DİA.AZ: - "Torpaqlarımıza yağı saldırısının ilk günündən AMEA-nın aspirantlıq şöbəsində təhsilimi, elmi işimi atıb, iki körpə uşaqlı ailəmi Allahın ümidinə qoyub Qarabağ uğrunda savaşa getməyim və bu yolda ağır baş beyin kontuziyası alaraq şərəfli qazi adı qazanmağım kimə gizlin olsa da, son xidmət yerim olan DİN Daxili Qoşunlarına gizlin olmaz". Bu barədə DİA.AZ-a göndərilən məqalədə deyilir.
Məaqlədə daha sonra bildirilir: "Di gəl , bu hərbi qurum özünün 1-ci dərəcəli Qarabağ qazisinə hərbi qanunvericiliyin tələbinə uyğun olaraq nə işdənçıxarma pulu, nə geyim - əşya kompensasiyası, nə məzuniyyət – ezamiyyət pulu, nə sığorta ödənişi , nə sanatoriya yollayışı və əvəzində kompensasiya verib, nə xidmət ili , pensiyası düzgün hesablanıb, nə rütbəsi artıb, nə sosial-tibbi, mənzil güzəştləri tətbiq edilib , nə inzibati və məhkəmə təminatı , nə müraciət etmək, nə də özbaşınalıqdan müdafiə hüququ tanınıb. Əksinə, özbaşınalıqdan Prezidentə və baş prokurora müraciət Daxili Qoşunlar Baş İdarəsinin özünün(mü?) 1-ci dərəcəli Qarabağ qazisindən 30 milyon manat “şərəf haqqı” tələb etməsi ilə sonuclanıb. Bəs ali dövlət hakimiyyəti orqanları , Baş prokuror , Maliyyə Nazirliyi, Hesablama Palatası , Ombudsman – insan hüquqları üzrə müvəkkil bu açıq- aşkar insan hüquqları pozuntusuna, tənqidə - müraciətə görə təqib olunmağa, bütün hüquq və güzəştlərdən məhrum edilməyə nə deyir? Bəs hərbi qanunvericiliyin icrasına və tətbiqinə nəzarət etməli olan hərbi prokurorluq görəvini necə yerinə yetirir? Nə yazıq, hərbi prokurorluq Daxili Qoşunların qanunsuzluğunu, saxtalığını, Konstitusiyaya, qanuna hörmətsizliyini qeyri-prosessual sifarişlə Konstitusiya aktı kimi qəbul edir. Hərbi prokurorluğun hərbi qanunvericilikdən nəyin qarşılığında xəbərsiz olduğu bir yana , heç “iddianın mümkün sayılmaması” ilə “iddianın təmin edilməməsi” anlayışlarının fərqini də bilməməsinin nədən qaynaqlandığı qaranlıqdır. Qanunların icrasına və tətbiqinə nəzarət edən orqan bilmir ki, iddianın mümkün sayılmaması haqqında qərardad işə mahiyyəti üzrə baxılmaması deməkdir? !
Milli Məclisin parlament nəzarəti altında şikayəti araşdırmağa məcbur olan hərbi prokurorluğun hərbi təsisatlarda qanun pozuntuları barədə məlumatların araşdırılması şöbəsi 12 yanvar 2022-ci ildə günün ikinci yarısında izahatımı aldı və. ..ertəsi gün 13 yanvar 2022-ci il tarixli məktubla şöbə rəisi, ədliiyə polkovniki Aydın Ələsgərov bildirdi ki, işdənçıxarma pulunun , geyim-əşya kompensasiyasının, məzuniyyət – ezamiyyət pulunun, sığorta ödənişinin, sanatoriya yollayışı və əvəzində kompensasiyanın , mənzil təminatı və digər ödənişlərin verilməsi, desant-hücum taburunun komandiri olduğum halda olmayan kimya müdafiə bölüyünün komandir müavini vəzifəsinin yazılaraq pensiyamın tabeliyimdə olanlardan 2-3 dəfə az olması , hesablama vərəqinin verilməsi, əlilliyə görə pensiyaya əlavələrin verilməsi və məhkəmə təminatı hüququna qadağanın aradan qaldırılması Prokurorluq orqanlarının səlahiyyətinə aid deyildir. Təbii ki, bu başdansovdu cavabdan yuxarı prokurora şikayət etdim və şikayətimə yenə də Aydın Ələsgərov “ 13 yanvarda cavab verilməsi” cavabı