“Bu gün baş verənlər, ordumuzun göstərdiyi qəhrəmanlıqlar teatr tamaşaları və kinolarımız üçün əsas mövzu olmalıdır”.
Bunu Moderator.az-a açıqlamasında Xalq artisti Valeh Kərimov bildirib. Xalq artisti hazırkı müharibənin qəhrəmanları ilə bağlı filmlərin çəkilməsinin, tamaşaların hazırlanmasının vacib olduğunu vurğulayıb:
“Əslində indinin özündə bu istiqamətdə addımlar atılmalıdır. Lakin bildiyiniz kimi, koronavirusla əlaqədar olaraq teatrlar da, kinoalar da qapalıdır, onların fəaliyyəti məhdudlaşıb.
1941-1945-ci illərin müahribəsi ilə bağlı çəkilən filmlərə nəzər salın. Bu günün özündə həmin müharibə ilə bağlı elə filmlər çəkilir ki, insan o filmlərə böyük heyranlıqla baxır. Bu gün bizim əsgərlərimizin etdikləri əsl igidlikdir.
Cəbhəyə könüllü gedən o qədər insanımız var ki, onlar haqqında gözəl bir film çəkmək, gözəl bir tamaşa hazırlamaq olar. Bunun özü bir qəhrəmanlıqdır. Onların hər birinin içində bir qəhrəmanlıq yatır. Bu baxımdan təbii ki, hazırkı müharibə və bu müharibənin qəhrəman iştirakçıları ilə bağlı filmlərin, tamaşaların hazırlanması olduqca zəruridir”.
