MAHİR LƏNKƏRANİNİN İRAN XƏFİYYƏSİQYLƏ ŞOK ƏLAQƏLƏRİ AÇIQLANDI
DİA.AZ: - Redaksiyamıza “Azəryolservis ASC-nin prezidenti Cavid Qurbanovun sürücüsü olmuş Mahir Lənkərani ilə bağlı ilginc faktlar daxil olub. Oxucularımız üçün də bu faktların maraqlı olacağını təxmin edərək, DİA.AZ-a daxil olan məqaləni olduğu kimi diqqətinizə təqdim edirik. Özünün uzun müddət ərzində “Azəryolservis” ASC-də işlədiyini söyləyən müəllif yazır:
“Öncə Mahir Lənkərani haqqında…
Yəqin ki, bu adamın adı sizlərə də tanışdır. Əsl adı Mahir Allahverən oğlu Quliyevdir. «Azəryolservis» ASC-nin prezidenti Cavid Qurbanovun sürücüsü işləyib və məhz İranın xüsusi xidmət orqanları ilə şübhəli əlaqələrindən dolayı bu gün axtarışdadır.
İranın məşhur ayətullahlarından olan Fazil Lənkəraninin şəninə özünə Lənkərani soyadını götürüb və 2007-ci ildə bu soyadını hətta rəsmiləşdirib də. Fazil Lənkəraninin Azərbaycan dövlətinə və dövlətimizin rəhbərliyinə, xüsusən də prezidentimizin ünvanına hansı ağır ifadələri işlətməsini isə kimsə unutmayıb. Yəni hər zaman antiAzərbaycan ruhlu mövqeyi ilə seçilən Fazil Lənkəraninin əslində Azərbaycan əleyhinə fəaliyyət üçün azərbaycanlıların cəlb edilməsi xəttinə rəhbərlik etməsi də gün kimi aydındır.
Və belə bir adamla Mahir Lənkəraninin münasibətləri olub. Nəinki olub, hətta Mahir Lənkərani ölümündən iki ay əvvəl Fazil Lənkəranini ziyarət etmək «xoşbəxtliyinə» də nəsib olub. Bu isə hər kəsə nəsib olası, qıyılası «xoşbəxtlik» olmadığından Mahir Lənkəraninin İran xəfiyyəsi üçün hansı əhəmiyyətdə bir fiqur olduğunu çılpaqlığı ilə ortaya çıxaran ciddi faktdır.
Mahir Lənkərani öldürülməyib…
Bu arada mətbuatda belə bir informasiya getdi ki, Mahir Lənkərani öldürülüb. Bu, tamamən yanlış bir məlumat idi. Və versiya irəli sürülmüşdü ki, Mahir Lənkərani yüksək ranqlı məmurlardan biri ilə bağlı məxfi məlumatlara hakim olduğundan onu aradan götürüblər və elə onun qaçaq salınması da məhz həmin məmurun sayəsində baş tutubmuş.
Amma reallıq tamam başqadır. Mahir Lənkərani bu ilin 10 ayı ərzində 3 dəfə Azərbaycana giriş-çıxış edib. Hər 3 səfərini qısa müddətə baş vurub. İki səfərində cəmi 1 gün qalsa da, digər səfərində 2 gün qalıb. Və bu səfəri də sonuncu səfəridir.
Onun Azərbaycana niyə gəldiyini təxmin etmək də olar. Mahir Lənkərani bu gün də ciddi məmurların himayəsi altındadır. Əgər belə olmasaydı, Azərbaycanın hüquq-mühafizə orqanlarının əlindən qaça bilməzdi və bu günə kimi ustalıqla gizlənməyi bacarmazdı. Amma bunları bacarır və hətta Azərbaycana 3 dəfə giriş-çıxış etmə qədərində özünü sərbəst aparır.
Onun İranla əlaqələrini sübuta yetirən şübhdəli məqam…
Mahir Lənkəraninin Azərbaycana giriş-çıxış səbəbləri də müxtəlif ola bilər. Məsələn bunu araşdıra bilərsiniz. Ən azından jurnalist araşdırması üçün ciddi bir mövzudur. İpucular yetərincədir. Mahir Lənkərani hər üç dəfəsində məhz Dağıstan istiqamətindən Azərbaycana daxil olub. Yəni şimal qapısından. Bu qapıda isə onu «Azəryolservis» ASC-nin prezidenti Cavid Qurbanovun Xaçmazda polis rəisi işləyən qardaşı qarşılaya bilər.
Çünki bu gün «Azəryolservis»in dəhlizlərində də danışılır ki, Mahir Quliyev (Lənkərani) Azərbaycana məhz adında olan bəzi əmlaklardan notarial qaydada imtina etməsi üçün keçibmiş. Onun Azərbaycana giriş-çıxışının hansı ad altında həyata keçirilməsi də araşdırılmalıdır. Çünki Mahir Lənkərani bu gün iki pasporta malikdir. Və buna məhz məmurlarla yaxın əlaqələrinin sayəsində nail olub.
