TƏHSİL NAZİRİ ÜÇÜN YEGANƏ ÇIXIŞ YOLU YALNIZ İSTEFA VERMƏSİDİR
DİA.AZ: - Dünən daha bir mətbu təxribatın şahidi olduq. Belə bir xəbər yayıldı ki, bəs Tələbə Qəbulu üzrə Dövlət Komissiyasının sədri Məleykə Abbaszadə ailə həyatı qurub. Əslində, ilk baxışdan burada qeyri-adi heç nə yoxdur. Amma Azərbaycanın mili mental dəyərlərinin fonunda yaşlı-başlı bir qadının adının belə bir məsələdə hallandırılması heç də arzuolunmaz hesab olunmur. Hətta bu halda belə, yəni mental dəyər basqısı altında da belə bir addımı atanlar olur ki, buna da kimsənin hansısa formada müdaxiləsi doğru hesab olunmur. Elə bunun özünü də mentalitetimiz diqtə etməkdədir.
Lakin Məleykə Abbaszadə ilə bağlı məsələdə nə hadisənin özü var idi, nə də cəmiyyətin təbii reaksiyaları. Ortada sadəcə olaraq bir təxribat var idi ki, DİA.AZ olaraq nələrin baş verdiyini dərhal oxucularımızın diqqətinə çatdırdıq. Sonradan bu hadisəni «yaratmaq» istəyənlərin özləri də «xəbərlərindən» imtina etməli oldular. Portalımıza bununla bağlı açıqlama verən TQDK sədrinin qızı heyrətləndiyini belə gizlədə bilmədi.
Amma heyrətlənməyə heç bir lüzum yox idi. Çünki bütün bu işlərin arxasında kimin dayanması hər kəsə aydın idi. Təbii ki, söhbət burada Azərbaycan təhsilini ağlar günə qoyan möhtərəm nazirimiz Misir Mərdanovdan gedir. Məhz nazir olduğu illər ərzində onlarla nəsli kor qoymuş Misir Mərdanovun sayəsindədir ki, əksəriyyət Azərbaycanın işıqlı gələcəyindən nəinki danışmaq istəmir, gələcəkdə hansısa ziyanın ortaya çıxacağının özünə belə şübhə etməkdədir. Bir daha vurğulayırıq ki, məhz Misir Mərdanovun sayəsində…
Təbii ki, Misir Mərdanovun TQDK sədrinə qarşı bu qədər aqressiv olmasının nədənləri də hər kəsə məlumdur. Qısa müddət ərzində Azərbaycan təhsilinə Misir Mərdanovdan qat-qat artıq töhvələr verməyə müvəffəq olmuş Məleykə Abbaszadə neçə müddətdir ki, bu fəaliyyəti ilə TN şefinin kürkünə əməlli-başlı birə salıb. Bunun da nəticəsidir ki, TQDK-nın səlahiyyətlərinin artırılmasının hər dəfəsinə mətbuat bu şəkildə reaksiya verir: MİSİR MƏRDANOVUN DAHA BİR GƏLİR YERİ ƏLİNDƏN ALINDI…
Bəli, məhz gəlir yeri. Çünki bir zamanlar Əli İnsanovun əlindən öpən, sonradan isə onun kölgəsini belə baltalayan Misir Mərdanov üçün heç bir dəyərin ümdə olmaması səbəbindən, bu gün onun üçün təhsilin istənilən bir istiqaməti ilk əvvəl GƏLİR YERİ əhəmiyyətini daşıyır. Əgər bağçalara nəzarət təhsil nazirliyindən alınaraq icra hakimiyyətlərinə verilirsə, deməli, Misir Mərdanov uşaq bağçalarına ayrılan pullara şəriklik hüququnu itirir. Və digər istiqamətlərdə də eynən bu qaydadadır.
Sözügedən hadisəyə gəlincə isə, bununla bağlı DİA.AZ olaraq apardığımız araşdırmalar nəticəsində çox ilginc faktları üzə çıxara bilmişik. Bəri başdan, xatırladaq ki, Məleykə Abbaszadənin ailə həyatı qurması barədə yalan məlumatı ilk olaraq «Olaylar» agentliyi «raskrutka»ya buraxıb. Yəni xəbərin istehsalçısı bir zaman partiya sədri olmuş, hətta prezidentliyə belə namizədliyini irəli sürmüş, indi də özünün absurd araşdırmaları ilə barəsində araşdırmaçı-tarixçi-yazıçı imici yaratmağa çalışan Yunus Oğuzun rəhbərlik etdiyi agentlik və qəzetdir.
