GUYA TERROR TƏŞKİLATI AZƏRBAYCANI QANA BOYAYACAĞINI BƏYAN EDİB
DİA.AZ: - Fars-molla rejimi Azərbaycana qarşı təbliğat kampaniyasını daha da gücləndirib. Əslində Prezident Administrasiyasının şöbə müdiri Əli Həsənovun aqressiv reaksiyasından da aydın olur ki, artıq rəsmi Bakının da İrana dözüm nümayiş etdirmək fikri yoxdur.
Bildirək ki, az qala bir ilə yaxındır ki, rəsmi Tehran öləmizə və dövlətimizin rəhbərlərinə qarşı çox iyrənc bir təbliğat aparır. Son günlər isə bu təbliğat kampaniyasında söyüş dolu ifadələrin də sayı artıb.
Bu xüsusda isə daha çox fərqlənəni «arannyus» və «abna» xəbər portallarıdır. DİA.AZ bildirir ki, hər iki portal birbaşa olaraq İranın xüsusi xidmət orqanlarının nəzarəti altında fəaliyyət göstərir. Əgər dünənə qədər yalnız söyüşlü ifadələr «abna» portalında yer alırdısa, iki gündür ki, «arannyus» portalı da dövlətimizə və dövlət rəhbərlərimizə qarşı hədyanlar yağdırmağa başlayıblar.
«Arannyus» portalı əgər əvvəllər Azərbaycan hakimiyyətini hədəfə alanda ümumi cümlələrdən istifadə edirdisə, indi prezident İlham Əliyevi birbaşa olaraq hədəf kimi seçib və bu qəbildən bir neçə materialı portala yerləşdiriblər.
Daha iki materialda isə Azərbaycan bir dövlət olaraq hədələnir və iddia olunur ki, guya məşhur «Əl-Qaidə» terror təşkilatı da Azərbaycanı hədələyib. Həmin iki materialı olduğu kimi diqqətinizə çatdırırıq:
«Əlqaidə dəstəsi Azərbaycanı bu ölkədə gey-parad keçiriləcəyi surətdə terror və təhlükə yaradacağı ilə hədələdi» başlıqlı məqalədə deyilir:
«AranNews: Sosial şəbəkələrdə yayılan xəbərlərə əsasən, Əlqaidəyə bağlı "Ərəb Mücahidləri Təşkilatı" bəyanat yayaraq bildirib: Bakıda gey-paradla eyni zamanda bu şəhərin küçələri homoseksualların qanına boyanacaq!"
Bu barədə İsrailin “Ediot Ahronot” qəzeti yazıb:Beynəlxalq yarışlara qatılan İsrail idmançılarının təhlükəsizliyini MOSSAD agentləri və bu ölkənin kəşfiyyat strukturlarının yaxşı silahlanmış xüsusi təyinatlıları təmin edir. Bu baxımdan “Eurovision” üçün Bakıya gələn İsrail nümayəndə heyətini bu ölkənin xüsusi xidmət əməkdaşlarının müşayiət edəcəyi əvvəlcədən gözlənilirdi.
Azərbaycan milli təhlükəsizlik naziri Eldar Mahmudov bildirib ki, MTN “Eurovision” yarışmasının, bu yarışmada iştirak edəcək nümayəndə heyətlərinin təhlükəsizliyini təmin etmək üçün bütün zəruri tədbirləri həyata keçirib.
Bəyanatın davamında belə deyilir: "Biz "Eurovision" müsabiqəsini Bakı hökuməti üçün qorxulu yuxuya çevirəcəyik. Mücahidlər Qafqazda həmişə öz sözünü demiş və ona əməl etmişdir".
Ərəb Mücahidləri Təşkilatı "Hər hansı bir tayfa öz tövrünü (nəfsində olanları) dəyişmədikcə, Allah da onun tövrünü (onda olanları, onun əhvalını) dəyişməz" ayəsinə istinad edərək bildirib: "Homoseksuallar və şeytanın tərəfdarları elə fikirləşməsinlər ki, Azərbaycanda istədikləri hərəkəti edə biləcəklər. Xeyir! Onlara hücum olacaq və Mossad, I6, CİA və digər təşkilatlarını heç birinin onları qorumağa gücləri çatmayacaq".
Bu təhdid elə bir şəraitdədir ki, sözü gedən müsabiqənin təşkilatının rəhbərləri təhlükəsizlik məsələsinə daha çox xərc çəkiblər. Çünki dünyanın müxtəlif ölkələrindən olan homoseksualların axşışıb gəlməsi ilə gözlənilən təhlükəsizlik tədbirləri görə bilməyəcəklərindən qorxurlar. Bu məsələ Bakı dövlətini "Eurovision" müsabiqəsi astanasında təhlükəsizliyə təminat vermədiyini bildirməyə məcbur edib, Əlqaidə və vəhabi dəstələrinin təhdidlərindən nigəran olduqlarını bildirib.
Deyilənlərə əsasən, Azərbaycan Respublikası müsabiqənin təhlükəsizliyini təmin etmək üçün Mossad kəşfiyyat təşkilatı ilə əməkdaşlıq edir və Mossad qüvvələrinin əsas vəzifələri Bakıda "Eurovision" müsabiqəsinin keçiriləcəyi yerin və onun ətrafınının təhlükəsizliyini qorumaqdır.
