Prezident İlham Əliyevin sərəncamı ilə aprelin 21-də Əmək və əhalinin sosial müdafiəsi naziri təyin edilən Sahil Babayev hələ ki rəhbərlik etdiyi yeni qurumda kadr dəyişikliklərinə başlamayıb.
dia-az.site "Reytinq” qəzetinə istinadən bildirir ki, o, digər yeni təyinat sahibləri kimi, sələfinin nazirlik içində formalaşdırdığı "xüsusi komanda”sına hələ də qapını göstərməyib:
"Tam əksinə, yeni nazir, ehtiyatda olan zabit rütbəsi daşıyan Sahil Babayev soyuqqanlı hərbçi zabitəsi ilə sələfinin "küllükdən çıxarıb” var-dövlət sahibi etdiyi kadrlarının yuxularını ərşə çəkib. O, daxildə hansı addımı atacağını kiməsə büruzə vermir, sanki heç nə olmamış kimi elə davranır ki, bu da istər-istəməz tufanqabağı fırtınanı xatırladır. Lakin diqqətlə analiz etdikdə, artıq "şimal küləyi"nin əsdiyi aydın görünür...
Elə bu da Səlim Müslümovun komandasının əsas üzvlərini, əsasən, nazir müavini İdris İsayev, aparat rəhbəri Əjdər Cəbiyev, müfəttişlik xidmətinin rəisi, kürəkənləri Fuad Əlizadə, nazirliyin bütün maliyyə əməliyyatlarının aparıldığı İqtisadiyyat şöbəsinin müdiri, Səlim Müslümovu hətta bir çox xarici səfərlərdə belə müşaiyət edən Şəlalə Cəfərova və həmçinin mətbuat xidmətinin rəhbəri Elman Babayev başda olmaqla, aparat işçilərinin çoxunu böyük təşvişə salıb. Onlar əla bilir ki, yeni nazirin bu tufanqabağı sakitliyi çox çəkməyəcək. Əksinə, zabit təmkini çox yaxın vaxtda, özü də çox ağır şəkildə pozulacaq”.
Məlumata görə, yeni nazir soyuqqanlı davranışı ilə artıq səngərin əks istiqamətində duran keçmiş nazirin komandasının əsəblərini tarıma çəkib, onları yuxsuz gecələrə qərq edib. Sanki nazirlik içindəki bu "məxsusi qrup”un emossiyalarını "partladıb”, hücuma keçmələrini gözləyir:
"Sizə dəqiq deyim ki, təlaş içində olan və çıxarılmasına 100 faiz əmin olan bir neçə nəfər sakitcə getmək üçün yeni nazirə istefa ərizəsi veriblər. Və onlar bu zaman gözləyirdilər ki, Sahil Babayev dərhal ərizənin üstünü yazıb, bunlara "yaxşı yol” deyəcək. Lakin çoxlarının gözlədiyinin əksinə olaraq, o, ərizə yazmış vəzifəli şəxslərə "Mən sizə dedim ki, ərizənizi yazın?” deyərək, onları bir növ nokauta salıb. Çünki yeni nazirin bu addımı belə qənaət formalaşdırıb ki, tezliklə daxildə audit aparılacaq və bu zaman keçmiş nazirin komandası çox çətin faktlarla üz-üzə qoyulacaq. Yəni hərbçi sərtliyi gec, amma güc qazanacaq. Hətta indidən nazirliyin daxilində söhbət gəzir ki, ciddi korrupsiya və digər qanunsuzluqlara yol verənlərlə bağlı yoxlama materialları prokurorluğa göndəriləcək. Sizə deyə bilərəm ki, artıq bunun işartıları da görünür. Artıq bu barədə bəzi media orqanları da yazır...”.