ilə cavab verdi . Yenə də Milli Məclis Aparatının dövlət quruculuğu, inzibati və hərbi qanunvericilik şöbəsinin müdir müavini Eldar Əsgərov yardımıma çatıb şikayətimin araşdırılmalı olmasını Baş prokurorluğun nəzərinə çatdırıb, Milli Məclisə məlumat verilməsini bildirdi. Obyektiv araşdırılma aparılmasını gözlədiyim halda, hərbi prokurorluğun şöbə müdiri Aydın Ələsgərovun 28.02.2022 tarixli DİN-in Daxili Qoşunlarının (DQ) yalan, saxta məlumatını Konstitusiya aktı kimi qəbul edən cavabı ilə üzləşdim. Hərbi prokurorluq yazır ki, 12.01.2022-ci il tarixli izahatımda DİN-in Daxili Qoşunlarında xidmət edən heç bir vəzifəli şəxsin məndən pul və sair maddi nemət istəmədiyini bildirmişəm. Bəli, bildirmişəm ki, məni heç Daxili Qoşunlar Baş İdarəsinin qapısından içəri buraxmırlar, mənimlə düşmən kimi davranırlar, harda məndən rüşvət tələb edəcəklər? Amma məndən rəsmi qaydada Prezidentə və baş prokurora müraciət etdiyimə görə 30 milyon “şərəf haqqı” tələb edilməsi haqqında iddia ərizəsini və məhkəmə bildirişi və s. sənədlər prokurorluğa təqdim edilib. Xidmət ilimin güzəştlə 4 il 15 gün olduğunu bildirən şöbə rəisi, DQ-də xidmətimin bir
təqvim ilindən az olduğuna, 1991-93-cü illərdə zabit rütbəsində xidmətdə olmağım barədə DQ-də məlumat olmadığına görə, xidmət illərinə görə əlavənin verilməsindən imtina edilməsini qanuni sayıb. 1978-ci ildən zabit rütbəsi daşıyan şəxsin 13 il sonra -1991-ci ildə sıravi xidmətdə olması absurdluğunu bir qırağa qoyaq, axı Konstitusiya Məhkəməsinin 27.03.2014 tarixli “Hərbi qulluqçuların pensiya təminatı haqqında” və “Əmək pensiyaları haqqında” Azərbaycan Respublikası Qanunlarının bəzi müddəalarının zamana görə tətbiq edilməsi baxımından şərh edilməsinə dair” Qərarında doğrulanıb ki, “Hərbi qulluqçuların pensiya təminatı haqqında” qanunun qüvvədə olduğu zaman pensiyaya çıxmış hərbçilərə xidmətin güzəştli sayılan hissəsi tətbiq edilməlidir. Hərbi prokurorluq niyə Konstitusiyanı yox, Daxili Qoşunların qanunsuzluğunu müdafiə edir? Eyni zamanda, NK-nın 23 noyabr 631 saylı “Zabit heyətinə mənsub şəxslərə, gizirlərə, miçmanlara, müddətdən artıq həqiqi hərbi xidmət hərbi qulluqçularına, daxili işlər, ədliyyə, gömrük, miqrasiya, fövqəladə hallar və vergi orqanlarının rəis və sıravi heyətinə mənsub şəxslərə və onların ailələrinə pensiya təyin edilib hesablanması üçün uzun müddət xidmət vaxtının hesablanması qaydası haqqında” qərarının 10-cu bəndində SSRİ dövründəki xidmətin də xidmət illərinə əlavə edilməsi doğrulanıb. Hərbi prokurorluğun bu qərardan da xəbəri yoxdur? Olsaydı, DİN DQ-nin yalanınını, qanunsuzluğunu , müdafiə nazirinin 05.06.2002 tarixli əmrini NK-nın həmin qərarından, Konstitusiyadan üstün tutmazdı. Sözügedən qərarın 3a bəndində yazılıb ki, səhhətinə görə tərxis olunanlara vəzifə və rütbə maaşlarının beşqat həcmində işdənçıxarma pulu verilir. DİN-in tabeliyində olan Daxili Qoşunların NK-nın “Polis əməkdaşının maddi və sosial təminatları ilə bağlı qaydaların təsdiq edilməsi haqqında” 20.04.2000 tarixli 73 saylı (04.12.2001-ci ildən DQ-yə də aid edilib) qərarını yox, müdafiə nazirinin Qarabağ qazisinə aidliyi olmayan əmrini