DİA.AZ: - Redaksiyamıza özünün Azərbaycanın əməkdar müəllimi adına layiq görüldüyünü və 2011\2012-ci tədris ilində ilin “Ən Yaxşı Müəllimi” müsabiqəsinin qalib olduğunu iddia edən şəxs tərəfindən təhsildəki problemlərlə bağlı bir müraciət daxil olub. Bildirək ki, müraciət müəllifi DİA.AZ-a yolladığı fikirlərinin anonim yayılmasını arzulayır. Həmin müraciətin mətnini diqqətinizə təqdim edirik və dia-az.site olaraq bəri başdan bəyan edirik ki, yazıda adları çəkilən bütün şəxslərin mövqelərini dinləməyə hazırıq:
“Yeni Təhsil nazirimiz Mikayıl Cabbarov haqqında həm Sizin saytınızda, həmdə digər saytlarda sosial şəbəkələrdə və başqa KİV-lərdə çoxlu tənqidi fikirlər söylənilir. Mən müəllimə olduğumdan yeni nazirin maliyyə fırıldağlarından, yarıtmaz kadr islahatlarından, gördüyü qanunsuz işlərdən yox, bir müəllimə kimi məni düşündürən dərsliklərin hazırlanması, nəşr olunması və məzmunu ilə bağlı işlər barədə fikirlərimi söyləmək istəyirəm.
Keçmiş nazirimiz Misir Mərdanov orta məktəblər üçün dərsliklərin hazırlanması və nəşr olunması işləri ilə bağlı çox tənqid olunurdu. Bəlkə də onun vəzifədən kənarlaşdırılmasının əsas səbəblərindən biri də onun bu sahədə yol verdiyi nöqsanlar idi. Ümüd edirdik ki, yeni nazir dərsliklərin hazırlanması, məzmunu və nəşri işlərində köklü dəyişikliklər edəcək və bu sahədə xeyli naliyyətlər əldə olunacaqdır. Lakin Mikayıl Cabbarov bir ildən artıq müddət ərzində dərsliklərin hazırlanması, məzmunu və nəşri sahəsində irəliyə doğru heç bir addım atmadı və bu sahədəki fəaliyyəti heç nə ilə yadda qalmadı. O zamanlar Misir Mərdanov nə qədər tənqid olunsa da belə, onun tərəfindən dərsliklərin məzmununun yaxşılaşdırılması, müasir dövrün tələblərinə uyğunlaşdırılması və dərsliklərin nəşri üçün optimal metodların seçilməsində xeyli işlər görülürdü. Ən azından hər il ilin ən yaxşı müəllimləri müəyyən olunurdu və onların içində dərslik yazmaq, hazırlamaq, işində səriştəsi bacarığı olan pedaqoqlar ya müəllif kimi ya da ki, ekspert kimi bu işlərə cəlb olunurdular və onlar da bu sahədə xeyli işlər görürdülər.
Bildirmək istəyirəm ki, mən özüm də ekspert kimi bir neçə dəfə bu işlərə cəlb olunmuşam. Çox zaman şəxsən nazir və onun bu sahəyə baxan müavini bizi qəbul edib və saatlarla müzakirələr aparırdıq. Hesab edirəm ki, yeni nazirimiz Mikayıl Cabbarovun bu işləri görməyə nə biliyi, nə bacarığı, nə də səriştəsi çatmır. Keçmiş nazirin dövründə internet saytlar, qəzetlər və digər KİV-lər Tələbə Qəbulu üzrə Dövlət Komissiyasının Təhsil Nazirliyi ilə bu sahədəki “dueli” barədə tez-tez məlumatlar yayırdılar. Sanki Mikayıl Cabbarov yeni nazir təyin olunduqdan sonra TQDK tərəfindən qurbağa gölünə bir daş atılıb.
Sizin saytınaız vasitəsi ilə mən TQDK-nin sədri Məleykə Abbaszadəyə müraciət edirəm: “Hörmətli Məleykə xanım, Misir Mərdanov vəzifədən uzaqlaşdırıldıqdan sonra dərsliklərin məzmununda müsbətə doğru köklü dəyişikliklər baş verdimi? Əgər doğurdan bu belədirsə, xahiş edirik ya Siz, ya da rəhbərlik etdiyiniz qurumun bir yetkili şəxsi sosial şəbəkələrdə və yaxud da ki, KİV-lərdə pedaqoji və təhsil ictimaiətini məlumatlandırsınlar. Bunu etmirsinizsə o, zaman belə çıxır ki, Siz Misir Mərdanovla intriqa aparırdınız. Təhsilin idarə olunması işi ilə əlaqəli bir şəxs olduğunuzdan, hesab edirik ki, Siz təhsilə faydası olmayan işlərlə məşğul olurdunuz və bu gün həmin qurumda rəhbər olmağa layiq deyilsiniz.
Hal-hazırda dərsliklərin hazırlanması işində Misir Mərdanov dövründən qalan nöqsanlar hələ də mövcud olduğundan, bəlkə də həmin nöqsanlar daha çox artdığından Sizin bu işlərə biganə qalmağınız və susmağınız biz müəllimləri çox təccübləndirir. Əgər bu nöqsanlar var idisə və yenə də davam edirsə, bunun qarşısının alnması üçün niyə addımlar atmırsınız? Bax ona görə də təhsilimiz irəliyə getmir, intriqaların ucbatından dərin bir bataqlığa düşüb”.