Məlumata görə, yeni nazir dəyişikliklərə başlamadan əvvəl diqqətçəkən bir addım da atıb. O, nazirliyin rəsmi saytında yer alan aparat işçilərinin, nazirlik yanında fəaliyyət göstərən xidmət rəislərinin adlarını saytdan götürdüb:
"Hazırda rəsmi saytda ancaq nazir və müavinlərinin adları saxlanılıb. Çünki nazir müavinlərini dəyişmək yalnız prezidentin sərəncamı ilə həyata keçirilir. Elə bu fakt da göstərir ki, Sahil Babayev artıq sələfinin kadrlarının "qara siyahısı”nı tutub və o, həqiqətən də hərbçi soyuqqanlığı ilə cəmiyyətin diqqətini yayındıb, qəfil və sərrast zərbə ilə nazirlikdəki korrupsiya yuvasını təmizləmək niyyətindədir”.
Məlumata görə, çox yaxın vaxtlarda nazirlikdə "təmizləmə əməliyyatı”nın başlanacağı gözlənilir:
"Əminəm ki, suçlu gec-tez ilişəcəyini bildiyi kimi, keçmiş nazirin bütün "qara” və "ağ” işlərində yanında olan kadrları da nə vaxt məşhər ayağına çəkiləcəklərini böyük qorxu və həyacanla gözləyir, bilir. İş o yerə çatıb ki, onlar əvvəlki kimi saat 9-da deyil, saat 8-dən iş başında olurlar. Onlar o qədər təlaşdadır ki, bu, hətta son tədbirlərdən çəkilən fotolardan da aydın görünür. Sahil Babayev nazir təyin edildikdən sonra rəsmi tədbirlərdən çəkilən fotolara diqqət etsəniz, siz də bunu açıq görə bilərsiniz. Üstəlik, bu fotolarla Səlim Müslümovun dövründə çəkilən fotoların müqayisəsini aparın. Baxın ki, onlar indi hansı görkəmə düşüblər. Üzlərindəki kədər açıq olmaqla yanaşı, daha əvvəlki şux, özündənrazı duruşları da yoxdur. Zatən, başqa yolları yoxdur.
Bu adamlar həqiqətən də nazirliyi istədikləri kimi idarə ediblər, istədiklərini vurublar, qovublar, ləkələyiblər. Hətta bu nazirlikdə sevgilisini belə yüksək vəzifəyə gətirənlər var. Nə yazıq ki, onlar zamanında müxtəlif yollarla ələ aldıqları media vasitələri ilə özlərinə yaxşı piar qurduqları üçün, bütün bunlar mətbuata da çıxmayıb. Amma faktdır ki, burada çox böyük problemlərə yol açıblar. Təsadüfi deyil ki, artıq bu nazirlikdə təkcə pensiyaçıların, təqüdçülərin deyil, həm də nazirliyin "sosial sifariş” adı altında "həyata keçirdiyi” layihələrə ayrılan pulların taleyinin araşdırılmasının vacibliyi də dilə gətirilir.
Bəzi QHT sədrləri isə bir qədər də qabağa gedərək, daha ağır ittihamların siqnallarını verirlər. Açıq danışaq ki, bu vaxta qədər həmin o QHT-lər nazirlikdən "pay alacaqları”na ümid etdiyi üçün susurdular. Yenə deyirəm, Səlim Müslümov və ətrafı QHT-ləri layihə ümidi ilə susdururdusa, mətbuatı da "bəlli sistem” və hədiyyələrlə qısdırıb, ƏƏSMN-də baş verən qanunsuzluqların gündəmə daşınmasının qarşısını ustalıqla alırdılar. Ancaq buna rəğmən, Prezident İlham Əliyevin diqqətindən çoxları kimi, Səlim Müslümov və "komandası”nın pensiyaçılar, əlillər və yoxsullar üzərindəki oyunları yayınmadı”.
Məlumata görə, Səlim Müslümovun vəzifədən azad olunduğu gündən indiyədək susması da, onun komandasının təlaş içində olması da səbəbsiz deyil:
"Siz onu nə Ziya Məmmədov, nə Heydər Əsədov, nə də digər vəzifələrini itirmişlərlə qarışdırmayın. O, əslində Azərbaycanın Viktor Kojenisidir. Çox mahir adamdır, sahəsini yaxşı bildiyi kimi, korrupsiya dolanbacını əla bilən, eyni zamanda, proseslərdən ustalıqla çıxmağı bacaran biridir. Xatırlayırsınızsa, o, məşhur "Bəşər Hacıyev olayı”nda qısamüddətli həbs yatsa da, oradan çıxdı və sürətlə yüksəldi. İndisə yəqin düşünür ki, susmaq və ümumiyyətlə, üzə çıxmamaq daha münasibdir. Bildiyimə görə, hətta vəzifələrə gətirib, böyüdüb, var-dövlət, karyera sahibinə çevridikləri isə indi onunla təmasa keçməkdən ehtiyat edirlər. Bilirsiniz niyə?
