DİA.AZ: - Məlum olduğu kimi, keçən günlərdə İmam Xomeyni adına İmdad Komitəsinin Azərbaycandakı fəaliyyətinə qadağa qoyuldu. Əslində belə bir qadağanın qoyulması gözlənilən idi. Ən azından Azərbaycan dövlətçiliyi adından bu addım atılmalı idi. Çünki dəfələrlə fars-molla rejiminin bu kimi qurumların adı altında əslində fərqli mahiyyətdə XİDMƏT GÖSTƏRDİKLƏRİ haqda iddialar səsləndirilmişdi. Bu barədə yerli Azərbaycan mətbuatında da yetərincə informasiyalar yayılsa da, hər dəfəsində məlum olay aktuallıq qazandığında İran tərəfi İmam Xomeyni adına İmdad Komitəsinin Azərbaycanda məcburi köçkün ailələrinin İMDADINA YETİŞDİYİNİ iddia edərək, bütün ittihamları rədd etmişdi.
Belə bir şəraitdə tək qalanı komitənin fəaliyyətinin durdurulması idi. Digər tərəfdən də artıq Azərbaycanın bu kimi qayğı və himayəyə ehtiyacının olmadığı faktı da mövcuddur. Yəni əvvəlki illərdən fərqli olaraq özü ayaq üstündə durmağı bacaran Azərbaycanın İrandan gələn yardımları dayandırması təbiidir. Xüsusən də bu yardımların içində fərqli çalarlar aşkar surətdə duyulursa.
DİA.AZ-ın apardığı araşdırmalar da təsdiqləyir ki, fars-molla rejimi illərdir ki, məhz bu «xeyriyyə cəmiyyətinin» xətti ilə Azərbaycandakı casus şəbəkəsinə müxtəlif vaxtlarda pullar ötürüb. Yəni «yardım» hədəfi göründüyü kimi, tək ehtiyac içində olan məcburi köçkünlər olmayıb. Və elə bu səbəb də Azərbaycanı İmam Xomeyni adına İmdad Komitəsindən imtinaya vadar edib. Hər halda, nə qədər imkanın olmasına rəğmən Azərbaycanın istənilən bir yardımdan normal şəraitdə imtina etməsi heç də ağıllı qərar sayılmalı deyildi. Deməli, burada səbəb heç də Azərbaycanın artıq belə yardımlara ehtiyacının olmaması deyil.
Bildirək ki, rəsmi Bakının verdiyi bu qərar fars-molla rejimi tərəfindən böyük əsəblə qarşılanıb. Hətta bu gün məlum olaya nəzər salan İran mediası Azərbaycanı nankorluqda belə ittiham edir. DİA.AZ olaraq «arannyus» portalında «20 ildən yuxarı yardımlara görə naşükürlük» başlığı ilə təqdim olunmuş qəzəb dolu fars-molla mövqeyini olduğu kimi diqqətinizə təqdim edirik:
«Azərbaycan Respublikası İmam Xomeyni(r.ə.) adına İmdad Komitəsinin Bakıdakı nümayəndəliyinin fəaliyyət lisenziyasını uzatmaqdan çəkinərək, bu təşkilatın 20 ildən yuxarı humanitar yardımlarına naşükürlük və qədirbilməzliyini göstərdi
İnformasiya qaynaqlarının məlumatlarına əsasən, Bakı tərəfindən fəaliyyət lisenziyasının uzadılmaması səbəbindən ötən ilin iyul ayından xeyriyyə fəaliyyəti dayanmış İmam Xomeyni(r.ə.) adına İmdad Komitəsinin Bakıdakı nümayəndəliyinin tabeliyində olan İmam Əli(ə) Tibb Klinikası Azərbaycan Respublikasının əlaqədar orqanlarının həmkarlıq etməmələri üzündən bağlıdır.
Bu məlumata görə, Qərbin onlarla sözdə xeyriyyə orqanının Azərbaycan Respublikası boyu azad şəkildə fəaliyyət göstərdikləri bir halda, rəsmi Bakı İmam Xomeyni(r.ə.) adına İmdad Komitəsinin Bakıdakı nümayəndəliyini öz humanitar fəaliyyətlərini dayandırması üçün bu nümayəndəliyin binasının suyunu kəsmək kimi etikaya sığmayan üsullara əl atıb.
Azərbaycan Respublikası xalqının İmam Xomeyni(r.ə.) adına İmdad Komitəsinin Bakıdakı nümayəndəliyinin ötən iyirmi ildəki humanitar və heç bir məqsəd güdməyən yardımlarını unudulmaz adlandırıb, bu fəaliyyətlərin davam etməsini istədiyi bir halda, Bakının əlaqədar orqanları iddia edirlər ki, İmdad Komitəsinin yardımlarına ehtiyacları yoxdur.
Belə bir şəraitdə, ümumi fikir üçün belə bir sual yaranır ki, humanitar yardımlara ehtiyacın duyulmadığı bir şəraitdə, Qərbin və sionistlərin onlarla sözdə xeyriyyə orqanının Azərbaycan Respublikasında fəaliyyətinin səbəbi nədir?
Britaniya Humanitar Təşkilatının Nümayəndəliyi, sionist rejimin Soxont və Maşav təşkilatlarının nümayəndəlikləri, Yəhvə Şahidləri, Norveçdən olan Norveç Mühacirlər Şurası, Ekilir fransız humanitar təşkilatının nümayəndəliyi və Yunanıstandan olan Yunan Həkimlər Dünyası adlı humanitar təşkilatın nümayəndəliyi bu orqanlardandırlar.
Bu müəssisələrin bəziləri, o sıradan Amerika Milli Demokratiya İnstitutu Bakı rəsmilərinin etiraflarına görə, aşkar surətdə hökumətlə müxalifətdə olanlara maddi vəsait verir, lakin Azərbaycan Respublikası onların əleyhinə heç bir addım atmır.
Deyilənlərə görə, İmam Xomeyni(r.ə.) adına İmdad Komitəsinin Bakıdakı nümayəndəliyi ötən ildən bu nümayəndəliyin və onun tabeliyində olan İmam Əli(ə) klinikasının fəaliyyət lisenziyalarının uzadılmasını istəyib, ancaq Bakının əlaqədar orqanları öz vədlərinə rəğmən, cavab verməkdən çəkiniblər.
Hər gün onlarla ehtiyaclı azəriyə pulsuz tibb xidmətləri göstərən İmam Əli(ə) klinikasının fəaliyyətinin dayandırılması xalqın narazılığına səbəb olubdur.
İmam Xomeyni(r.ə.) adına İmdad Komitəsinin Bakıdakı nümayəndəliyi təqribən iyirmi il bundan öncədən on minlərlə ehtiyaclını və Qarabağ müharibəsi didərginini öz himayəsi altına alaraq, Azərbaycan Respublikasında milyonlarla dollar humanitar yardım xərcləyibdir.
Özünüidarəetmə layihələrinin icrası, faizsiz kreditlərin verilməsi, təhsil köməklərinin təqdimi, ehtiyaclı təzə gəlinlərin cehizlərinin təmini, nağd və qeyri-nağd yardımlar, pulsuz tibb yardımları İmam Xomeyni(r.ə.) adına İmdad Komitəsinin iyirmi ildə göstərdiyi fəaliyyətlərin bir hissədir».