O ki, qaldı yeni nazirimizin bu sahədə ki, fəaliyyətinə onun nəticələri bizi bədbinliyə sürükləyir. Nə nazirimiz pedaqoqdur nədə ki, onun kommersant müavini Ceyhun Bayramov. Mən bir əməkdar müəllimə kimi mənəvi cəhətdən sarsıntı keçirdirəm. Necə ola bilər ki, Azərbaycan təhsili, təhsildən çox çox uzaqda olan bir nazir və müavini tərəfindən idarə olunur. Bu sahədə səriştələri olmadığından, indi də özlərindən qanunlarımıza zidd yeni qaydalar icad ediblər: müəllimlərin qiymətləndirilməsi və müəllimlərə and içdirilməsi. Əgər qiymətləndirməkdirsə ilk növbədə bir dövlət qulluqçusu kimi nazirliyin aparatının işçilərinin fəaliyyəti qiymətləndirilisin. Bunu biz müəllimlər yox, Dövlət Qulluğu haqqında qanun belə tələb edir və yaxud da and içməkdirsə bir dövlət qulluqçusu kimi Təhsil Nazirliyin aparatının işçiləri and içsinlər.
Bunu da Dövlət Qulluğu haqqında qanun belə tələb edir. And içə bilməzlər, çünki yeni nazirin, nazirliyin aparatına cəlb etdiyi işçilərin əksəriyyəti ya dövlət qulluğunda heç vaxt çalışmamış ya da ki, Dövlət Qulluğu Məsələləri üzrə Komissiyanın müsabiqə və müsahibəsindən keçməmiş adamlardır. Bəyəm təhsil nazirliyinə bir tanınmış pedaqoq, bir təcrübəli təhsil işçisi nazir müavini təyin oluna bilməzdi. Mütləq gərək nazir müavini Mikayıl Cabbarovun yerlisi - gədəbəyli Ceyhun Bayramov gətrilməli idi? Mütləq gərək Maliyyə nazirinin müavini, dövlətin baş xəzinadarı gədəbəyli Azər Bayramovun kommersant və biznesmen qardaşı Ceyhun Bayramov təyin olunmalı idi? Bəs bilmirlərmi ki, bir ailədən iki qardaşdan birinin Maliyyə nazirinin müavini digər qardaşın isə Təhsil nazirinin müavini təyin etməklə, bu qardaşlar əlbir olub təhsilə ayrılan dövlət vəsaitlərinin talan edəcəklər?
Düşünürdük ki, 2013\2014-cü dərs ili üçün hazırlanmış dərsliklərin məzmununda müəyyən dəyişiklik etmək üçün yeni nazirin kifayət qədər vaxtı olmadığından bu sahədə müəyyən işlər görə bilmədi. Ona görə də gözləyrdik ki, 2014\2015-ci tədris ili üçün hazırlanacaq dərsliklərin məzmununda faydalı işlər görüləcək və köklü dəyişikliklər aparılacaq. Ancaq bu sahədə cüzü də olsa irəlləyiş olmadı xeylidə geriyə düşdük. Dərsliklərin hazırlanması, nəşri və çapı üçün heç bir tender, müsabiqələr elan olunmadı. Necə deyərlər, yenə də “dədə -baba” qaydasına üstünlük verildi. Yenə “köhnə hamam-köhnə tas” prinsipi tətbiq olundu.
Bir zamanlar nazir Misir Mərdanovun rəhbərlik etdiyi dövrdə dərslik şöbəsinin müdiri olmuş Əsgər Quliyevin fəaliyyəti dövründə şəxsən Ulu Öndər Heydər Əliyev tərəfindən məktəb dərsliklərində bağışlanmaz, çox ciddi və kobud səhvlərin olduğu müəyyənləşdirildiyindən, Əsgər Quliyev işində yol verdiyi ciddi nöqsanlara görə tutduğu vəzifədən azad olunmuşdur. Belə olduğu halda Mikayıl Cabbarov tərəfindən Əsgər Quliyevin yenidən dərslik şöbəsinə rəhbər işə gətirilməsi heç də bu işlərdə müsbət nəticələr əldə edilməsindən xəbər vermir.
Bir qabaqcıl təhsil işçisi kimi Təhsil Nazirliyinin yeni rəhbərliyinin bu sahədə görə biləcəyi, əldə edə biləcəyi bir müsbət nəticəni gözləmirik. Ancaq həm pedaqoji ictimayyət həmdə mətbuatın bu işlər barədə susmağı şəxsən məni çox təcübləndirir. Hesab edirəm ki, Təhsil Nazirliyini hazırlanacaq dərsliklərin məzmunundan çox onların hazırlanmasına çəkiləcək dövlət vəsaitlərinin mənimsənilməsi daha çox maraqlandırır. Əgər bu belə olmasaydı, nazir Mikayıl Cabbarov gözdən pərdə asmaq işləri ilə deyil, təhsilimizi irəliyə apara biləcək, onun keyfiyyətinin artmasına gətirib çıxara biləcək işlərlə məşğul olardı. Bir pedaqoq kimi hesab edirəm ki, müəllimlər üçün imtahanların keçirilməsi əslində təhsili idarə edənlərin, yəni məktəb direktorların, təhsil şöbə müdirlərinin və təhsil nazirliyin rəhbər işçilərinin cibinə xidmət edir.
Hesab edirəm ki, Hörmətli Prezidentimiz sizin saytınız vasitəsi ilə biz müəllimlərin fikri ilə tanış olsa, nazir Mikayıl Cabbarov və onun biznesmen müavini Ceyhun Bayramov haqqında tədbir görəcəkdir. Allah bizi belə səriştəsiz rəhbərlərdən qorusun”.
DİA.AZ olaraq bir daha vurğulayırıq ki, adları çəkilən bütün şəxslərin mövqelərini dinləməyə, işıqlandırmağa hazırıq.
