Korrupsiya dövlətin hər hansı qurumunda çalışan və ona etibar edilərək verilmiş səlahiyyətdən şəxsi mənfəəti üçün istifadə etmə halları adlanır
Bu termin əsasən bürokratik aparat və siyasi elita ilə bağlı işlənir. Yəni korrupsiya vəzifədə olanın vəzifə səlahiyyətlərindən yararlanıb qanunları saya salmadan bu və ya başqa məsələni hansısa bir cinayətkar, mafioz, inhisarçı qrupun xeyrinə həll etməsidir.
Ona görə korrupsiya dedikdə ancaq və ancaq vəzifədə olanlardan söhbət gedir. Sadə camaatı, hətta cinayətkar biznesmeni korrupsioner adlandırmaq olmaz. Həmin biznesmenin əməli rüşvət cinayətinə aiddir.
Korrupsiya isə yuxarıda qeyd edildiyi kimi, yalnız rüşvət, yəni konkret pul, bahalı əşya və s. alma anlamına gəlmir. Məsələn, hansısa məmurun müəyyən maraqlar naminə inhisarçı, cinayətkar qruplaşmanın xeyrinə qanundankənar hansısa göstəriş verirsə və bu göstəriş nəticəsində sadə insanlar zərər çəkirsə, bu artıq korrupsiya cinayətidir. Yaxud yüksək vəzifəli, siyasi rəhbərliyə aid olan şəxsin başçılığı altında dövlət vəsaitlərinin mütəşəkkil qrup halında talan edilməsi, mənimsənilməsi də korrupsiyaya aiddir.
Azərbaycan prezidenti İlham Əliyev ölkənin gələcək inkişafının korrupsiya ilə mübarizədən asılı olduğunu çıxışlarında dəfələrlə deyib.
Azərbaycan üçün korrupsiyanın “böyük bəla” olduğunu deyən ölkə başçısı onu sarsıtmaq üçün yalnız inzibati cəzaların deyil, həmçinin struktur islahatların da aparılaması zəruriliyini vurğulayıb.
Dövlət başçısı uğurli iqtisadi inkişafın, onun təbirincə, neqativ hallarla mübarizədən asılı olacağını daim vurğulayır.
Onun sözlərinə görə, əgər Azərbaycanı irəliyə aparmaq məqsədi qoyulubsa o halda korrupsiya ilə mütləq qaydada daha ciddi mübarizə aparılmalıdır:
“Korrupsiya böyük bəla və ləkədir. Onunla ciddi mübarizə aparılmalıdır. Həm inzibati cəzalar verilməli, həm də eyni zamanda struktur islahatlar aparılmalıdır”.
Bu yöndə güc prokurorluq orqanlarının üzərinə düşür. Bir də medianın. Bu haqda ötən sayımızda yazmışıq. Həm də Beyləqanda büdcənin necə talandığını fotolarla, faktlarla qeyd etmişik. Görünür yerli prokurorluq o qədər zəifdir ki, yerli məmurlara qarşı hərəkətə keçməkdənsə susqunluğa üstünlük verir.
Odur ki, faktları yenidən çatdıracağıq. Bu dəfə Baş Prokurorluq üçün. Çünki Beyləqanda korrupsiya artıq nəzarətdən çıxıb.
Konkret olaraq Beyləqan rayon İcra Hakimiyyətinin (RİH) Beyləqan şəhəri üzrə nümayəndəsi Bakir Balakişiyevin cinayətlərinə artıq göz yummaq olmaz.
Yol maxinasiyası
Beyləqan rayon İcra Hakimiyyətinin (RİH) Beyləqan şəhəri üzrə nümayəndəsi Bakir Balakişiyev 2015-ci ildə rayon rəhbəri Vaqif Abdullayev tərəfindən hazırki vəzifəsinə təyin olunana qədər Beyləqan Bələdiyyəsinin sədri işləyib. Yerli özünüidarəetmə qurumuna rəhbərlik etdiyi uzun müddət ərzində daha çox korruptiv əməlləri ilə yadda qalıb. Görünür, elə məhz bu “müstəsna” qabiliyyətinə görə icra başçısı onu daha mühüm, həm də daha münbit korrupsiya şəraiti olan dövlət qulluğu postuna irəli çəkib. Elə o vaxtdan hər il şəhərin abadlaşdırılması məqsədilə ayrılan 90-100 min manat civarında maliyyə vəsaiti Balakişiyevin sərəncamına verilib. Hətta ötəri, vizual müşahidə ilə də görmək mümkündür ki, bunca vəsaitin qarşılığında şəhərdə çox az abadlıq-quruculuq işləri həyata keçirilib. Görülən işlərin də keyfiyyətindən oğurlanıb. Bir məqamı da xüsusi qeyd etməyə dəyər ki, bu sahədə yerinə yetirilən işlərin əksər hissəsi iməcilik yolu ilə şəhərin idarə, müəssisə, təşkilatlarının əmək kollektivlərinin zorla cəlb olunduqları iməciliklər yolu ilə istismar edilmələri hesabına gerçəkləşdirilib. Və əlbəttə ki, işlərin həcmi şişirdilmiş rəqəmlərlə ifadə olunaraq şəhər nümayəndəliyinin aktivinə yazılaraq başçı ilə nümayəndəlik sədrinin hesabatlarında öz əksini tapıb. Keyfiyyəti oğurlanmış, göstəriciləri şişirdilmiş həmin işlərin sırası uzundur.
