Taksi fəaliyyəti ilə bağlı narazılıqlar artmaqdadır. Taksi xidmətində olan xaotik vəziyyət nəinki sərnişin və sürücüləri narahat edir, eyni zamanda ictimaiyyət arasında ciddi narazılığa, ictimai nəqliyyatın hərəkətinin pozulmasına, paytaxtda uzun tıxaclara səbəb olur. Taksi sürücülərinin bu fəaliyyətdən qazancları elə də çox deyil. Bəzən isə bank hesablarına köçən pulu taksi sürücüləri həftələrlə ala bilmirlər.
DİA.AZ-ın məlumatına görə, millət vəkili Azər Badamov "Şərq"ə deyib ki, taksi fəaliyyəti əhaliyə xidmətin bir növüdür. Deputatın sözlərinə görə, bu sahədə nəzarətsizliyin hökm sürməsi bir sıra xoşagələməz halların davam etməsinə yol açır: "Taksilərin əksəriyyətində natəmizlik hökm sürür. Elə halllar olur ki, taksi sürücüsü sərnişindən soruşmadan siqaret çəkməyə başlayır. Taksi şirkətlərinin tətbiqi ilə taksi sifariş edəndə çox hallarda taksi sürücüləri ödənişin nağdsız olduğunu biləndə gəlmirlər. Həm də yol kənarında əl qaldırıb taksi saxlayıb mənzil başına çatanda sürücünün dediyi məbləği ödəməli olursan. Elə hallar da olur ki, taksi sürücüsünün sağlamlıq durumu yerində olmur. Elə hallar da baş verir ki, taksini sifariş edib avtomobilə oturanda sifariş etdiyinə görə təəssüflənirsən. Yəni qısa olaraq qeyd etmək istəyirəm ki, taksi xidməti sahəsində özbaşınalıq davam edir. Bu halların davam etməməsi üçün bu sahədə nəzarət mexanizmi tətbiq olunmalı, taksilər üçün ciddi tələblər müəyyənləşməlidir".
A.Badamov vurğulayıb ki, bütün taksilərdə taksometrlər quraşdırılmalıdır: "Sərnişin taksometrinin göstəricisinə görə ödəniş etməlidir. Həm də taksilərdə posterminallar quraşdırılmalı və sərnişinin istəyinə uyğun nağd və ya nağdsız qaydada ödəniş edilməsinə şərait yaradılmalıdır. Taksi xidmətə başlayanda hər gün müəyyən məntəqədə həm sürücü, həm də avtomobil baxışdan keçirilməlidir. Düzdür, taksilərin şəhərdə çox olması rəqabəti gücləndirir və qiymətlərin aşağı səviyyədə qalmasına imkan yaradır. Digər tərəfdən, xoşagəlməz halların baş alıb getdiyini müşahidə etdikcə, bu sahədə mütləq şəkildə yeni qaydaların və tələblərin müəyyənləşdirilməli olduğunu hesab edirəm".