Şikayətçi də, problemin "həlli" də əvvəlcədən hazırlanır
Bu gün, 15:01
Nəhayət uzun fasilədən sonra Naxçıvan Muxtar Respublikasında Azərbaycan Respublikası Prezidentinin səlahiyyyətli nümayəndəsi Fuad Nəcəfli muxtar respublikanın bölgələrində vətəndaş qəbuluna başlayıb. Əvvəla tənqiddən nəticə çıxardığına görə səlahiyyətli nümayəndəyə təşəkkür edirik.
TNS-də bu ilin yanvar ayında “İki fotonun və iki məmurun fərqi, yaxud Naxçıvanın fərqlənmək “xəstəliyi” adlı tənqidi yazı dərc olunub. Yazıda Fuad Nəcəflinin və Azərbaycanın mərkəzi icra hakimiyyəti orqanları rəhbərlərinin Naxçıvanda keçirdiyi vətəndaş qəbullarının fərqi təhlil edilib. Həmin məqləni buradan oxuya bilərsiniz.
Bu tənqidi məqalədən sonra Fuad Nəcəfli vətəndaş qəbulu keçirməyib. 10 ay sonra cənab Nəcəfli muxtar respublikanın şəhər və rayonlarında vətəndaş qəbulları keçirməyə başlayıb. Bu qəbullarda artıq səlahiyyətli nümayəndə fərqlənmək istəyini göstərmir. Fotolardan görünür ki, qəbullar Azərbaycanın mərkəzi icra hakimiyyəti orqanlarının rəhbərlərinin vətəndaş qəbulları kimi keçirilir.
Ancaq səlahiyyətli nümayəndənin keçirdiyi qəbullar muxtar respublika sakinlərinin ürəyincə deyil. Sosial şəbəkələrdə yayılan məlumatlardan aydın olur ki, Fuad Nəcəfli ilə görüşə əvvəlcədən müəyyənləşdirilmiş və ciddi problemlər qaldırmayan şəxslər dəvət edilirlər. Bu şəxslərə isə tapşırılır ki, kiçik məişət problemlərindən danışsınlar.
Məsələn, Şahbuz rayon sakini Asəf Babayev sosial şəbəkədə yazıb ki, görüşdən həmin gün xəbər tutsa da, içəri buraxılmayıb: “Dedilər ki, əvvəlcədən yazılmaq lazım idi. Əvvəlcədən də heç kimə xəbər etməyiblər. Görüşdən iki gün qabaq yerli media yazıb ki, onları da heç kim oxumur. Qəsdən belə ediblər ki, şikayətçilər xəbər tutmasınlar. Mənim həm rayon, həm də muxtar respublika rəhbərliyindən çoxlu şikayətlərim var. Ən böyük problem işsizlikdir. Üç övladım var, heç biri işləmir. Aldığım təqaüdlə güc-bəla ilə keçinirik. Görüşə gedib, onları səlahiyyətli nümayəndənin nəzərinə çatdırmaq istəyirdim. Lakin mənə xəbərdarlıq edildi ki, şikayətimə görə başım ağrıya bilər”.
Göründüyü kimi, bu ilin əvvəlindən fəqrli olaraq, Fuad Nəcəfli geniş vətəndaş qəbulu keçirə bilmir. Bunun da ciddi səbəbləri var. Yeni komanda Naxçıvandakı problemləri həll edə bilməyib. Son 2 ilə yaxın müddət ərzində Naxçıvanda 60 mindən çox iş yeri bağlanıb, tikinti sektoru iflic vəziyyətinə salınıb, dövlətin Naxçıvanın inkişafı üçün ayırdığı milyonlarla manat vəsait istifadə olunmadığından geri qaytarılıb. Fuad Nəcəflinin vətəndaşlara verəcək cavabı yoxdur. Ona görə də qəbullara ciddi problemlər qaldırmayan seçilmiş insanlar buraxılır.