Realmedia-az.site ötən sayında açıq-aydın Beyləqandakı büdcə oğurluğu haqda yazıb. Qeyd etmişik ki, rayonda “səkisalma” prosesi altda dövlət büdcəsi talan edilir. Konkret ünvan, konkret şəxslər göstərilib.
Vurğulamışıq ki, səki maxinasiyalarını Mobil Həsənov reallaşdırır. Hansı ki, “STAR 2017” MMC-nin rəhbəridir. Onun arxasındakı şəxs və konkret korrupsiya piramidasını quran isə Bakir Balakişiyevdir.
Uşaqların yeməyinə göz dikən korrupsioner
Bakir Balakişiyevin “tamet” maxinasiyasından əlavə gəlir yeri şəhərdə fəaliyyət göstərən 6 uşaq məktəbəqədər təhsil müəssisəsinə aylıq ayrılan 1 (bir) ton ətiyoxa çıxarmasıdır. B. Balakişiyev Beyləqanın uşaq bağçalarını ətlə təmin edən “Meyvəli” firmasının Ağcabədi filialının rəhbərliyi ilə sövdələşməyə gedib.
Ümumiyyətlə, təkcə ət və ət məhsullarının deyil, ərzağın bütün digər növlərinin də çox hissəsinin icra nümayəndəsi və işbaz ortaqları tərəfindən “xırıd” edildiyi, həmçinin, uşaq müəssisələri rəhbərlərinin üzərinə aylıq 100 (bir yüz) manat haqq qoyulduğu qeyd olunur. Əlbəttə, Balakişiyevin həyat yoldaşının müdirlik etdiyi 1 saylı uşaq bağçası bu “taqsa”dan azaddır. Bağça 140 yerlik olsa da, burada günün eyni vaxtında uzaqbaşı 20-30 uşağı bir arada görmək mümkündür. Qalanların normativ üzrə kağız üzərində istehlak etmişlərmiş kimi göstərilən ərzaq payları (uşaq gününə düşən faktiki ərzaq xərcləri) isə mənimsənilir. Elə həmin məhdud sayda uşaqlara verilən yeməkdən də oğurlanır.
Qısası-Beyləqan şəhər icra nümayəndəliyi “Meyvəli” firması ilə arasında ərzaq məhsullarının siyahısında ət məhsulu qeyd olunsa da, uşaq bağçalarına verilən siyahıda ümumiyyətlə ət məhsulu göstərilmir. Yəni, Bakir Balakişiyev əlavə siyahı tətbiq edərək tabeçiliyində fəaliyyət göstərən uşaq bağçalarına nəzərdə tutulmuş əti siyahıdan çıxardıb.
Beyləqan şəhərində uşaq müəssisələrinin tələbatı, real faktiki xərci tam öyrənilmədiyindən, məktəbəqədər uşaq müəssisələrinə artıq inventar, avadanlıq, eləcə də təsərrüfat malları alınır. Satın alınan malların ehtimal olunan qiymətlərinin düzgün müəyyənləşdirilməməsi, funksional fəaliyyətinə aid olmayan alışların həyata keçirilməsi, mərkəzləşdirilmiş qaydada verilən əsas vəsaitlərin uçota qəbul edilməməsi kimi ciddi nöqsanlara yol verilir. Sadə dillə desək pul silinir , köhnə inventar təzə adı ilə qeyd edilir.
Ötən sayımızda qeyd etmişdik, 3 il qabaq prezident Beyləqana gələrkən H. Əliyev adına parkda yerləşən uşaq evinin açılışın edib. Keçən il noyabrda İlham Əliyev yenidən Beyləqana gələrkən ayrı uşaq bağçasının açılışı olub. Balakişiyevin göstərişi ilə 3 il qabaq açılmış uşaq baxçasındakı avadanlıqları, inventarları yeni təhvil verilən baxçaya daşıyıblar. Həyasızlığın, qanunsuzluğun da bir həddi olmalıdır.
Ardı var
MilliYol.Az
