BAŞ PROKUROR TAPŞIRIQ VERDİ
28-02-2012, 13:33
ZAKİR QARALOV RAFİQ TAĞININ AİLƏ ÜZVLƏRİNİ QƏBUL EDİB
Baş prokuror Zakir Qaralov qətlə yetirilən yazar Rafiq Tağının ailə üzvləri və vəkili ilə görüşüb. “Media forum” saytının məlumatına görə, Rafiq Tağının qardaşları Alim Tağıyev, İlqar Tağıyev, həyat yoldaşı Mailə Tağıyeva və ailənin vəkili Elçin Sadıqov fevralın 27-də baş prokurorun qəbulunda olublar.
Alim Tağıyev “Media forum” saytına açıqlamasında deyib ki, Zakir Qaralov onları dinləyib, qətlin istintaqı haqda məlumat verib: “Baş prokuror bildirdi ki, Rafiq Tağının qətlinin üstünün açılması üçün əməliyyat-istintaq hərəkətləri davam etdirilir. Bizim yanımızda istintaq qrupunun üzvlərinə tapşırıq verdi ki, Rafiq Tağının vəkilinin verdiyi bütün vəsatətləri araşdırıb təmin edin”.
“Bu görüşdən sonra qardaşınızın qətlinin üstünün açılacağına ümidiniz artdımı” sualına Alim Tağıyev belə cavab verib: “Qatilin tapılacağına ümidimizi itirməmişik”.
Rafiq Tağı 2011-ci il noyabrın 19-da Bakıda, yaşadığı evin yaxınlığında bıçaqlanıb. Noyabrın 23-də o, müalicə olunduğu Kliniki Tibbi Mərkəzdə vəfat edib. İndiyədək bu cinayətə görə məsuliyyətə cəlb edilən olmayıb. Cinayət işi Baş Prokurorluğun Ağır Cinayətlərə Dair İşlər üzrə İstintaq İdarəsinin icraatındadır. İstintaq Cinayət Məcəlləsinin 120.1-ci (qəsdən adam öldürmə) maddəsi ilə aparılır.
Geri qayıt