Xatırladaq ki, buna qədər də Yunus Oğuzun qəzet və agentliyi TQDK sədrinə qarşı bir kampaniyada bulunurdu. Və davamlı olaraq bu kampaniyanı müşahidə etdiyimizdən oxucularımızı da zamanında bilgiləndirmişik.
Bu barədə həmin ərəfədə DİA.AZ-ı məlumatlandıran mənbə iddia edirdi ki, əslində «Olaylar»da dərc edilən və «araşdırma» kimi təqdim olunan həmin materiallar əslində təhsil nazirliyində və birbaşa olaraq nazir Misir Mərdanovun nəzarəti altında hazırlanıb. Yəni bu yolla Misir Mərdanov da öz aləmində Məleykə Abbaszadəyə cavab vermiş olur.
Hətta bu halda belə, nazirin çabaları əbəsdir. Çünki qatar çoxdan gedib və artıq TQDK Misir Mərdanovun bütün gəlir sahələrinin bir-birinin ardından nəzarəti altına almaqdadır. Ən sonuncu zərbə isə prezidentin orta məktəblərdə buraxılış imtahanlarını təhsil nazirliyindən alaraq TQDK-nın ixtiyarına verməsi ilə vurulmuş oldu.
Lakin burada bir maraqlı məqam var. Nədən Yunus Oğuz və onun qəzetləri? Hər halda, bir zamanlar Xalq Partiyasına sədrlik, Vəhdət Partiyasına həmsədrlik etmiş Yunus bəyin Misir Mərdanovla Məleykə Abbaszadənin arasındakı konfliktə bir tərəf olaraq qatılması və bu zaman hətta özünə nazirin səngərində yer etməsi sıradan bir olay deyil.
Məlumat üçün bildirək ki, Yunus Oğuzun qəzeti və agentliyi Prezident Administrasiyasının şöbə müdiri Əli Həsənovdan qidalanır. Hər halda, ruslar demişkən bu bilgimiz «informasiya dlya razmışleniya» qədərində əhəmiyyətlidir…
Amma araşdırmalarımız nəticəsində ortaya ilginc məqamlar da çıxmış oldu. Elə dünən Yunus Oğuzun agentliyi tərəfindən yayılan həmin uydurma məlumatla bərabər bir gerçək xəbər də oxucuların diqqətinə təqdim olunmuşdu ki, hələ də həmin xəbəri «olaylar.az» portalına daxil olmaqla izləmək mümkündür. «Yunus Oğuzun əsərləri dərs vəsaitinə salındı» başlıqlı məqaləni olduğu kimi diqqətinizə təqdim edirik:
«Təhsil Nazirliyi ümumtəhsil məktəblərinin 11-ci sinfi üçün yeni dərs vəsaiti çap edib. Dərslikdə ən yeni dövr Azərbaycan ədəbiyyatının nümayəndələri də yer alıb. Yeni vəsaitdə bir sıra müasir şair və yazıçılarla yanaşı, tarixi romanlar müəllifi, yazıçı-publisist Yunus Oğuzun da adı əksini tapıb. Kitabda şagirdlərə Y.Oğuzun yaradıcılıq məhsulu olan “Əmir Teymur”, “Təhmasib şah”, “Nadir şah” tarixi romanları və qədim türklərin tarixindən bəhs edən “Atilla” pyesi haqqında məlumat verilib».
Yəni artıq məsələnin nə yerdə olduğunun tam fərqinə vardınız. Bəli, Yunus Oğuz Misir Mərdanova öz aləmində ayı xidməti göstərib. Hər halda, baş verənlərin ilkin adı budur. Araşdırmalarımız nəticəsində onu da öyrənə bildik ki, Yunus Oğuza əslində bu təlimatı elə qardaşlaşdığı və artıq mirzəsinə çevrildiyi təhsil nazirliyi verib. Yəni ona belə bir taprışıq verilib ki, Məleykə Abbaszadə nəyin bahasına olursa-olsun ictiami nüfuzdan salınmalıdır. Çünki…
Artıq məsələnin «çünkisi» hər kəsə aydındır. Hər halda, TQDK sədri bu gün Misir Mərdanovla şəxsi zəmində münaqişədə deyil. Bunun səbəbləri var. Görüntüdə olanı odur ki, məhz Azərbaycan təhsilinin qurtuluşu naminə Məleykə Abbaszadə bu gün TN şefinə qarşı cəbhə açıb. Əslində TQDK sədri burada öz işini görür. Yəni nəyi etməlidirsə, onu da edir. Sadəcə olaraq nəyi etməlidirsə, onu da etməyən Misir Mərdanov baş verənləri özünün şəxsinə qarşı fəaliyyət kimi qəbul edir.
Bütün tərəfləri dinləməyə hazırıq. Təbii ki, əgər yazdıqlarımızın həqiqətə aidiyyatı yoxdursa…