əsas tutub işdənçıxarma pulunu verməkdən imtinasını hərbi prokurorluq hansı haqla haqlı sayır? Bu qərarın 2-ci bəndində daxili işlər orqanlarının əməkdaşlarının xidmət zamanı yaralanma (travma , kontuziya) səbəbindən xidmətdən azad edilməsi zamanı ərzaq payı çıxılmaqla təminat xərcliyinin ƏLLİ MİSLİ MİQDARINDA birdəfəlik kompensasiya ödənilməsi doğrulanıb. DİN DQ və hərbi prokurorluq müəyyən edib ki, daxili işlər nazirinin əmri ilə 07.08.2007-ci ildə geyim attestatı və cədvəli ləğv edildiyindən geyim-əşya kompensasiyasının verilməsi mümkün olmayıb. Nağıla baxın, gah müdafiə, gah da daxili işlər nazirinin əmri qanundan, NK-nın qərarından üstün tutulur . Bəs məzuniyyət, ezamiyyət pulu niyə verilməyib? Bəs “Hərbi qulluqçuların pul təminatı haqqında” Əsasnaməyə görə, ehtiyatdan xidmətə qəbul edilən hərbi qulluqçulara xidmət müddətindən asılı olmayaraq onların hərbi rütbəsindən bir -üç pillə yuxarı hərbi rütbə verilə bilməsi? Buna da nazirlər qadağa qoyub? Bəs “Hərbi qulluqçuların pensiya təminatı haqqında” 29.04.1992 tarixli qanunun 15v və 23b maddələrinə əsasən 1-ci dərəcəli Qarabağ qazisinin pensiyasına minimum pensiya məbləğinin uyğun olaraq 300 və 100 faizlik miqdarında əlavə niyə hesablanmayıb? Buna kim qadağa qoyub? O ki qaldı döyüşçüyə mülki kimya vəzifəsinin yazılmasına, buna heç bir əmrlə haqq qazandırmaq olmaz. Təsəvvür edin, döyüşlərdə , hücum əməliyyatlarında iştirak edən , yaralanan döyüşçüyə kimyaçı yaxud meyxanaçı vəzifəsi yazılıb! (?) Yox bir xor döyüşçüsü! Hərbi prokurorluğun NK-nın qərarlarını DQ-nin yalanından aşağıda tutması bir yana, bu yalanı olduğu kimi köçürüb Konstitusiya aktı kimi hüququ pozulan qaziyə və qanunverici orqana sırıması ölkədə insan hüquqlarının qorunmadığını tam çılpaqlığı ilə ortaya qoyur. Belə çıxır, nazirlər qanunlara, fərmanlara, qərarlara əmrləri ilə qadağa qoymaqla məşğuldurlar , nəzarətedici qurumlar , özəlliklə prokurorluq bu “baş-ayaq” qadağa hüququ”na haqq qazandırır?
Hərbi prokurorluğun hərbi qanunvericilikdən xəbərsiz olmasını təkcə savadsızlıqla bağlamaq mümkün deyil. Nədən neçə ildir “Hərbi qulluqçuların pensiya təminatı haqqında”, “Hərbi qulluqçuların statusu haqqında” , “Hərbi xidmətkeçmə haqqında” və s. qanunlar , NK-nın qərarları diqqətə çatdırılır. Və belə savadsızlıqla, axı mühüm post tutulması da attestasiya oluna bilməz. Bir də məhkəmə qaydasında da hərbi qanunvericiliyin tələbinə yox, iddianın mümkün sayılmaması sifarişinə əməl edilir. İddianın mümkün sayılmaması isə işə mahiyyəti üzrə baxılmaması deməkdir və prokurorluq da
işi mahiyyəti üzrə araşdırmaqdan imtina edir. Vətəndaş (qazi) neyləsin, kimə üz tutsun? Problem ondadır ki, hərbi qurumların qeyri-prosessual sifarişi ilə çıxarılan hoqqa (başqa ifadə mümkün deyil ) qərarlar da verilmir ki, Konstitusiya Məhkəməsinə, Avropa İnsan Hüquqları Məhkəməsinə müraciət etmək mümkün olsun. Hələ ki , ölkədə “dedığım dedığdır” özbaşınalığı hökm sürür. Konstitusiyadan yararlanmaq isə yataqdan oğurlanmaq, 30 milyon manat tələb edilməsi ilə sonuclanır".
İddia olunanlarla bağlı dia-az.site olaraq bütün maraqlı tərəflərin mövqelərini işıqlandırmağa hazırıq...
