DİA.AZ: - "Naxçıvan “0 cinayət” diyarıdır. Yəni bu diyarda Vasif Talıbovun dahiyanə siyasəti nəticəsində ildə uzağı 30 cinayət hadisəsi qeydə alınır, onun da yarısından çoxu təsadüfən baş verir. O zaman sual yaranır: Naxçıvan bu qədər cinayətsiz yerdirsə, onda o boyda MR DİN nəyə lazımdır? Naxçıvan polislərini niyə əmək qanunvericiliyinə zidd olaraq günaşırı 24 saat işləməyə məcbur edirlər ki, bu da Sədərəkdə polis üsyanı ilə nəticələnir? Ümumiyyətlə bu gün MR polisləri nə ilə məşğuldur?" DİA.AZ bildirir ki, bu açıqlama ilə tanınmış jurnlaist Heydər Oğuz çıxış edib.
Jurnalist daha sonra bildirir: "Bu gün Naxçıvan polislərinin bütün dərdləri “xan” həzrətlərinin özünün və ailəsinin mülklərini qorumaqdan ibarətdir. Məsələn, Vasif “xan”ın rəsmi iqamətgahı sayılan Ali Məclisi, Rəşad İsmayılovun xüsusi göstərişinə əsasən, Naxçıvan Şəhər Polis İdarəsinin Cinayət Axtarışı şöbəsinin əməkdaşları mühafizə edir.
Bəs “xan” həzrətləri hər gün evdən işə, işdən edə gedib-gələnəndə onun maşınını kim müşayiət edir, bilirsinizmi? - Naxçıvan DİN-nə məxsus 85 NP 011 dövlət qeydiyyat nişanlı xidməti avtomobil. Bəs bu avtomobili kim sürür? -Əlbəttə, Naxçıvan MR Daxili İşlər nazirinin müavini Zahid Gözəlovun şəxsən özü. Heç Zahid Gözəlov müəllim bu şərəfli işi başqasına buraxarmı?
Bir sözlə, Naxçıvan Daxili İşlər nazirinin müavini cənab “xan” həzrətlərinin mühafizəçiliyini edir.
Nazir Rəşad İsmayılovun da özünəməxsus işi var. O öz işçilərinə hədə-qorxu gələrək, polislərin Azərbaycan rəhbərliyinin Muxtar Respublikada apardığı islahatlara sevinib-sevinməməyinə nəzarət etmək funksiyasını yerinə yetirir. Təbii ki, ürəklərinə girmir, sadəcə ürəklərdəki hisslərin üzdəki inikasına baxır və kimin sevinib kimin üzüldüyünü bu şəkildə müəyyənləşdirir.
“Rəşad İsmayılov işçilərə deyir ki, görürəm, sevinirsiz bu dəyişikliklərə. Sevinməyin. Çünki Naxçıvanın öz Daxili İşlər Nazirliyi və naziri var. Onu da cənab Ali məclisinin sədri təyin edir. Adam açıq-aşkar təxribatçılıqla məşğuldur”, - Qara Pişik deyir.
“Rəşad müəllim həmçinin Muxtar Respublikada aparılan islahatları "vətən xainləri Naxçıvanımıza qarşı tədbirlər görür" kimi fikirlərlə səciyyələndirir. Başa düşmək olmur, bu adam “vətən xaini” deyəndə kimi nəzərdə tutur?”, - deyən Qara Pişik gecə-gündüz fikirləşsə də bu suala cavab tapa bilmir.
Rəşad İsmayılovun göstərişi ilə 2022-ci il ərzində bir neçə polis zabitinin (hansı ki, o zabitlər Rəşad İsmayılovun gözündə "опасный" elan olunmuşdu) telefon danışıqları qanunsuz olaraq dinlənilib: “Həmin polis əməkdaşlarının adını açıqlasam, əmin olun ki, nazir birbaşa məhkəməlik olar. Çünki onun qanunsuz dinlədiyi həmin polis zabitləri elə şəxslərdir”.
Uzun illər öncə “Qurdlar vadisi” serialını izləyən və bu filmdəki Muronun təsirinə düşüb humanistləşən Qara Pişik hələlik “lənət olsun içimdəki insan sevgisinə” deyib o adamların adını çəkməməyə üstünlük versə də, özündən də çox əmin deyil. Qorxur ki, bir gün dözə bilməyib bütün sandıqları açıb, pambıqları ortalığa töksün və Naxçıvan MR DİN-də aləm bir-birinə dəysin.
Onun sözlərinə görə, Naxçıvanda hal hazırda Prezident İlham Əliyevin apardığı islahatlara yalnız “xan” həzrətləri və MR DİN qarşı çıxır. Daha doğrusu, nazir Rəşad İsmayılov və onun müavini, “xan” qoruqçusu Zahid Gözəlov.
Sözsüz ki, Naxçıvanın digər polislərinin də çox mühüm görəvləri var. Bu görəvlərə “xan” həzrətlərinin və vəliəhd Seymur Talıbovun şəxsi mülkiyyətinin mühafizəsi də daxildir. Hətta elə polislər var ki, nazir Rəşad İsmayılovun mülklərinə qaraulluq edir.
“Rəşad İsmayılov Naxçıvan şəhəri Çənlibel məhəlləsində özünə villa tikdirir. Sutkada 24 saat o yarı tikilinin qabağında Naxçıvan Şəhər Polis İdarəsinin Post Patrul Xidməti Bölüyünün 2 əməkdaşı məcburi keşik çəkir.
Seymur Talıbovun Naxçıvan şəhəri Evim AVM-in qarşısında qızıl dükanı var. Həmin qızıl dükanın qarşısında isə Naxçıvan Şəhər Polis İdarəsinin Post Patrul Xidməti Bölüyünün 2 əməkdaşı məcburi olaraq xidmətə çıxarılır. Özü də xidmətə çıxan polislərə 2 ədəd karton parçası verirlər ki, gedin bardurun üstünə qoyub üzərində oturun. Guya polislərin oturacaq hissəsinin soyuq çəkəcəyindən ehtiyatlanırlar”, - deyən Qara Pişiyin bu yerdə Muroluğu tutur və əlini cibinə salıb dəsmalını çıxararaq göz yaşını silir:
“Vallah, adamın yazığı gəlir. Billah, adamın yazığı gəlir. O post patrulda işləyən serjantların hamısının Naxçıvan Banka krediti var. Hamısı da ailə başçısıdır. Ailələrinə görə susurlar. Amma Seymur Talıbov, Rəşad İsmayılov və Zahid Gözəlov kimi şəxslər onları sındırırlar”.
“Xan” həzrətlərinin digər mülklərinin də polislər tərəfindən gücə-gündüz mühafizə olunduğunu deyən Qara Pişiyi bu yerdə elə hönkürtü tutur ki, miyovultusundan bir şey almaq olmur. Hekayənin gerisini sonraya saxlamaq üzrə məndən ayrılır. Yenidən Naxçıvana qayıtmaq yolunu tutan Qara Pişik son olaraq onu dedi ki, gələcək söhbətlərində mənə Ordubad RPŞ-nin rəisi Əli Nəbiyev və Cinayət axtarış Bölməsinin rəisi Tural Hüseynov tərəfindən evinə narkotik qoyulub tutulan, sonra isə 7.000 manatı alınan Ramin Abbasov adlı vətəndaşın başına gətirilən müsibətlərdən danışacaq".
İddia olunanlarla bağlı dia-az.life olaraq bütün maraqlı tərəfləri dinləməyə hazırıq...
