DİA.AZ: - Respublikanın Əməkdar müəllimi, Prezident mükafatçısı, şair, Gəncə şəhər Veteranlar Şurasının üzvü, 1995-ci ildən YAP-ın üzvü, “Qızıl Qələm” mükafatı laureatı Həsənov İlham Musa oğlu ölkə rəhbərliyinə 18-ci müraciətini ünvanlayıb. Bir nüsxəsi də DİA.AZ-a daxil olan müraciətdə deyilir:
"Mən 66 yaşında belə özbaşınalıq, belə anarxiya görməmişəm. Bu ona görə belədir ki, vaxtı ilə Heydər Əliyevə söyənlərin balaları hakimiyyəti zəbt edib, vəzifəyə gətirilib və bunlar da düşünülmüş formada bizlərdən qisas alırlar. Biz dövlət və dövlətçiliyə xidmət edənlərik. Yəqin ki, bu müraciətimiz ölkədə təlatümə səbəb olacaq. Çox maraqlıdır, Azərbaycan Respublikası Təhsil Nazirliyinin rəhbərləri öz verdiyi əmrlərin əksinə çıxıb Nazirliyin öz qaydalarına əməl etmirlər. Prezident tərəfindən təsdiq olunan Təhsil qanununun maddələrini belə pozurlar.
Təhsilə düşmən kəsiliblər. Məsələn: Məni və Valeh müəllimi, Respublikanın Əməkdar müəllimlərini qərəzli şəkildə işdən çıxartdılar. Qaydalarda yazılır ki, ictimaiyyət arasında nüfuzu olan, kollektivdə hörmət qazanan, dövlət təltifi olan, fəxri adları olan müəllim və məktəb direktorları 70 yaşa qədər ildə 1 dəfə müqavilə bağlamaq yolu ilə işləyə bilər və paralel olaraq bildirilir ki, bu zaman Ərazi Maliyyə İdarə rəislərinin rəyi nəzərə alınmalıdır. Bu rəy isə vaxtında alınmayıb. Əksinə Maliyyə İdarəsi rəisindən gizlədilib. Yalnız bizim şikayətimizdən sonra bu insandan rəy tələb ediblər. O da bizi tərifləyib. Deməli buradan belə çıxır ki, biz həqiqətən qərəzli şəkildə işdən çıxarılmışıq. Bütün bunları edən Gəncə şəhər Təhsil idarəsinə müdir göndərilən, təhsildən, məktəbdən anlayışı və xəbəri olmayan Aqrar Universitetinin məzunu, SOROS-un tərbiyəsini almış bir adam, pedaqogikanın və psixologiyanı, məktəbşünaslığı dərk etməyən, psixoloji durumunda problem olan Anar Qədiməliyevdir. Faktiki olaraq bu insan Gəncə təhsilini uçuruma aparır, təhsil bərbad hala salınıb. Heç kimi qəbul etmir, elə bil ki, bunu Gəncə müəllimlərinə qəsd etmək üçün göndəriblər və buna deyiblər ki, get Gəncə təhsilini dağıt, nə istəyirsən elə arxanda biz durmuşuq. Həqiqətən də bunun arxasında özü kimi qeyri-peşəkar adamlar Aqrar Universitetinin məzunu, Təhsil Nazirliyinin rəsmisi Orxan Abbasov və Beynəlxalq Münasibətlər fakültəsini bitirən, vaxtı ilə Xarici İşlər Nazirliyinin işçisi, sonradan dolayı yolla Təhsil Nazirliyinə gətirilən nazir müavini Muxtar Məmmədov və İnsan Resursları şöbəsinin müdiri Eşqi Bağırov durur. Məhz bu adamların əli ilə respublikada 300 nəfərə yaxın sıravi məktəb direktorları, hətta yaşları 75-85 olanlar yuxarıdan tapşırılmaqla və ya rüşvət verməklə işdə saxlanılıblar. Eyni qayda da Gəncə şəhərində bizi çıxardıb yaşda bizdən böyük, göstəriciləri bizdən daha aşağı olan 5 №-li orta məktəbin direktoru Bəhram İmranovu işdə saxladılar. İndi 17-müraciətdə biz bu real faktları göstərdiyimiz təqdirdə bu reallığa əks-səda verən yoxdur. Bu adamlar görün nə qədər harınlayıb və nə qədər hayıxıblar ki, bu ilin iyul ayında Gəncə şəhər 16 nömrəli məktəbdə olan MİQ-də cinayət işi törətdilər, sualları düşünülmüş formada payladılar. Bu cinayətin üstü açılan kimi imtahan nəticələri ləğv olundu və nəzarətçilər imtahandan qovuldu. Ancaq öz əməlləridir deyə bu barədə də heç bir ciddi tədbir və ölçü götürülmədi. İndi sual olunur: Əgər bu işdə cinayət halı yox idisə niyə imtahan nəticələri ləğv olunur və nəzarətçilər imtahandan qovulurdu? Yox əgər cinayət varsa niyə bu günə qədər günahkarlar cəzalandırılmadılar?