Mahir Lənkəraninin İranla əlaqələrinin şübhəli məqamlarından biri də onun bu gün farsların xəfiyyəsinin Bakıdakı maliyyə qaynağı kimi çıxış etməsidir. Yəni diqqətlə izlənildikdə aydın olur ki, İran xəfiyyəsinin bir şəbəkəsi məhz Mahir Lənkərani istiqamətindən maliyyələşib.
Təsadüfi deyil ki, Mahir Lənkərani özünün keçmiş patronu Cavid Qurbanovu hətta İran xəfiyyəsi üçün geniş meydan hesab olunan «Albalı» («Vişnyovka») massivindəki məscidin inşasını maliyyələşdirməyə də cəlb edə bilir. Yəqin ki, bu məscidin adı sizlər üçün tanışdır. Bəli, bu gün həbsdə saxlanılan dindar məhbus Taleh Bağırzadənin xütbələrini oxuduğu, İrançılığı təbliğ etdiyi, inanclılıq adı altında Tehranın agenturasına insanları cəlb etdiyi bir ünvan. Və bu ünvan Cavid Qurbanovun maliyyəsi hesabına ərsəyə gəlib.
Həmin məsciddə isə ən azından 400-500 nəfər insan toplanırdı və bu insanlar Mahir Lənkəraninin rəhbərliyi altında Azərbaycan dövlətçiliyi əleyhinə təşkilatlandırılırdı. Din pərdəsi adı altında radikal aksiyaları təbliğ edərək bunu dinə xidmət kimi göstərən bir şəbəkənin neçə gəncin beynini zəhərlədiyini isə müəyyən etmək çox çətindir.
Mahir Lənkərani İrana necə qulluq edib?
Bu gün Mahir Lənkəraninin aktivində Azərbaycan üçün problemlər yarada biləcək kifayət qədər ciddi məqamlar var. Cavid Qurbanovun yanında ola-ola bu adam İranın xüsusi xidmət orqanlarına onlarla gənci təslim edib. Onun xətti ilə onlarla gənc İrana göndərilib və sonradan həmin gənclər çarşabda, saqqalda geriyə dönərək İrandan ixrac olunan təhlükəli radikalçılıqların təşviqində iştiraka qatılıblar.
Bu gün Mahir Lənkəraninin qidalandırdığı və konkret olaraq qadınlarla işləyən əsas fiqurlarından biri Yasamal rayonu ərazisində yaşayan xanımlardan biridir (etika xətrinə onun adını çəkmirəm). Həmin xanım sonu «200»lə bitən ağ rəngdə «Hyundai Santafe» markalı maşın sürür ki, bu maşın da ona Mahir Lənkəranidən hədiyyədir. Eyni zamanda həmin qadına Yasamal rayonu ərazisində mənzil də bağışlanıb.
Bu qadının əsas missiyası isə İrana gənc qızlarımızın göndərilməsinə nail olmaqdır. Onun əli ilə 300-dən artıq gənc qız bu gün İranın xüsusi xidmət orqanlarının diqtəsi ilə çarşaba bürünüb. Və bunun müqabilində həmin qadın böyük həcmdə pul mükafatına da layiq görülüb.
Cavid Qurbanov onu işdən qovub…
Cavid Qurbanov Mahir Lənkəranini işdən qovub, amma bu gün onun kifayət qədər ciddi əlaqələrinin olması faktı mövcuddur. Əgər belə olmasaydı, Mahir Lənkərani Milli Təhlükəsizlik Nazirliyi tərəfindən axtarışda ola-ola sərbəst şəkildə Azərbaycana giriş-çıxış edə bilməzdi. Və bu gün onun ciddi məmur himayəsi altında olması həm də onunla bağlı axtarışın heç də dövlətin tam gücünün tətbiq olunmaması ilə həyata keçirilməsi ilə də ortaya çıxmış olur.
Mahir Lənkəraninin Azərbaycan dövləti əleyhinə fəaliyyətlərindən biri də onun təhsil nazirliyinin qarşısındakı etiraz aksiyalarını maliyyələşdirməsi və təşkili işi ilə də ortaya çıxmaqdadır. Aydın görünür ki, axtarışda olan bir kəsin bu şəkildə özünü sərbəst aparması və hətta bir əmri ilə onlarla gənci polisin üzərinə dəyənəklə göndərə bilməsi çox ciddi və təhlükəli planlamaların mövcudluğundan xəbər verir.
Unutmaq lazım deyil ki, xəfiyyələr, kənar dövlətlərin agenturaları əksər hallarda sürücülərlə işləyib. Və çox ehtimal ki, bu gün məhz Cavid Qurbanovun sürücüsü olması hesabına Mahir Lənkərani Azərbaycan dövlətinin çox mühüm bilgilərini İranın xüsusi xidmət orqanlarına ötürüb. Bu fakt isə məsələnin mahiyyətini daha da ciddiləşdirir.
Mahir Lənkərani yenə gələcək…
Onun bu yaxınlarda Azərbaycana yeni dönəcəyi söylənilir. «Azəryolservis»də çalışan və hələ də Mahir Lənkəraniyə yaxın çevrə ilə bağlılığı olan şəxslərdən birinin danışığından bunu eşitmişəm. Bu gəlişə Azərbaycan dövlətinin hazırlaşması lazımdır"…
DİA.AZ-dan: Qarşı tərəfi də dinləməyə hazırıq...
