaxta qədər əksəriyyəti düşündürməkdə olan, lakin cavabı hələ də tapılmayan bir sualla bağlı məsələ qaldıran S.Feyruzov bildirir:
"Aprelin 9-da Cəlilabad sakini, 1984-cü il təvəllüdlü Mübariz Ağayev xüsusi əməliyyatla saxlanılıb və ondan 6 kiloqram narkotik maddə aşkarlanıb. O, ifadəsində həmin narkotik maddələri karqo şirkətlərdən birindən aldığını bildirib. Narkotik maddə İrandan Azərbaycana TIR-da silikonların içərisində gətirilib. M.Ağayev narkotik malları paytaxt Bakıda müəyyənləşdirilən yerlərə verdikdən sonra iranlı narkotacirə məlumat verməli imiş.
M.Ağayevin "narkotiki karqo şirkətlərin birindən aldım" deməsi, diqqətimi çəkdi və məsələ ilə bağlı qısa araşdırma apardım.
Məlum oldu ki, 6 kiloqram narkotik maddə "Fronqresen Group" adlı MMC-yə məxsus malların, 303 kq çəkisi olan silikonların içərində Azərbaycana gətirilib. Mallar 25.03.2024-cü il tarixində Bakı Şəhər Baş Gömrük İdarəsində olub, maliyyə inspektoru tərəfindən rəsmiləşdirilib, gömrük bəyannaməsi yazılıb. Gömrük əməkdaşları və rentgen aparatları narkotiki aşkarlaya bilməyib. Maraqlıdır ki, mallar bir neçə gün orada olub, yoxlanılıb, daha sonra yenidən fiziki baxışa verilib. Amma 6 kiloqram narkotiki aşkarlaya bilməyiblər.
O da məlum oldu ki, malların yoxlanılması və buraxılması BBGİ-nin inspektoru Aqil İbadovun monopoliyasındadır. Onun icazəsi, rəyi olmadan heç bir mal buraxıla bilməz.
Məsələ ilə bağlı istintaq aparılır. Ümid etmək istəyirəm ki, bu məsələ ilə bağlı təkcə M.Ağayev barədə yox, gömrük əməkdaşının məsuliyyəti də müəyyənləşdirilərək lazımı tədbirlər görüləcək".
Geri qayıt