Birincisi, vəzifədən getməmək üçündürsə, ikincisi, qısa zamanda buradan qazandıqları var-dövləti itirmək qorxusudur. Bəli, bunların arasında elələri var ki, əmin olun, vaxtı ilə yoxsul olub. Ancaq aylıq maaşı indi 1000 manat civarına qalxıb, ancaq işlədiyi çox qısa zamanda 200-300 minlik mənzil, bağ, bahalı maşın sahibi olub. Sizcə, bunu necə qazanıblar? Onlar bunun hesabatını necə verə bilər axı?!
Və yaxud Səlim Müslümovun dayısının kürəkəni Fuad Əlizadəni götürək. Onun çox şeyini demirəm, elə ad günlərini harada və necə təmtəraqla keçirdiyini araşdırın.
Yaxud sizə adi görünən mətbuat xidməti rəhbərinin niyə özünü 5-ci nazir müavini (nazirlikdə cəmi 4 müavin postu var) kimi aparmasının səbəbini öyrənin.
Və nəhayət, digər nazir müavinləri - Natiq Məmmədovun, İlqar Rəhimovun və Mətin Kərimlinin niyə əksər tədbirlərdən və nazirlik daxili proseslərdən kənarda saxlanılmaları ilə maraqlanın.
Araşdırın, görün Səlim Müslümovun nazirlikdəki komandası bu müavinləri niyə saymırdı və ya onlardan niyə ehtiyat edirdi?! Əminəm ki, cəmiyyətin ən həssas təbəqəsi ilə işləyən yeni nazir bunların da səbəbini artıq bilir”.
Yeri gəlmişkən, "Reytinq”in redaksiyasına Əhmədov Bəhruz Xosrov oğlu tərəfindən Prezident İlham Əliyevə, Baş prokuror Zakir Qaralova və digər aidiyyatı dövlət qurumlarının rəhbərlərinə ƏƏSMN-nin aparat rəhbəri Əjdər Cəbiyevin qardaşı Şahalı Cəbiyevin müdiri olduğu DSMF-nin Suraxanı rayon şöbəsində baş verənlərlə bağlı sensasiya sayılacaq şikayət ünvanlayıb. O, şikayətində bu şöbədə kimlərə saxta pensiya hesabı açıldığını ad və soyadları ilə siyahılaşdırıb, detallarına qədər yazıb.
Həm bu, həm də nazirlikdə cərəyan edən digər maraqlı proseslərlə bağlı dəqiqləşdirmələrimiz davam edir. Növbəti sayımızda bütün bunlarla yanaşı, Səlim Müslümovun kadrları hansı prinsiplərlə qabağa çəkməsi, onun iqtisadiyyat şöbəsinin müdirəsi Şəlalə Cəfərova ilə mətbuat xidmətinin rəhbəri Elman Babayevə həddən ziyadə etimad göstərməsinin səbəblərini, Mətin Kərimli, Natiq Məmmədov və İlqar Rəhimovun niyə təcrid edilməsi ilə bağlı təfərrüatları da təqdim edəcəyik.
Eyni zamanda, özünüməşğulluq layihəsinə ayrılan 32 milyonun taleyi, bu nazirliklə əməkdaşlıq edən QHT-lərin hansı prinsiplə seçilməsi, həmçinin Ünvanlı Sosial Yardımlara hər il ayrılan 200 milyondan çox vəsaitlərlə bərabər, Səlim Müslümovun maliyyə naziri Samir Şərifovu necə "tələ”yə salmaq istəməsi kimi maraqlı məsələlərə toxunacağıq.
