DİA.AZ: - Qobustan rayon sakinləri prezident İlham Əliyevə və bir sıra dövlət qurumlarının rəhbərlərinə ilginc bir müraciətdə bulunublar. DİA.AZ-a daxil olan müraciətin mətnindən belə anlaşılır ki, vətəndaşlar dövlət büdcəsinin yağmalanmasına etiraz edir və bunu real faktlarla sübuta yetirirlər. Vətəndaşları narahat edən isə hazırki böhranlı durumda büdcə pullarının hələ də dövlətə qaytarılmamasıdır.
DİA.AZ olaraq dövlət başçısına ünvanlanmış həmin müraciəti olduğu kimi diqqətinizə təqdim edirik:
“Hörmətli Cənab Prezident! Yaşadığımız 2015-ci ildə dünyada baş verməkdə olan maliyyə böhranı, eləcə də Azərbaycanda dövlət büdcəsilə əlaqədar bir sıra banklarda baş vermiş maliyyə fırıldaqları nəticəsində manatın devalvasiyaya uğramasıilə əlaqədər Mingəçevir şəhərində ictimaiyyət qarşısında etdiyiniz tarixi çıxışınızda fürsətdən istifadə edərək gəlir əldə edən bəzi möhtəkirlərə xəbərdarlıqlar etmişdiniz. Nəticədə ictimaiyyətimiz şahid olur ki, belə dövlətin pulunu mənimsəyənlərin aqibəti necə olur. Görülən tədbirlər təbii ki, hər bir sadə Azərbaycan vətəndaşını sevindirməyə bilməz. Elə ona görə də günümüzün ən aktual və prioritet mövzusu hesab edilən dövlət büdcəsinə xəyanətlə bağlı müraciətimizin yenidən araşdırılması üçün direktiv orqanalara göndərməyi vacib hesab edirik.
Biz, Qobustan rayonu Cəyirli kənd sakinləri Aslanov Yedigar Əliheydər oğlu, Şübhəli Abduləli oğlu İsfəndiyarov, yaşadığımız kəndin sürüşmə zonasında yerləşməsi bildirilmişdir. Bu məsələylə bağlı FHN-nin yerli komissiyası 2004-cü ildə hər bir ev üçün aktlar tərtib etmiş və çatlar əmələ gəlmiş evlərin dövlət tərəfindən kompensasiya ödənilərək dərhal köçürülməsi qərara alınmışdır. Kəndin 81 belə evi siyahıya alınmış və Maliyyə Nazirliyi tərəfindən ev sahiblərinin adına tam kompensasiya ödənilmişdir. Lakin maraqlısı budur ki, aradan 10 ilə yaxın vaxt keçsə də sonrakı plan üzrə heç bir kompensasiya almış sakinlərin başqa yerlərə köçürülməsi məsələsi həll edilməmiş qalmışdır. Aidiyyatı rəsmi orqanların verdikləri arayışlardan da görünür ki, 2004-cü ildə ərazidə baş vermiş sürüşmə və çökmə proseslərinin fərdi yaşayış evlərinə təsiri yoxdur”
O vaxtkı hay-küydən ( guya evlərin dağılmaq qorxusu varmış) indiyədək heç bir ailə öz mənzilini tərk etməmiş, əksinə yeni əlavə tikinti işləri apararaq yaşamaqda davam edirlər. Deməli, nəticəyə gəlirik ki, kənd yaxınlığında baş vermiş kiçik sürüşməni Fövqəladə Hallar Nazirliyinin yerli komissiyası böyük bir təbii fəlakətin baş verməsi kimi şişirdərək öz məqsədləri üçün konkret olaraq hərəkətə keçmişlər.(Guya Bakının Zığ, bayıl qəsəbəsində sürüşmə olmur və indi də heç kimə bu məsləynən bağlı 1 qəpik də olsun pul ödənilməmişdir.) Və dərhal bəzi evlərdə yaranmış çatlara görə 81 evin təcili köçürülməsi barədə rəy vermiş və bunun əsasında vətəndaşların köçürülməsi üçün külli-miqdarda dövlət vəsaiti ayrılaraq ödəmələr aparılmışdır. Bizi kimi kimsəsiz, kasıbların evlərində də oxşar çatların əmələ gəlməsinə baxmayaraq isə 1 qəpik də olsun pul ayrılmadı. Heç bizi zərərçəkmiş vətəndaş kimi siyahıya belə salmadılar. Amma konkret olaraq məsələn, qonşumuz Rəhilə Rəfiyevanın da evində bir neçə çat yaranmasına görə yerli komissiya onun evini tam qəzalı və yaşamağa yarasız kimi sənədləşdirərək evi qeydiyyatdan çıxartdılar və dövlət büdcəsindən vəsait ayrılmasılə bağlı rəy vermişdilər. Halbuki, bu adam həyətində əlavə tikintilər də inşa etməklə yanaşı, hətta bizi qeydiyyatdan rəsmən silinimiş evinin sahibi kimi məhkəmələrə verərək həyətimizin ortasından özünə ikinci yolun açılması barədə vicdansız hakimlərin çıxardığı əsassız qətnamələrini də Malik Məlikov kimi icra məmurlarına icra etdirmişdir.
Bir sözlə, FHN-nin yerli komissiyası fürsətdən istifadə edərək dövlətin ziyanına saxta rəylər və aktlar tərtib etməklə büdcəyə külli-miqdarda ziyan vurmuşlar. Hələ bu azmış kimi bu komissiya öz maraqlarından çıxış edərək hər bir evdə yaşayanın hörmətinə və digər amillərə görə tərtib edilmiş aktda ayrıseçkilik etmişlər. Nəticədə FHN-nin yerli komissiyası tərəfindən düzülüb qoşulmuş teatr-tamaşasında məqsəd ölkə vətəndaşlarının düşdükləri təbii fəlakət adı altında külli-miqdarda dövlət vəsaitinin mənimsənilməsi həyata keçirilmişdir. Biz bu barədə aidiyyatı təşkilatlardan kəndimizdəki texniogen vəziyyətlə bağlı təhlükənin nə dərəcədə olub-olmamasılə bağlı aldığımız rəsmi arayışlara ( “kənd sakinlərinin yaşaması üçün heç bir təhlükə yoxdur”) istinad edərək dəfələrlə respublikanın yuxarı direktiv orqanlarına şikayətlər etsək də indiyədək heç bir xeyri olmamışdır. Ona görə də yaşadığımız indi maliyyə böhranı dövründə bir daha yuxarı instansiyalara və KİV-ə bu barədə ( dövlət büdcəsinə vurulan külli-miqdarda ziyanla bağlı) məlumat verməyi özümüzə vətəndaşlıq borcu hesab edirik ki, saxta sənədlər əsasında dövlətdən alınmış pullar büdcəyə qaytarılsın!”
dia-az.life olaraq qarşı tərəfi də dinləməyə hazırıq...