Bunu əldə etdiyimiz sənədlər sübuta yetirir. Səlahiyyətli nümayəndəlikdən muxtar respublikanın şəhər və rayon icra hakimiyyətlərinə təlimat göndərilib. Həmin təlimatda qeyd olunur ki, qəbula düşmək istəyən vətəndaşlar müraciətin məzmununu bildirməlidir. Yəni, vətəndaş nədən və kimdən şikayətçi olduğunu əvvəlcədən deməlidir. Tutaq ki, Kərgərli rayon sakini icra başçısından şikayətçidir. Vətəndaş başçıdan şikayətçi olduğunu bildirərsə, onu səlahiyyətli nümayəndənin qəbuluna buraxarlarmı? Əlbəttə ki, yox. Daha yüksək vəzifəli şəxslər ona görə qəbullar keçirir ki, vətəndaşlar yerlərdəki məmurlardan onlara şikayət edə bilsin. Maraqlı cəhər həm də odur ki, icra hakimiyyətlərinə göndərilən təlimatda müraciətin məzmunu ilə yanaşı problemin “həlli yolları”nın da yazılması tələb olunub. Deməli, şikayətçi də, müraciətin məzmunu da, problemin “həlli yolları” da əvvəlcədən hazırlanır. Belə vətəndaş qəbulu olar? Ancaq başqa çıxış yolları da yoxdur. Ötən dövrdə iş görməyiblər axı. İndi vətəndaşın qarşısına necə çıxsınlar?
Fuad Nəcəflinin vətəndaşlarla görüşlərində diqqət çəkən başqa bir məqam isə qəbullarda iştirak edən məmurlardır. Son günlər keçirlən qəbullardan yayılan fotolarda Naxçıvan Muxtar Respublikası Ali Məclisi Apratının rəhbəri Ülvi Hüseynlini görürük. Ülvi Hüseynli Fuad Nəcəfliyə heç bir aidiyyəti olmayan bir orqanın rəhbər vəzifəli şəxsidir. Sual olunur – o, səlahiyyətli nümayəndənin qəbullarında niyə iştirak edir? Prezident Administrasiyasının yüksək vəzifəli şəxslərinin vətəndaş qəbulu zamanı Milli Məclisin Aparat rəhbəri iştirak edir? Əlbəttə ki, bu, mümkün deyil və absurddur. Deyək ki, Ülvi Hüseynlinin belə görüşlərə qatılmağa həvəsi var, Fuad Nəcəfli də ona şərait yaradır. Bəs, Ülvi Hüseynlinin faktiki rəhbəri, Ali Məclis sədrinin birinci müavini Bəxtiyar Məmmədov niyə susur? Bəxtiyar Məmmədov bununla sübut edir ki, o, heç kimdir, kiminsə drijor çubuğu ilə hərəkət edən şəxsdir. Və bu, həm də onu sübut edir ki, Bəxtiyar Məmmədovun Azərbaycanın və Naxçıvanın konstitusiyalarından xəbəri yoxdur. Adam hansı vəzifəyə seçildiyinin fərqində deyil. Və nəhayət, bütün bunlar onu göstərir ki, Naxçıvanda hüquq adına heç nə qalmayıb. Muxtar respublika rəhbərliyi heç bir qanun, qayda tanımır. Naxçıvanda dərəbəylik hökm sürür. Fuad Nəcəfli demək istəyir ki, “Burda mənəm, Bağdadda kor xəlifə”. Fikrimizcə, muxtar respublikanın bəzi rəhbər vəzifəli şəxslərini idarəçilik kursuna cəlb etmək, onlara dövlətçilik anlayışını öyrətmək lazımdır.
Ülvi Hüseynlinin səlahiyyətlərinə aid olmayan məsələlərlə məşğul olması ilə bağlı dəfələrlə yazılıb, bu, bir neçə dəfə gündəmə gətirilib. Naxçıvan ictimaiyyəti də belə idarəçilik formasından narazıdır. Bir daha xatırladırıq, ictimai rəyə tüpürmək sonra kimlərəsə baha başa gələcək. Vasif Talıbov nümunəsi ortadadır. Bizdən demək.
Geri qayıt