AVTORİTETİN ADINDAN İSTİFADƏ EDƏN KİMDİR?
22-08-2013, 14:48
İST PETROL-LA BAĞLI İLGİNC FAKTLAR
DİA.AZ: - Məlum olduğu kimi azad rəqabət hər zaman bazar iqtisadiyyatının inkişafı yönümündə əsas hərəkətverici qüvvələrdən biri kimi çıxış edib. Bir tərəfdən, rəqabət istehsalçı şirkətlərin istehlak bazarı uğrunda mübarizəsini stimullaşdırır. Bu mübarizədə qalib gəlmək üçünsə həmin şirkətlər əslində istehlakçıların mənafeylərinə xidmət edən amilləri getdikcə daha çox tətbiq etməyə başlayırlar. Nəticədə bazara çıxarılan məhsulların satış qiymətləri düşür, keyfiyyət göstəriciləri yüksəlir və sairə.
Təbii ki, rəqabət prinsiplərinin işləməsi üçün təqdim olunan məhsulun istehsalçılarının sayı artmalıdır. Yalnız bu halda istehsalçı şirkətlər arasında rəqabətdən söhbət gedə bilər. Bu qaydalar iqtisadiyyatın istisnasız olaraq bütün sahələrinə şamil edilir. O cümlədən bu gün ölkə ərazisində fəaliyyət göstərən yanacaq doldurma stansiyaları da istehlak bazarı uğrunda mübarizədə ən müxtəlif üsullara əl atmalı olurlar. Belə ki, müxtəlif uduşlu kampaniyaların keçirilməsi, müəyyən pulsuz xidmətlərin göstərilməsi də müştərilərin cəlb olunması üçün tətbiq olunan aksiyalardandır.
Aydındır ki, bu sahədə bazara daxil olan hər bir yeni brend dərhal istehlakçıların, nəzərdən keçirdiyimiz halda avtonəqliyyat vasitəsi sahiblərinin diqqətini cəlb etməyə bilməz. Elə IST Petrol brendi altında fəaliyyət göstərən yanacaq doldurma stansiyalarının ilk açıldığı dövrdə də paytaxt sürücüləri bu yeniliyi sevinc və ümidlə qarşılamışdılar. Etiraf etmək lazımdır ki, əslən Ağstafadan olan Seymur və Teymur adlı qardaşlara məxsus olan bu stansiyalarda ilk vaxtlar istehlakçılara həqiqətən də keyfiyyətli yanacaq təklif olunurdu. Qeyd edək ki, hazırda paytaxt ərazisində üç yerdə - Tbilisi prospektində, Zooparkın yaxınlığında və Əhmədli qəsəbəsində IST Petrol yanacaq doldurma stansiyaları fəaliyətdədir. Lakin zaman keçdikcə bu brend altında satılan yanacağın da keyfiyyəti hiss olunacaq dərəcədə aşağı düşməyə başladı.
DİA.AZ bildirir ki, xüsusilə bu geriləmələr qardaşların bibisi oğlanları olan Ayaz adlı şəxsin idarə etdiyi Tbilisi prospektindəki stansiyada və Rüstəm adlı daha bir qohumlarının müdir olduğu, Zooparkın yaxınlığında yerləşən stansiyada daha çox nəzərə çarpır. Məlumatlı mənbələr isə bu məsuliyyətsizliyin əsasında mahiyyət etibarı ilə daha şübhəli, neqativ məqamların durduğunu iddia edirlər. Məsələ bundadır ki, istənilən iri biznes layihəsini reallaşdırmaq üçün digər şərtlərlə yanaşı ilkin kapital qoyuluşu da tələb olunur. Həm də məhz yanacaq doldurma stansiyasının açılışı üçün tələb olunan bu kapitalın məbləği kifayət qədər böyük olmalıdır.
Məlumatı təqdim edən mənbələr isə DİA.AZ-a Seymur və Teymur qardaşlarının bu kapitalı zamanında qanunla qadağan olunmuş müəyyən məhsulların dövriyyəsindən əldə etdiklərini iddia edirlər. Digər tərəfdən isə daxil olan məlumatlarda bu yanacaq doldurma stansiyaları vasitələri ilə indinin özündə də maliyyə vəsaitlərinin qeyri-qanuni dövriyyəsinin həyata keçirildiyi qeyd olunur. Başqa sözlə desək, mənbələr IST Petrol yanacaq doldurma stansiyalarında “çirkli pulların yuyulması” prosesinin aparıldığını iddia edirlər.
Təbii ki, bu ittihamlar kifayət qədər ciddi olduğundan redaksiyamıza təqdim olunan bir çox təfərrüatların dərc olunmasını məqsədəuyğun hesab etmədik. Digər tərəfdən isə, irəli sürülən ittihamların təsdiq olunacağı təqdirdə, kifayət qədər irimiqyaslı beynəlxalq iqtisadi cinayətkarlığın qarşısı alına bilər. Düşünürük ki, ən azından müvafiq qurumlar tərəfindən IST Petrol yanacaq doldurma stansiyalarının fəaliyyətinin obyektiv şəkildə təftiş olunması bir çox qaranlıq məsələlərə aydınlıq gətirə bilər.
DİA.AZ-a daxil olan məlumatlarda deyilir ki, bu YDM şəbəkəsi uzun müddət oğru dünyasının məşkur simalarından olan “Lotu Bəxtiyar”ın adı altında da gizlənib. Belə ki, YDM şəbəkəsinin rəhbərliyi tərəfindən qəsdən belə bir şaiyələr də yayılıb ki, guya əldə olunan gəlirdən Bəxtiyarın yaxınlarına hər ay yardım edilir.
Hər halda bu faktların özünün də araşdırılması zərurəti var. Qarşı tərəfi də dinləməyə hazırıq. Bizi izləyin...
Geri qayıt