Bu cinayət xarakterli məsələ də ört basdır edildi. Bu işin başında da təşkilatçılarından biri Anar Qədiməliyevdir. Daha sonra Gəncədə 14 №-li orta məktəbin direktoru Elnur Qasımov 2018-ci ildə 22 №-li məktəbin ingilis dili müəllimi ilə özünün və qarşı tərəfin də ailəsi ola-ola eşq macəraları yaşamış və bundan da qeyri-rəsmi bir qız uşağı olmuş bir adamı Təhsil Nazirliyinin təkidi ilə işdən çıxartdılar. Çünki, qızın qayınatası Nazirliyə şikayət yazmışdı ki, bu adam mənim oğlumun evini dağıdıb, bunu necə işdə saxlayırsınız. Lakin həmin Elnur Qasımov Anar Qədiməliyevlə 39 №-li məktəbdə bir sinifdə oxuduğuna görə üstündən cəmi 2 il keçməsinə baxmayaraq onu 2020-ci ilin oktyabr ayında yuxarıdakı dostlarının əli ilə yenidən bu dəfə Gəncə şəhər 8 №-li orta məktəbə direktor göndərdi. İndi deyin buna nə ad vermək olar? Daha sonra Nazirlikdə işləyən Orxan Abbasov vaxtı ilə Gəncə şəhər İcra Hakimiyyətində işləyən və şəhər İcra Hakimiyyətinin başçısı Eldar Əzizovun əmri ilə dələduzluq üstündə qovulan qayınatası Məzahir Rəhimovu bu dəfə yenidən Gəncədə açılan fizika-riyaziyyat təmayüllü liseyə direktor müavini təyin etdirdi. Qaynanası Təranə Rəhimovaya isə 20 saat bədən tərbiyəsi dərsini qeyri qanuni verdirdi. Anar Qədiməliyev isə atası Yusif Qədiməliyevi 2 saylı peşə liseyinə baş usta vəzifəsinə təyin etdi. Deməli bu adamlara hər şey olar, bu adamlar qanun poza bilərlər. Amma digərlərinə heçnə ola bilməz. Bu adamların bir devizi var. �?Babam mənə kor deyib, gələn-gedənə vur deyib’
Bu adamlar həqiqətən heç kimdən qorxub çəkinmədən rəiyyəti tapdalayırlar daha fikirləşmirlər ki, bir gün tələ yiyəsi gəlib çıxacaq. Allah Məşədi ibada rəhmət etsin! Yadıma bir məsələ düşdü. Görəsən 300 nəfər sıravi direktorların və Gəncədə Bəhram İmranovun nəyi Təhsil Nazirliyinin xoşuna gəldi ki, bunları işdə saxladı? Qoy mən sizə deyim. Əsas malı, varı-dövləti, pulu, bunlar əsas şərtdirlər. Mən və Valeh müəllim də isə bunlar yoxdur. Emin Əmrullayev ayıbdır, bəsdir öz işçilərini xüsusilə Gəncə şəhər Təhsil idarəsinə layiq olmayan müdiri Anar Qədiməliyevin mənfi hərəkətlərinə don geyindirib haqq qazandırdınız. Gəncə şəhər Təhsil idarəsinə təyin etdiyiniz Anar Qədiməliyev hər yerdə vurğulayır ki, mən ona görə heç kimdən qorxmuram ki, mənim arxamda Emin Əmrullayev durur. Biz onunla Amerikada oxumuşuq və onunla yaxın dostuq. Hətta Anar Qədiməliyevin işinə davam etməsi üçün müqavilə bağladığı Bəhram müəllim hər yerdə deyir ki, nə qədər ki, Anar Qədiməliyev Gəncədə müdirdi, pulumu vermişəm, qalıb işləyəcəm. Hələ üstəlik Gəncə camaatı danışır ki, Eşqi Bağırovun gəl ha gəlidi. Bizim yerimizə təyin ediləcək namizədlər də müəyyənləşib. Bunlar 39 və 15 nömrəli məktəbin direktor müavinləri Vüsal və İftixar müəllim və 27 nömrəli məktəbin müəlliməsi Mehriban müəllimədir. Həmin adamlar da Orxan Abbasovun komandasıdır. Emin Əmrullayevi bu məsələlər dərindən düşündürməlidir.
Birdə Prezident Aparatının səlahiyyətli, vəzifəli şəxsləri prezidenti və Mehriban xanımı azacıq da olsa istəyirlərsə bu işləri ciddi nəzarətə götürməli, qətiyyətli addım atmalı və təcili tədbirlər görməlidirlər .
Cənab Prezident və Mehriban xanım. Sizdən xahişim odur ki, mənim daxilimdən gələn bu ürək yanğısını duyub Təhsil Nazirliyinin rəhbərliyinə xüsusi göstəriş verəsiniz. Sonda yenə deyirəm əlimi sizdən üzmürəm, mənim ümid pənahım yalnız və yalnız sizsiniz. İnşallah bu dəfə müsbət cavab gözləyirəm".
İddia olunanlarla bağlı dia-az.site olaraq bütün maraqlı tərəfləri dinləməyə hazırıq...