Əlqaidə müxtəlif ölkələrin əhalisindən üzvləri olan çoxmillətli bir təşkilatdır. Əlqaidə həqiqətdə, hüzurunun təsirini indiyə kimi Əfqanıstandan əlavə, Əlcəzair, Misir, Mərakeş, Türkiyə, İordaniya, Tacikistan, Özbəkistan, Suriya, Çin, Hindistan, Pakistan, Banqladeş, Maleziya, Myanmar, İndoneziya, Filippin, Livan, İraq, Ərəbistan, Küveyt, Bəhreyn, Yəmən, Libiya, Tunis, Çeçenistan, Dağıstan, Kəşmir, Somali, Sudan, Keniya, Tanzaniya, Azərbaycan, Eritreya, Uqanda, Efiopiya, Bosniya, Kosovo, Amerika, İngiltərə, Portuqaliya, Almaniya, İsveç ölkələrində aşkar görünən beynəlxalq bir şəbəkədir.
"Ərəb Mücahidləri Təşkilatı" Əlqaidənin şəbəkələrindən biridir və Orta Asiya və Qafqaz dairəsində fəaliyyət göstərir. "Ərəb Mücahidləri Təşkilatı" Azərbaycan Respublikasında "Xəvaric" və "Sələfilər" kimi iki qrupla əməkdaşlıq edir».
«Bakı dövləti homoseksualların paradını təşkil etməklə öz kökünə balta vurur» başlıqlı məqalədə deyilir:
«AranNews: "Şəriət Məhkumları" silsiləli İclas bu dəfə Mirdamad rayonunun "Əmir əl-möminin (ə)" məscidində Aran Beynəlxalq Araşdırmalar və Mədəniyyət İnstitutunun icraçı müdiri Həsən Qulunun çıxışı ilə keçirildi. Əhalinin böyük əksəriyyəti tərəfindən geniş qarşılanan bu iclasda Həsən Qulu, İran və Azərbaycan Respublikasının mədəni, tarixi və məzhəbi ortaqlıqlarına işarə etdi və İran xalqının, əsasən də azəri əhalisinin Azərbaycan Respublikasına qarşı həssaslığının səbəbini ağıl, din və milli maraqların qorunması kimi üç perspektivdən izah etdi.
Aran İnstitutunun müdiri bu silsilə iclasların "Şəriət Məhkumları" adlanması barədə də açıqlama verərək dedi: "Bu iclaslar məhz şiə etiqadlarını müdafiə etdikləri üçün öz adi və əsas hüquqlarından məhrum olmuş şəxslərin anılması və əzizlənməsi məqsədilə keçirilir".
O, Azərbaycan Respublikasındakı şəriət məhkumlarının iki qrup olduğunu açıqladı: Birinci qrup Bakı dövlətinin hicab qadağası və digər anti-İslam addımlarına etiraz etdikləri üzündən məhkum olanlardır və hal-hazırda həbsxanadadırlar. Onların önündə Azərbaycan İslam Partiyasının sədri doktor Mövsüm Səmədov durur. Bu həbs olanların sayı yüz nəfərdən çoxdur. İkinci qrup ümumi dindarlardır və onlar düzdür ki, həbs olunmayıblar, amma bir az böyük sferada, həqiqətdə hakimiyyətin diktatorsayağı siyasətlərinin zindanındadırlar və islami şəkillə şəxsiyyət vəsiqəsinin alınması kimi öz adi hüquqlarından belə məhrum olublar.
Həsən Qulu Azərbaycan Respublikasının şiələrinin məzlumiyyətinin Bəhreyn şiələrinin məzlumiyyətindən heç də az olmamasını vurğulayaraq dedi: "AR-nın şiələrinin müxtəlif nəsilləri təqribən iki əsrdir ki, İslam və şiəliyi dişləri-dırnaqları ilə müdafiə edirlər və bu yolda şəhadət, sürgün, işgəncə, həbs və s. kimi hər cür çətinliyə canları bahasına sinə gərirlər".
Siyasi məsələlər üzrə ekspert Həsən Qulu AR-da kommunistlərin və qərbyönümlü hakimiyyətin ciddi səylərinə baxmayaraq şiəliyin saflığını bir möcüzə adlandıraraq dedi: "Şiə məzhəbindən başqa heç bir mədəni kateqoriya kommunistlərin məhvedici siyasətləri qarşısında davam gətirə bilmədi".
Ekspert çıxışının davamında Azərbaycan Respublikasındakı anti-İslam hərəkətlərindən bir neçə nümunəsinə işarə edərək artırdı: "Sionistlər Bakı dövlətində olan nüfuzlarından istifadə edərək Azərbaycan ölkəsini "Eurovision" kimi əxlaqsız bir müsabiqəni keçirməyə məcbur etdilər və homoseksualların və bu meyldə olan müğənnilərin, rəqqasələrin ayağını dünyanın ikinci şiə ölkəsinə açdılar. Əgər Bakı dövləti öz səhvini başa düşərək onu düzəltməyə çalışmasa və homoseksualların paradı kimi bir zilləti qəbul etsə, həqiqətdə öz kökünə balta vurmuşdur".
Aran İnstitutunun müdiri çıxışının sonunda təqlid mərcələrinin, alimlərin mövqeini, Təbriz və digər şəhərlərin əhalisinin etirazlarını onların təbii reaksiyası və dini vəzifələrinə əməl etmələri adlandırdı və ümidvar olduğunu bildirdi ki, AR dövləti xalqın xeyirxah istək və nəsihətlərinə diqqət edəcək və "Eurovision" kimi proqramları fikirləşmək əvəzinə Qarabağın azadlığı barədə düşünəcək.
Qeyd edək ki, "Şəriət Məhkumları" silsiləli İclaslar Aran Beynəlxalq Araşdırmalar və Mədəniyyət İnstitutu, İslam İnqilabı Mədəniyyət Cəbhəsinin Araşdırmalar Mərkəzinin təşəbbüsü və Təbrizin Məscidlər Mədəniyyəti Bölmələrinin əməkdaşlığı ilə keçirilir».
